Вы тут

Як былая дэпутатка ўзначаліла санаторый


Для любой краіны турысты — гэта дадатковы капітал, магчымасць развіцця канкрэтнай тэрыторыі. Бязвізавы рэжым робіць падарожжа ў Беларусь больш прывабным. На жаль, госці асядаюць у асноўным у буйных гарадах, дзе ёсць што паглядзець, куды схадзіць. Але і на перыферыі таксама пачынаюць набіраць абароты.


Напрыклад, летась Кіраўскі раён выканаў паказчык па экспарце турыстычных паслуг менавіта за кошт санаторыя. Цікава, што ўстанова з'яўляецца структурным падраздзяленнем ААТ «Світанак» імя К. Арлоўскага. А кіраўнік санаторыя, як той казаў, наш чалавек — вопытны дэпутат і намеснік старшыні райвыканкама па сацыяльных пытаннях у мінулым Вольга Гаршкова (на фота). Дарэчы, свае абавязкі начальніка аздараўленчай установы яна паспяхова спалучае са старшынёўствам у раённай арганізацыі грамадскага аб'яднання «Фонд міру». І гэта толькі станоўча адбіваецца на яе асноўнай дзейнасці. Што патрэбна турысту? Нешта ўбачыць, захапіцца і пажадаць вярнуцца. І кіраўніца добра ведае як гэта арганізаваць. Тым, хто ў гэтым бізнесе, напэўна, будзе карысна даведацца як.

— Мы наогул выгадна адрозніваемся ад іншых, бо маем цікавую гісторыю ўзнікнення, — кажа Вольга Гаршкова. — Наш санаторый, напэўна, адзіны ў Беларусі з'яўляецца структурным падраздзяленнем аграгаспадаркі. Яго будаваў для сваіх работнікаў легендарны Герой Савецкага Саюза і Герой Сацыялістычнай Працы Кірыла Пракопавіч Арлоўскі, той самы, пра якога зняты фільм «Старшыня» з Міхаілам Ульянавым у галоўнай ролі. Незвычайны быў чалавек, прафесіянал. Другі корпус, дзе цяпер знаходзяцца ўсе асноўныя памяшканні санаторыя, узводзіў яшчэ адзін наш таленавіты кіраўнік Васіль Канстанцінавіч Старавойтаў. Месцазнаходжанне санаторыя таксама знакавае. У ХІХ стагоддзі гэта быў цэнтр маёнтка, які належаў фон Гоеру. Захавалася нават яшчэ панская алея, дзе гуляюць нашы адпачывальнікі. За некалькі кіламетраў Жылічы, дзе знаходзіцца палац вядомых беларускіх магнатаў Булгакаў — там зараз ідзе рэканструкцыя. Але паглядзець ёсць што, і мы возім туды турыстаў. А яшчэ ў Мінск, Магілёў і Бабруйск. Але ж мы санаторый, і перш за ўсё і змагаемся за тое, каб кліент атрымаў поўны пералік паслуг, якіх сёння шмат.

Вельмі падабаецца людзям камернасць санаторыя — ён невялічкі, разлічаны ўсяго на 66 месцаў. У планах рэканструкцыя корпуса, які будаваў яшчэ Кірыла Арлоўскі. Плануецца зрабіць там віп-нумары і нумары для інвалідаў-калясачнікаў. Дабавіцца яшчэ каля 40 месцаў.

Здраўніца стала папулярнай у замежных турыстаў у 2013 годзе, пасля таго як прадстаўнікі санаторыя пабывалі на выстаўках і турыстычных кірмашах у Маскве, Санкт-Пецярбургу. Сёння тут прымаюць кліентаў з гэтых гарадоў, а таксама з Мурманска, Геленджыка, Ніжневартаўска, Ленінградскай вобласці і іншых. Сюды едуць турысты з Украіны, Германіі, Італіі, Казахстана, Эстоніі, Літвы, Латвіі.

— Мы шчыльна працуем з турыстычнымі фірмамі, расійскіх у спісе каля дванаццаці, — удакладняе суразмоўніца. — Летась больш за 50 % нашых гасцей прыехала з-за мяжы. Але мы захоўваем сваю прыналежнасць і не крыўдзім асноўнага нашага кліента — аграрніка. У снежні адпачывала група кіраўнікоў сельгаспрадпрыемстваў. Яны тут і аздараўляліся, і вучыліся — да іх прыязджалі чытаць лекцыі з Мінска, Беларускай сельгасакадэміі з Горак. Потым прыехалі адпачыць механізатары. У іх работа напружаная — і органы дыхання пакутуюць, і пазваночнік. А гэта якраз наш профіль. Падаграваем цікавасць тым, што прапануем нешта новае. Летась, напрыклад, пачалі практыкаваць так званае лячэбнае галаданне. Сёння гэта наша асаблівасць і запатрабаваная паслуга.

— Зараз мала дзе такое прапануюць, — удакладняе намеснік начальніка па медыцынскай частцы санаторыя Уладзімір Кавалеўскі. — Афіцыяльна паслуга называецца разгрузачная дыетычная тэрапія. Ёсць людзі, якія жадаюць схуднець, але дома ў іх нічога не атрымліваецца. Нядаўна былі госці з Прыбалтыкі, а да гэтага прыязджалі кліенты з Гродна, Мінска, Еўпаторыі, Ізраіля, ЗША. Наша справа толькі трымаць марку і арыентавацца на попыт.

Вадзім Брэжэзінскі, начальнік аддзела вучэбна-спартыўнай, арганізацыйнай і турыстычнай работы ўпраўлення спорту і турызму Магілёўскага аблвыканкама:

— Сёння на тэрыторыі Магілёўскай вобласці функцыянуе 56 гасцініц і аналагічных пляцовак размяшчэння, 21 дом паляўнічага і рыбалова, 209 суб'ектаў аграэкатурызму, 27 баз адпачынку, 236 аб'ектаў прыдарожнага сэрвісу, дзевяць санаторна-аздараўленчых устаноў, тры кемперныя пляцоўкі.

Варта адзначыць, што 89 % усяго экспарту турыстычных паслуг вобласці прыпадае на Бабруйск, Магілёў, а таксама Круглянскі, Кіраўскі і Горацкі раёны. Астатнімі васямнаццаццю раёнамі вобласці паказчык выконваецца толькі на 11 %. За апошнія пяць гадоў унёсак раёнаў у экспарт вырас. Калі ў 2012-м Магілёў і Бабруйск давалі 90 % экспарту, то цяпер — 75 %. Сярод асноўных валаўтваральных прадпрыемстваў вобласці значыцца і санаторый ААТ «Світанак» імя К. Арлоўскага.

Нэлі ЗІГУЛЯ

Загаловак у газеце: Турыст выбірае... дыету?

Выбар рэдакцыі

Грамадства

Як будзе праходзіць перапіс насельніцтва

Як будзе праходзіць перапіс насельніцтва

Старшыня Нацыянальнага статыстычнага камітэта Іна МЯДЗВЕДЗЕВА адзначае, што іх ведамства разлічвае перапісаць максімальную колькасць грамадзян з дапамогай укаранёных інавацый.

Грамадства

Адзіныя дзяўчаты-паркуршчыцы ў Беларусі распавядаюць пра свой спорт

Адзіныя дзяўчаты-паркуршчыцы ў Беларусі распавядаюць пра свой спорт

Гэты кірунак спорту ўвайшоў у жыццё былых студэнтак дзяржаўнага ўніверсітэта фізічнай культуры выпадкова.