Чарговае пасяджэнне Савета пастаянных паўнамоцных прадстаўнікоў дзяржаў СНД пры статутных і іншых органах Садружнасці пройдзе 20 лістапада ў Выканаўчым камітэце СНД у Мінску. Аб гэтым БЕЛТА паведамілі ў прэс-службе ведамства.
Пастаянныя прадстаўнікі краін Садружнасці маюць намер разгледзець шэсць пытанняў. У прыватнасці, у першую чаргу яны абмяркуюць вынікі пасяджэння Савета кіраўнікоў урадаў СНД, якое адбылося 2 лістапада ў Астане, і намецяць задачы па рэалізацыі прынятых дакументаў.
Як паведамлялася, на пасяджэнні СКУ былі прыняты важныя рашэнні, вялікая частка якіх накіравана на пашырэнне супрацоўніцтва ў эканамічнай, гуманітарнай і іншых сферах. Сярод падпісаных дакументаў - пагадненне аб узаемадзеянні дзяржаў СНД па забеспячэнні гатоўнасці на выпадак ядзернай аварыі або ўзнікнення радыяцыйнай аварыйнай сітуацыі і ўзаемадапамогі пры ліквідацыі іх наступстваў, канцэпцыя супрацоўніцтва па развіцці вытворчасці высокатэхналагічнага энергетычнага абсталявання і план асноўных мерапрыемстваў па яе рэалізацыі, пагадненне аб сумеснай дзейнасці ў галіне даследавання і выкарыстання касмічнай прасторы ў мірных мэтах, план прыярытэтных мерапрыемстваў у сферы гуманітарнага супрацоўніцтва на 2019-2020 гады.
Пастаянныя прадстаўнікі заслухаюць інфармацыю аб дзейнасці Савета кіраўнікоў органаў бяспекі і спецыяльных службаў, савета па прамысловай палітыцы дзяржаў Садружнасці па арганізацыі і каардынаванні выканання рашэнняў вышэйшых органаў СНД.
Акрамя таго, на пасяджэнні будуць разгледжаны пытанні рэалізацыі рашэнняў вышэйшых органаў Садружнасці, якія датычацца адаптацыі СНД да сучасных рэалій, аб кіраўніку місіі наглядальнікаў ад СНД на пазачарговых выбарах у Нацыянальны сход Арменіі.
Што за таемнымі дзвярыма?
