Вы тут

Топ яркіх прыгажунь беларускага тэлебачання


Тэлевядучыя для многіх становяцца ўзорамі для пераймання ў стылі, манеры апранацца, паводзінах і ацэнцы тых ці іншых падзей. Каляндарная вясна і Міжнароднае жаночае свята — самы час успомніць яркіх і чароўных прадстаўніц беларускіх тэлеканалаў. Яны разумныя і адукаваныя, нягледзячы на маладосць, ужо знакамітыя і... дагэтуль свабодныя. Яны выклікаюць захапленне прывабнай знешнасцю, да таго ж кожная з іх з'яўляецца асобай яркай і неардынарнай. Інакш паспяховай кар'еры на тэлебачанні не зрабіць! Ну, а мы ў сваю чаргу не маглі не пацікавіцца, якім павінен быць мужчына, каб спадабацца такім прыгажуням.


Анастасія Багамолава, вядучая «Навін», праграмы «Твой горад» і «Навіны. Цэнтральны рэгіён» на тэлеканале «Беларусь 1»

Анастасія скончыла Інстытут журналістыкі БДУ. На тэлебачанні пачала працаваць з першага курса: спачатку ў праграме «Добрай раніцы, Беларусь» на «Беларусь 1», пасля — у перадачы «Наша раніца» на АНТ. Пасля курсаў для тэлевядучых у Белтэлерадыёкампаніі трапіла ў Агенцтва тэлевізійных навін, працавала ў праграме «Навіны рэгіёна». Акрамя работы ў якасці тэлевядучай актыўна здымала рэпартажы і запісвала інтэрв'ю. Усё гэта Анастасія сумяшчала з навучаннем ва ўніверсітэце.

Сёння яна большасць часу прысвячае працы. У вольны час абавязкова наведвае трэнажорную залу, дзе аддае перавагу кардыёнагрузкам. Акрамя гэтага, вельмі любіць падарожжы. Пасля катання на снаўбордзе ў Швейцарыі ўлюбілася ў горы.

Тэлевядучая лічыць, што найлепшыя яе дасягненні яшчэ наперадзе.

— У жыцці няма нічога выпадковага. Мая прафесія была асэнсаваным выбарам, і спадзяюся, што камусьці такім чынам я прыношу карысць, — усміхаецца Анастасія.

Каб спадабацца нашай гераіні, мужчына павінен спалучаць мужнасць і інтэлект, а таксама шчодрасць.


Крысціна Вінярская, вядучая прагнозу надвор'я на тэлеканале АНТ

Нягледзячы на тое, што на тэлеканале АНТ яна з'явілася зусім нядаўна, у яе немалы вопыт працы на тэлебачанні і тэлевізійная адукацыя. Пасля Інстытута сучасных ведаў, дзе атрымала прафесію перакладчыка, Крысціна пераехала ў Маскву і скончыла Інстытут тэлебачання і радыёвяшчання. Тонкасці тэлевізійнай кухні спасцігала на тэлеканале «Хатні». А потым зноў вярнулася ў Мінск. І працавала ў Агенцтве тэлевізійных навін на тэлеканале «Беларусь 1». А ў пачатку мінулага года ўвогуле засяродзілася на стварэнні дакументальнага кіно. Улетку, падчас святкавання 15-годдзя тэлеканала АНТ, калі праходзілі кастынгі па пошуку новых твараў, Крысціна вырашыла паўдзельнічаць.

— Мяне папрасіў аб гэтым мой дзядуля, ён вельмі верыць у мяне. І вось прайшло два з паловай месяцы, і, калі я ўжо і не чакала, што мяне возьмуць, мне патэлефанавалі. Я моцна здзівілася, але была вельмі гордая сабой! — з усмешкай дзеліцца тэлевядучая.

Прайшоўшы навучанне на тэлеканале, са снежня Крысціна Вінярская расказвае пра надвор'е.

— Маё захапленне журналістыкай, дзякуючы якому я і скончыла Інстытут тэлебачання ў Маскве, перарасло ў прафесію. І я гэтым цалкам задаволеная, — кажа Крысціна.

Вядучая ўпэўнена, што мужчына павінен быць моцны і гатовы браць на сябе адказнасць за сям'ю і дзяцей, а галоўнае — любіць сваю жанчыну.


Марыя Лемешава, вядучая «Навін спорту» і інфармацыйна-аналітычнай праграмы «Спортклуб» на тэлеканале АНТ

Тэлевядучая нарадзілася ў Смалявічах. Пасля школы скончыла машынабудаўнічы каледж, затым — Беларускі дзяржаўны эканамічны ўніверсітэт. І трапіла на кастынг АНТ. У ім, між іншым, удзельнічала каля пяці тысяч прэтэндэнтаў. Але ўдача ўсміхнулася Марыі, якая яшчэ з дзяцінства выдатна чытала тэксты, за што настаўнікі прадказвалі ёй кар'еру на тэлеэкране. На АНТ дзяўчыну ўзялі як вядучую прагнозу надвор'я, але на той момант праект так і не выйшаў у эфір. А Марыя часова трапіла... у спартыўную рэдакцыю. Дагэтуль яна не мела ніякага дачынення да прафесійнага спорту. Але як вядома, няма нічога больш пастаяннага, чым часовае — вось ужо 12 гадоў прыгажуня расказвае пра навіны спорту. За гэты час разабралася не толькі ў тонкасцях футбола і тэніса, барацьбы і лёгкай атлетыкі, але і навучылася хутка і без памылак вымаўляць самыя складаныя спартыўныя назвы. Напрыклад ісландскага клуба «Хафнарф'юордур». А трымаць сябе ў выдатнай форме тэлевядучай дапамагаюць заняткі плаваннем і фітнесам.

Марыя рассталася з мужам і сёння выхоўвае трохгадовага сына Яна, якому прысвячае ўвесь вольны час.

— Пасля яго нараджэння вымушаная была на паўтара года сысці з эфіру, бо лічу, што маленькае дзіця павінны выхоўваць не блізкія ці нянька, а толькі мама, — кажа яна.

Зараз у паспяховай вядучай ёсць усё: уласная кватэра, аўтамабіль і любімая работа.

— Каб спадабацца, мужчына павінен быць такім жа мужным, як футбаліст Дэвід Бэкхэм, стыльным, як бізнесмен Уладзіслаў Даронін, і абаяльным, як акцёр Джордж Клуні, — усміхаецца Марыя.


Вольга Бачкова, вядучая праграмы «Тэлераніца» на тэлеканале «Беларусь 2»

Вольга нарадзілася ў Кыргызстане, у горадзе Фрунзэ (цяпер Бішкек). Скончыла там гуманітарны факультэт Кыргызска-Расійскага славянскага ўніверсітэта, атрымаўшы адукацыю псіхолага. Але пяць гадоў таму вырашыла пераехаць у Беларусь. І па яе прызнанні, улюбілася ў нашу краіну.

— Мяне вельмі ўразілі людзі: беларусы умеюць цаніць сяброўства, узаемаразуменне, падтрымку. Я не сустракаю спажывецкіх адносін, усё настолькі шчыра і ад душы, — прызнаецца вядучая. — Дружалюбнасць і адкрытасць беларусаў вельмі мяне кранаюць.

З дзяцінства Вольга захаплялася журналістыкай. Яшчэ ў падлеткавым узросце ў Фрунзэ займалася ёй у дзіцячым цэнтры, а яе кароткаметражны фільм пра СНІД нават заняў прызавое месца ў конкурсе, пасля выпускала сценгазету. Затым працавала на «Аўтарадыё», а першы вопыт на тэлебачанні атрымала на адным з кыргызскіх тэлеканалаў.

На Беларускае тэлебачанне пайсці парэкамендавалі сябры. Сваю работу на «Беларусь 1» пачынала ў Агенцтве тэлевізійных навін. Цяпер вядзе праграму «Тэлераніца» і ўпэўнена, што сакрэт добрага настрою — у мэце. Калі яна ў вас ёсць і вы да яе рухаецеся — добрай будуць і раніца, і дзень, і вечар.

Мэтанакіраванасць самой Вольгі здзіўляе: штодзень, нягледзячы на надвор'е, вядучая выходзіць на прабежку. 30 хвілін — і яна ў выдатнай форме і настроі. Настрой стварае і маленькая дачка Яраслаўна, якую выхоўвае Вольга пасля расставання з мужам. А ў мужчынах, акрамя мэтанакіраванасці і ўмення браць на сябе адказнасць, тэлевядучая цэніць шанаванне сямейных традыцый і павагу да старэйшых членаў сям'і.


Дзіяна Равякова, вядучая праграмы «Навіны эканомікі» і рубрыкі «НЕ:ВЫНІКІ» на тэлеканале «Беларусь 1»

Дзіяна нарадзілася ў Жлобіне. Скончыла Беларускі дзяржаўны тэхналагічны ўніверсітэт, атрымаўшы дыплом інжынера па сертыфікацыі. І пэўны час працавала па спецыяльнасці, але задавальнення аднастайная работа з дакументамі не прыносіла.

— Я зразумела, што зрабіла не зусім правільны выбар, — кажа Дзіяна. — І аднойчы адважылася змяніць асяроддзе — проста звольнілася з нелюбімай работы. Першыя крокі на новым жыццёвым этапе пачала з удасканалення англійскай мовы ў лінгвістычным універсітэце і навучання на тэлевізійных курсах.

І калі ў Агенцтве тэлевізійных навін на тэлеканале «Беларусь 1» шукалі новыя твары, выбар спынілі на ёй. Дзіяна стала вядучай эканамічнай рубрыкі «У курсе» і праекта аб закадравым жыцці Агенцтва тэлевізійных навін «НЕ:ВЫНІКІ». У пазаэкранным жыцці тэлезоркі адно з захапленняў — псіхалогія. Вядучая нават атрымала дадатковую адукацыю і дыплом БДУ. Цяпер працягвае ўдасканальваць свае веды ў Маскоўскім гештальт інстытуце. І з'яўляецца, між іншым, практыкуючым псіхолагам.

— Журналістыка мяне захапляе і натхняе, у адрозненне ад першай, адказнай і даволі сумнай для мяне, прафесіі. Зараз займаюся таксама сур'ёзнай справай, але адначасова вельмі цікавай! Больш часу прысвячаю праграме «Навіны эканомікі». Таксама з'яўляюся аўтарам шэрагу рэпартажаў.

У планах энергічнай дзяўчыны — прайсці курсы экстрэмальнага кіравання аўтамабілем. І звязана гэта з асабістай гісторыяй.

— Блізкі мне чалавек трапіў у аўтамабільную катастрофу, і пасля я доўга не магла сесці за руль. Веды па псіхалогіі дапамаглі пераадолець гэты бар'ер, і цяпер я хачу дапамагаць іншым у такіх сітуацыях, — дзеліцца Дзіяна.

Будучы абраннік, па прызнанні тэлевядучай, павінен быць добрым сябрам і валодаць пачуццём гумару. Выдатна, калі разам з гэтым у яго будзе выдатнае адчуванне стылю — напрыклад, як у галівудскага акцёра Мэцью Макконахі.

Алена КРАВЕЦ

Загаловак у газеце: Прывабныя і неардынарныя, знакамітыя і свабодныя

Дадаць каментар

Выбар рэдакцыі

Культура

Форум тэатральнага мастацтва «ТЭАРТ» пакінуў на сэрцы рваныя раны

Форум тэатральнага мастацтва «ТЭАРТ» пакінуў на сэрцы рваныя раны

Мядзведзь на сцэне, Чэхаў на мове жэстаў і самая дакладная перадача стану дэпрэсіі.

Спорт

Настасся Чарняўская: Трэба, каб людзі ведалі: бадмінтон — рэальны спорт

Настасся Чарняўская: Трэба, каб людзі ведалі: бадмінтон — рэальны спорт

Якія задачы ставяцца перад камандай у 2019 годзе і што самае важнае ў бадмінтоне?

Грамадства

Які ўрок лепшы: перакулены або традыцыйны?

Які ўрок лепшы: перакулены або традыцыйны?

Як зрабіць, каб у вучняў загарэліся вочы?

Грамадства

Губернатар Гродзеншчыны - пра перспектыўныя праекты рэгіёна

Губернатар Гродзеншчыны - пра перспектыўныя праекты рэгіёна

Горад-спадарожнік, анкалагічны цэнтр, «вёскі будучыні»...