Вы тут

Знаёмцеся: “Голас Радзімы”


Выданне для супляменнікаў за мяжой, якое выходзіць з 1955 года, цяпер стала сваім у вялікай звяздоўскай сям’і. З ліпеня 2018-га вядомая многім раней газета (наклад, бывала, перавышаў 20 тысяч экзэмпляраў) – у складзе Рэдакцыйна-выдавецкай установа «Выдавецкі дом “Звязда”».


Чарговы, 25-ы сёлета і 3577-ы ад часу заснавання, нумар газеты “Голас Радзімы” пабачыў свет 19 ліпеня. Раней, нагадаем, выданне было ў складзе медыяхолдынга “СБ. Беларусь сегодня”, на ягоным партале пакуль застаецца й вялікая частка электроннага архіву выдання. А новы нумар можна пабачыць і ў інтэрнэце. Падаецца, як і раней, газета ў ПДФ-фармаце, што зручна для чытачоў з замежжа.

Сталыя чытачы газеты, якіх нямала і ў Беларусі, і за межамі Бацькаўшчыны, заўважылі: цяпер у газеты “Голас Радзімы” 8 старонак. Удакладнім, што раней штотыднёвік, маючы толькі 4 старонкі, некаторы час “хаваўся” ўнутры англамоўнага 12-старонкавага выдання “The Minsk Times”. Цяпер кожны нумар газеты для суайчыннікаў пабольшаў удвая, выходзіць будзе два разы на месяц. Мяркуем, новы фармат выдання прыйдзецца даспадобы чытачам. Вялікую зацікаўленасць у тым, каб газета “Голас Радзімы” развівалася, пашырала чытацкую аўдыторыю, маюць яе даўні няштатны аўтар, а цяпер Міністр інфармацыі Алесь Карлюкевіч, а таксама дырэктар – галоўны рэдактар Рэдакцыйна-выдавецкай установы «Выдавецкі дом “Звязда”» Павел Сухарукаў”. Мы напісалі ўжо ў новафарматным нумары, што атрымліваем ад Паўла Якаўлевіча з калегамі ўсебаковую падтрымку нашай дзейнасці.

Рэдакцыя наша застаецца ў Доме прэсы, па адрасе: 220013, Мінск, вуліца Багдана Хмяльніцкага, 10-а. Пакой 907. Выходныя звесткі, тэлефоны друкуюцца на апошняй старонцы ў кожным нумары газеты.

Варта нагадаць, што газета наша мае слаўныя традыцыі, з ёй супрацоўнічалі, у ліку іншых, класікі беларускай літаратуры, вядомыя дзеячы культуры. У прыватнасці, зберагаецца ў рэдакцыі падшыўка за 1960 год, а якраз тады, са студзеня, выданне “За вяртанне на Радзіму” стала называцца: “Голас Радзімы”. У тых нумарах знаходзім вершы Максіма Танка, Уладзіміра Караткевіча, Аляксея Пысіна, Ніла Гілевіча, Пімена Панчанкі, Язэпа Пушчы, Уладзіміра Дубоўкі (верш “Сталіца міру” напісаны з Масквы спецыяльна для газеты ў першамайскі нумар!), Канстанцыі Буйлы (таксама дасланыя ў рэдакцыю з Масквы), допісы Янкі Брыля, Івана Шамякіна, Рыгора Шырмы…  Зрэшты, і ў новых умовах аўтарскі калектыў рэдакцыі працуе плённа: у 2016-м, напрыклад, быў ушанаваны як лаўрэат Спецыяльнай прэміі Прэзідэнта Рэспублікі Беларусь дзеячам культуры і мастацтва.

Мы па-ранейшаму шмат увагі надаем досведу працы беларускіх суполак у замежжы, іх кантактам з гістарычнай Бацькаўшчынай, расказваем пра адметных беларусаў замежжа, пашыраем кола няштатных аўтараў. Будзем адладжваць супрацоўніцтва й з калегамі са “звяздоўскіх” выданняў, бо ў “Голасе Радзімы” заўсёды ёсць месца для цікавых публікацый пра гісторыю, сучаснае жыццё Беларусі.

Звяртаем увагу чытачоў, што падпіска на газету “Голас Радзімы” будзе адкрыта ў Беларусі на 2019 год. Пакуль жа – чытайце нас у інтэрнэце. Актывісты шэрагу беларускіх суполак замежжа цяпер атрымліваюць газету па пошце – ёсць спецыяльная рассылка. У рассылачны спіс уносяцца найчасцей тыя, хто шмат робіць для пашырэння беларускай культуры ў замежжы, актыўна супрацоўнічае з рэдакцыяй.

Іван Ждановіч, галоўны рэдактар газеты “Голас Радзімы”

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.