Найлепшыя аматарскія тэатральныя калектывы Міншчыны сабраў XІ абласны фестываль народных тэатраў «Бярэзінская рампа», які праходзіць з 30 лістапада да 2 снежня ў Беразіне.
У фестывальнай афішы — самая вядомая камедыя выдатнага драматурга, рэфарматара італьянскага тэатра Карла Гальдоні «Карчмарка» ў пастаноўцы тэатра Бярэзінскага РДК. Легендарную «Матроскую цішыню» Аляксандра Галіча пакажа народны тэатр Палаца культуры «БЕЛАЗ-ХОЛДЫНГ» з Жодзіна. Тэатр імя Урсулы Радзівіл з Нясвіжа прапануе гледачам сваю версію п'есы Аляксея Дударава «Чорная Панна Нясвіжа» ў драме «Бог ёсць любоў». Булгакаўская «Зойчына кватэра» будзе выканана тэатрам з Вілейкі. Драма «Клаўдзій» Яўгена Балакіна — яшчэ адна версія ўзыходжання на трон імператара Рымскай дзяржавы, якую прадставіць барысаўскі драматычны тэатр «Відарыс» .
Тэатр «Адлюстраванне» з Маладзечна выстаўляе на конкурс камедыю Валянціна Краснагорава «Спатканне па серадах або сцэны з сямейнага жыцця». Аўтарскі праект рэжысёра Дзмітрыя Шуманіна — сюррэалістычную камедыю «Міма дажджоў» прадстаўляе слуцкі тэатр «Папараць-кветка».
У заключэнне ўдзельнікі і госці «Бярэзінскай рампы» змогуць паглядзець спектакль народнага маладзёжнага тэатра «Штурх» Палаца культуры «БЕЛАЗ-ХОЛДЫНГ», які запрошаны на фестываль у якасці госця.
Ацэньваць майстэрства выканаўцаў будзе кампетэнтнае журы на чале з заслужаным артыстам Беларусі, дэканам факультэта Беларускай дзяржаўнай акадэміі мастацтваў, прафесарам Уладзімірам Мішчанчуком.
Таццяна ЛАЗОЎСКАЯ
Сумесныя праекты ядзерных тэхналогій.
