Вы тут

Дайджэст навін з рэгіёнаў Беларусі


Форум дзелавога супрацоўніцтва — 2019 прайшоў у Салігорску

Гэта першае мерапрыемства, арганізатарамі якога выступілі Беларуская гандлёва-прамысловая палата і Салігорскі райвыканкам, паведамляе раённая газета «Шахцёр».

Фота: shahter.by

Нефармальны бізнес-форум дазволіў пазнаёміць прадстаўнікоў дванаццаці дыпламатычных місій, якія акрэдытаваны ў Рэспубліцы Беларусь, і гандлёвых прадстаўніцтваў з культурай, прадпрыемствамі, асаблівасцямі эканамічнага развіцця раёна.

Арганізатары спадзяюцца, што першы станоўчы вопыт правядзення форуму будзе распаўсюджаны на іншыя рэгіёны Мінскай вобласці. Мэта мерапрыемства — узаемнае супрацоўніцтва, укладанне інвестыцый, стварэнне новых сумесных праектаў. Госці ацанілі якасць і разнастайнасць на выстаўцы прадукцыі прадпрыемстваў Салігорскага раёна. Пасля афіцыйнай часткі прадстаўнікі бізнесу правялі дзелавыя перагаворы з патэнцыйнымі партнёрамі. Цікавасць была праяўлена падчас дэгустацыі, а таксама падчас прэзентацыі прадпрыемстваў.

Старшыня камітэта эканомікі Мінскага аблвыканкама Сяргей ЖАЛЯЗНЯК:

— Сённяшні форум — гэта першае мерапрыемства, якое праводзіцца ў рамках дзелавога супрацоўніцтва паміж рэгіёнамі і дыпламатычнымі прадстаўніцтвамі дзеля таго, каб паказаць свой патэнцыял. Хачу адзначыць, што Мінская вобласць сёння экспартуе сваю прадукцыю больш чым у 150 краін свету. Мы пастаўляем на экспарт больш за 900 пазіцый. Міншчына заключыла пагадненні з рэгіёнамі 80 краін блізкага і далёкага замежжа. Форум паказаў на прыкладзе аднаго з самых перадавых рэгіёнаў, як сёння развіваецца Рэспубліка Беларусь, вызначыў перспектыўныя напрамкі для прасоўвання прадукцыі за межы нашай дзяржавы.


Пытанне да дэпутата

На прамой лініі — старшыня Мінскага абласнога Савета дэпутатаў

Як паведамілі «МС» у Мінскім абласным Савеце дэпутатаў, у суботу, 16 лютага, старшыня Мінскага абласнога Савета дэпутатаў Наталля Віктараўна Якубіцкая правядзе прамую тэлефонную лінію. Задаць свае пытанні кіраўніку прадстаўнічай улады сталічнага рэгіёна можна з 9.00 да 12.00 па тэлефоне
8 (017) 500-41-60.


Грыбное месца

На Міншчыне нядаўна з'явілася першая вытворчасць па вырошчванні шампіньёнаў

Запусціла яе кампанія «Аграсэрвіс-6», якая дынамічна развіваецца, піша раённая газета «Прысталічча». Свежая прадукцыя, вырашчаная на якаснай сыравіне, хутка знайшла свайго пакупніка не толькі ў Беларусі, але і за яе межамі.

Фота: prіstalіca.by

Штодня вытворцы атрымліваюць каля трох тон смачных далікатэсаў. А пры выхадзе на поўную вытворчую магутнасць штомесячны ўраджай дасягне 200 тон.

Грыбныя «плантацыі» размяшчаюцца недалёка ад Мінска — у аграгарадку Сеніца. Тут у дванаццаці кліматычных камерах растуць шампіньёны.

Якасны кампост для вырошчвання грыбоў — залог высокай рэнтабельнасці бізнесу. Субстрат з грыбным міцэліем кампанія купляе ў Польшчы. Кантэйнеры з грунтам размяшчаюць у некалькі радоў у сем паверхаў. Пры вырошчванні шампіньёнаў не выкарыстоўваюцца мінеральныя ўгнаенні і іншыя хімічныя рэчывы — толькі вада для актыўнага росту грыбоў. Калі добра завільгатніць грунт, пік ураджаю не за гарамі.

— Ураджай у значнай ступені залежыць ад якасці пажыўнай базы, таму эканоміць на субстраце нельга, — тлумачыць намеснік генеральнага дырэктара па вытворчасці ТАА «Аграсэрвіс-6» Андрэй Равуцкі. — З так званай першай хвалі атрымліваецца сабраць каля пяці тон шампіньёнаў. Далей работа з грунтам не канчаецца: багаты паліў, фаза росту і зноў — збор ўраджаю. На гэты раз ён не перавышае трох тон (60 % ад першай хвалі). Неабходнасць запуску трэцяй хвалі залежыць ад нашых патрэб і загружанасці цэхаў. Як правіла, яна прыносіць 20—25 % ад першага збору.

Сёння ў штаце 60 чалавек, але ў перспектыве колькасць спецыялістаў плануюць павялічыць да 110.


Крокі на шляху развіцця

У Астрашыцкім Гарадку адкрылі пасля рэканструкцыі амбулаторыю

Цяпер спецыялісты медустановы змогуць абслугоўваць не менш за 60 пацыентаў у дзень. Сама амбулаторыя разлічана на 6,5 тысячы чалавек, піша «Прысталічча».

Фота: prіstalіca.by

Намеснік старшыні Мінскага райвыканкама Уладзімір Юргевіч адзначыў, што гэта першы крок у рэалізацыі канцэпцыі развіцця Астрашыцкага Гарадка:

— Хутка тут адкрыецца лазня для мясцовых жыхароў і навакольных населеных пунктаў. З'явяцца камфартабельныя жылыя дамы, у планах — рамонт гідразбудаванняў.

Старшыня Мінскага раённага Савета дэпутатаў Юлія Бялянкіна звярнула ўвагу на тое, што адкрыццё медустановы такога рангу — знакавая падзея не толькі для Астрашыцкага Гарадка, але і для ўсяго Мінскага раёна:

— Для любога населенага пункта, асабліва ў сельскай мясцовасці, важныя наяўнасць паліклінікі і магчымасць для кожнага атрымаць першасную кваліфікаваную медыцынскую дапамогу. Таму адкрыццё амбулаторыі — доўгачаканая і радасная падзея.

У абноўленай паліклініцы будуць размяшчацца тры кабінеты ўрачоў агульнага прыёму, кабінет прыёму здаровага дзіцяці, прышчэпачны і працэдурны. Таксама ў рэгістратуры можна будзе запісацца і на прыём да фельчара, стаматолага, акушэра і ўрача-тэрапеўта. З навінак — увядзенне талоннай сістэмы. З'явілася і сучаснае медыцынскае абсталяванне: электракардыёграф, прыстасаванні для збору аналізаў, акушэрскае крэсла. Загадчык Астрашыцка-Гарадоцкай амбулаторыі Юлія Лупач паведаміла, што наяўнасць камп'ютараў з доступам у інтэрнэт дазволіць весці электронны дакументаабарот.

— Сучасны рамонт, добрая мэбля і абсталяванне — пацыентам будзе камфортна, — адзначае яна. — Хочацца падзякаваць усім, хто мае дачыненне да такога свята.

Наперадзе ў калектыва амбулаторыі прыемныя клопаты, звязаныя з наваселлем. Зараз дапамогу пацыентам будуць аказваць у сучаснай медустанове на сучасным узроўні.


Новая крама і рабочыя месцы

Працягваецца будаўніцтва вялікага гандлёвага аб'екта «Санта» ў Капылі.

Фота: kopyl.by

Аб'ект прыватнага ўнітарнага прадпрыемства «Санта рытэйл» па вуліцы Трактарнай у райцэнтры з кожным днём усё больш выразна набывае сваё аблічча. Як паведамляе раённая газета «Слава працы», хуткасць будаўніцтва аб'екта сапраўды вялікая: за непрацяглы час ўзведзены сцены і дах. Работы працягваюцца.

Дарэчы, гэты гандлёвы аб'ект агульнай плошчай больш за 400 квадратных метраў дазволіць забяспечыць тэмп росту рознічнага тавараабароту і стварыць новыя рабочыя месцы.


33 шматдзетныя сям'і атрымалі ключы ад кватэр

Адны ўжо паволі асвойваюцца ў новым доме па вуліцы Міру, што ў Крупках, і іншыя — у прыемных пошуках мэблі ды неабходных прадметаў інтэр'ера. Але ўсе без выключэння радуюцца таму, што набылі ўласнае жыллё.

Фота: krupkі.by

Журналісты раённай газеты «Крупскі веснік» адправіліся да навасёлаў. Калі коратка казаць аб іх уражаннях: шыкоўна! Усюды — блочная сістэма, у жыхароў дзвюх кватэр ёсць магчымасць паставіць на агульныя ўваходныя дзверы замок. Прасторныя пакоі. Кватэры, як той казаў, здадзены пад ключ — засяляйся і жыві. Прыгожыя шпалеры, ламінат, сучасныя ўваходныя і міжпакаёвыя дзверы, шклопакеты і зашклёныя лоджыі. У чатырохпакаёўках кватэрах — па два санвузлы, ванны пакой немалых памераў. І яшчэ адзін нюанс — прасторнае фае ў пад'ездзе.

Шумлівым кагалам, з пірагом і гарбатай у новую 3-пакаёвую кватэру ўбегла сям'я Захаравых. Дзяўчаткі па-гаспадарску асвойваюць пакоі.

— Тут будзе дзіцячы? — пытаюцца журналісты.

— Не, гэта гасцёўня. Хадзем, мы пакажам вам наш пакой. Зараз мама падыдзе. Яна дома з брацікам, ён яшчэ маленькі, яму ўсяго толькі дзесяць месяцаў.

Гаспадыню муж і дзеці сустрэлі кветкамі.

— Кватэру мы атрымалі нечакана, — расказваюць Андрэй і Надзея. — Калі гэты дом пачаў будавацца, у нас толькі-толькі нарадзілася трэцяе дзіця. Звярнуліся ў аддзел ЖКГ райвыканкама. Нам сказалі: «Збірайце ўсе неабходныя дакументы». Дзякуючы ўказу Прэзідэнта 95 % кошту жылля нам субсідавала дзяржава. Астатнюю суму ўжо заплацілі. І вось мы — гаспадары сваёй кватэры! Вядома ж, шчаслівыя. Калі будзем засяляцца? Як толькі купім мэблю.

Выбар рэдакцыі

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.

Калейдаскоп

Каля 150 спартсменаў-аматараў хочуць выступіць у «даеўрапейскіх гульнях»

Каля 150 спартсменаў-аматараў хочуць выступіць у «даеўрапейскіх гульнях»

Трэніроўкі і здымкі ўдзельнікаў пачнуцца ў красавіку.

Грамадства

Сувораўскае вучылішча вачыма яго навучэнцаў

Сувораўскае вучылішча вачыма яго навучэнцаў

Быць сувораўцам ва ўсе часы было прэстыжна.