Вы тут

У “Сяброў” з Нарвы – сябры на Смалявіччыне


На імпрэзе ў эстонскім горадзе, прысвечанай Дню Незалежнасці Беларусі, выступіць народны ансамбль песні “Плiса”


Кіраўніца “Сяброў” Л. Аннус (у цэнтры) з сябрамі з Смалявіцкага райвыканкама. Фота Віктара БАЙКАЧОВА

Звычайна май — насычаны для нас на падзеі месяц. Вось і сёлета, калі 2–4 мая ў Мінску праходзіла XXІІІ Міжнародная спецыялізаваная выстава “СМІ ў Беларусі”, мы на медыяфоруме прадстаўлялі Эстонію: па запрашэнні Упаўнаважанага па справах рэлігій і нацыянальнасцяў Леаніда Гулякі, пры спрыянні Амбасады Беларусі ў Эстоніі. Вырашылі ехаць загадзя, каб у горадзе Смалявічы, райцэнтры Міншчыны, зладзіць яшчэ адну важную справу.

Як вядома, Нарвскае беларускае таварыства “Сябры” за амаль 20 гадоў працы шмат зрабіла і прадаўжае рабіць для знаёмства гараджан, жыхароў Эстоніі з Беларуссю, беларускай культурнай спадчынай. Штогод “Сябры” ладзяць вялікія святы беларускай культуры, на іх запрашаем розныя творчыя гурты з Бацькаўшчыны. І шмат ужо спевакоў, ансамбляў з Беларусі выступала ў Нарве! Сёлета ў пачэсны спіс дадаецца цудоўны калектыў, з якім мы пазнаёміліся летась у верасні: народны ансамбль песні “Пліса” (націск на апошнім складзе!) з Акцябрскага Дома культуры Смалявіцкага раёна. Там дырэктар ДК і саліст “Плісы” — Алег Сёмін, а мастацкі кіраўнік гурта — Кастусь Герашчанка. (Падрабязней пра гурт — у тэксце «“Пліса” пачалася з “Раніцы”» Таццяны Усковай, ёсць у нэце. — Рэд.). На творчасць многіх ансамбляў Беларусі аказалі ўплыў мулявінскія “Песняры”, і “Пліса” — не выключэнне. Зрэшты, тут будзе лепш хоць адзін раз паслухаць сам гурт са сцэны. І такая магчымасць у нарвіцян будзе ўжо хутка!

Каб запрасіць да сябе артыстаў, мы правялі немалую “пісьмова-тэлефонную” працу. А 1 мая 2019 года ў незвычайнай, урачыстай абстаноўцы было падпісана Пагадненне аб супрацоўніцтве ў галіне культуры паміж аддзелам ідэалагічнай работы, культуры й па справах моладзі Смалявіцкага райвыканкама і Нарвскім беларускім таварыствам “Сябры”. Уявіце сабе: маёўка, прысвечаная святу Вясны й Працы — яна праходзіла ў фізкультурна-аздараўленчым комплексе паблізу аграгарадка Слабада Пекалінскага сельвыканкама. Там зладзілі летнюю сцэну — прама на ўзлеску. І на той сцэне ў прысутнасці старшыні Смалявіцкага райвыканкама Міхаіла Загорцава, яго намесніка Ігара Кузняцова й жыхароў раёна з беларускага боку дакумент падпісала Вікторыя Колісава (яна выконвае абавязкі начальніцы аддзела ідэалагічнай работы, культуры й па справах моладзі), з эстонскага — старшыня суполкі “Сябры” Людміла Аннус. І ўжо 6 ліпеня бягучага года ў плыні пагаднення і ў Нарве выступіць гурт “Пліса” — на імпрэзе ў гонар Дня Незалежнасці Беларусі. Як бачым, ні межы, ні адлегласці — не перашкода, каб сябраваць, пашыраць і паглыбляць беларуска-эстонскія культурныя стасункі.

Пасля Смалявічаў мы паехалі ў Мінск, дзе на выставе “СМІ ў Беларусі” сустракалі сваіх знаёмых — беларусаў Латвіі, знаёміліся з прадстаўнікамі Літвы, Украіны, Расіі. Як заўсёды, апарат Упаўнаважанага па справах рэлігій і нацыянальнасцяў меў свой стэнд на выставе, а для нас, беларусаў замежжа, зладзіў цікавую й насычаную праграму. Запомніцца надоўга паездка ў гарпасёлак Смілавічы Чэрвенскага раёна. Мы наведалі там музей “Прастора Хаіма Суціна” ў Цэнтры творчасці дзяцей і моладзі. Гэты мастак, што нарадзіўся ў беларускім мястэчку, стаў знакамітым у Парыжы, яго працы нароўні з творамі Марка Шагала вельмі цэняцца ў свеце вялікага мастацтва. Наведалі мы Палацава-паркавы комплекс Манюшкаў (а цяпер у свеце адзначаецца 200‑годдзе кампазітара Станіслава Манюшкі), а таксама Смілавіцкую валюшна-лямцавую фабрыку, на якой вырабляюць валёнкі, коўдры, падушкі. Далей была Свята-Георгіеўская царква і канцэрт навучэнцаў дзіцячай музычнай школы.

Асабліва плённай атрымалася наша сустрэча з Жаннай Раманоўскай, яна кіруе Цэнтрам беларускай культуры з латвійскага Даўгаўпілса. З ёй мы правялі папярэднія перамовы, намецілі сумесныя планы дзейнасці. Мяркуем, што беларусы Даўгаўпілса прыедуць у снежні ў Нарву: на 20‑я ўгодкі нарвскіх “Сяброў”. А наш гурт “Сябры” ў другі раз будзе ўдзельнікам “Беларускага кірмаша ў Даўгаўпілсе”.

Людміла Аннус, Віктар Байкачоў, Нарвскае беларускае таварыства “Сябры”

Ад рэдакцыі. Віншуем, “Сябры”! З падпісаннем Пагаднення аб супрацоўніцтве ў галіне культуры ў вас цяпер адкрываюца новыя магчымасці для супрацоўніцтва з Бацькаўшчынай. Пра тое, дарэчы, ёсць і каментар аднаго з чытачоў у Фэйсбуку, дзе Людміла і Віктар падалі невялічкую інфармацыю, фотаздымкі пра падзею. Просім звярнуць увагу таксама іншых кіраўнікоў беларускіх суполак замежжа: Пагадненне аб супрацоўніцтве ў галіне культуры — зусім не фармальнасць, а важны механізм у наладжванні плённага супрацоўніцтва беларусаў свету з Бацькаўшчынай. У прыватнасці, на сайце https://belarus21.by ёсць такія звесткі: “Па выніках рэалізацыі ў 2015 годзе праекта Упаўнаважанага па справах рэлігій і нацыянальнасцяў “Адміністрацыйны рэгіён Беларусі — арганізацыя суайчыннікаў за мяжой” у апарат Упаўнаважанага паступіла 25 матэрыялаў, у тым ліку ад адміністрацыйных рэгіёнаў Віцебскай вобласці — 8, Гродзенскай вобласці — 3, Мінскай вобласці — 1, Магілёўскай вобласці — 8, г. Мінска — 4, арганізацыі суайчыннікаў за мяжой — 1”. Вынікі такой супрацы падводзяцца штогод, найбольш актыўныя ўдзельнікі праекта — заахвочваюцца.

Выбар рэдакцыі

Хведар Чэрня. Сябра маёй вясны

Хведар Чэрня. Сябра маёй вясны

Радок на яго помніку спыняе і змушае задумацца.

Культура

Адэльск: турыстычная Мекка на прыграніччы

Адэльск: турыстычная Мекка на прыграніччы

Адэльск — унікальнае месца. Ціхая вёска на самым ускрайку заходняй мяжы становіцца з кожным годам усё больш знакамітай.

Грамадства

Як хутка людзі змогуць стаць менш агрэсіўнымі?

Як хутка людзі змогуць стаць менш агрэсіўнымі?

 Псіхолаг Раман Кручкоў упэўнены, што на самай справе агрэсія ўласціва ўсім людзям.  

Грамадства

Археалагічны комплекс «Бярэсце» стане першай пляцоўкай святкавання тысячагоддзя

Археалагічны комплекс «Бярэсце» стане першай пляцоўкай святкавання тысячагоддзя

Археалагічны музей «Бярэсце» і навакольная тэрыторыя перажываюць вялікае абнаўленне.