Пусціцца ў скокі са страусам, рыбай і жабай, пагладзіць ільва, тыгра і слана, сфатаграфавацца з казой, пеўнем і буслом, паслухаць казку зайца, лісы і мядзведзя... Усё гэта і шмат іншага можна было зрабіць на першым фестывалі масак «Ярома і Яроміха запрашаюць», які ў выхадныя прайшоў у аграгарадку Ярэмічы.
Гаспадары свята — дзед-Ярома і баба-Яроміха, якія жывуць каля Нёмана і маюць вялікую гаспадарку. Разам з жывёламі са свайго падворку — сабакам, катом, кароўкай, страусам, свіннёй, пеўнем, казой ды куркай, — суседзямі з ракі: жабай, рыбай ды буслам, а таксама з гасцямі-лялькамі з суседняга Навагрудскага раёна героі прайшліся па аграгарадку. Па дарозе шэсце збірала ўсіх цікаўных. Сапраўды, не кожны дзень сустрэнеш на вуліцы вярблюда ды малпу.
У Гродзенскай вобласці тры калектывы, якія займаюцца лялькамі. Гэта Беларускі ігравы тэатр роставых лялек «Dolls4All» з Дзятлава, тэатр лялек «Шчарсунок» з аграгарадка Шчорсы Навагрудскага раёна і самабытны калектыў з Ярэміч — народнае аматарскае аб'яднанне «Закрытыя твары». Месцажыхарства апошняга і натхніла арганізатараў стварыць на ярэміцкай зямлі самабытны фестываль, які, як спадзяюцца, стане брэндавым святам мястэчка.
Ярома з Яроміхай расказалі ў тэатральнай лялечнай замалёўцы, як яны жывуць: карову дояць, птушак кормяць, рыбу вудзяць, з буслам сябруюць. А леў, тыгр ды слон паказалі сапраўднае цыркавое прадстаўленне. Юныя акцёры з тэатра «Шчарсунок» парадавалі гледачоў лялечнай казкай пра небараку-зайца ды вожыка-свавольніка, які ўсіх звяроў у лесе крыўдзіў, нават лісу з воўкам ды мядзведзем.
— Мы спадзяёмся, што фестываль стане пастаянным і да нас будуць далучацца іншыя калектывы. Ужо цяпер відаць, як зацікавіліся відовішчам не толькі дзеці, але і дарослыя. Тым больш што гледачу не толькі паказваюць прадстаўленне, а і ўцягваюць людзей у працэс, — расказала Іна САНЧУК, начальнік аддзела ідэалагічнай работы, культуры і па справах моладзі Карэліцкага раённага выканаўчага камітэта. — Спецыяльна да фестывалю мы прыдумалі новыя гульні і конкурсы. А пад герояў, якіх несупынна стварае кіраўнік калектыву «Закрытыя маскі» Марыя Пятроўна Крэнь, мы пастаянна пішам новыя сцэнарыі і замалёўкі. Вось нядаўна майстрыха зрабіла шыкоўную лісу, і рыжая хітруха ўжо бегае на свяце.
Сапраўды, прысутныя маглі не толькі паглядзець выступленні лялек і паслухаць нумары мясцовых эстрадных выканаўцаў са сцэны, але і пагутарыць ды пагарэзіць з казачнымі жывёламі, уцягнуцца ў масавую гульню і проста парадавацца, што такое яскравае мерапрыемства прайшло бадай што пад вокнамі роднай хаты.
— Мы прыехалі ў Ярэмічы на дзень нараджэння да зяця і былі прыемна здзіўлены такім святам. Прыйшлі з дзецьмі і ўнукамі, цудоўна правялі час. Усё арганізавана належным чынам. Нашы хлопчыкі вельмі задаволены. Ды і ўсе навокал танцуюць, спяваюць, — падзялілася ўражаннямі Наталля БІРУЛЯ, цяперашняя мінчанка, якая родам з суседняй вёскі Браносава.
— Я ў раённай газеце прачытала пра свята і вырашыла паглядзець, як гэта будзе. Весела, прыгожа, народ сабраўся, і прыезджых шмат. Часцей бы такое праводзілі, — пажадала Таццяна ТАНАНКА з суседняга аграгарадка Турэц.
— Тут весела і так прыгожа ўсё зроблена. Мне вельмі спадабаўся бусел, я таксама ў такім касцюме пабегаў бы, — далучыўся сын Таццяны Міша, які прыбег да мамы ўзяць грошай на конкурс і праз хвіліну знік, пабег весяліцца.
Не давалі сумаваць гледачам і супрацоўнікі Карэліцкага цэнтра культуры і народнай творчасці, якія стварылі на свяце перформанс. Дзяўчаты ў вобразах мімаў моўчкі дарылі дзецям і дарослым маскі з паперы і жэстамі прапаноўвалі рабіць з імі своеасаблівыя партрэты з рамкай. Ад ахвотных не было адбою. Дадайце да гэтага батут для дзетак, конкурсы, салодкія пачастункі — і зможаце яшчэ больш уявіць атмасферу, што панавала на свяце. Аднак, каб адчуць гэта цалкам, трэба пабачыць усё на ўласныя вочы. Наступным годам лялькі ізноў будуць чакаць сустрэчы.
Ірына СІДАРОК
Сумесныя праекты ядзерных тэхналогій.