Вы тут

Новыя лекі стануць больш даступныя


Норма, якая дазволіць выкарыстоўваць арыгінальныя лекавыя сродкі да завяршэння клінічных выпрабаванняў, прапісана ў законапраекце, які ўчора разглядалі ў Палаце прадстаўнікоў.


Магчымасць умоўнай рэгістрацыі лекаў тэрмінам на адзін год прапануецца для высокаэфектыўных новых прэпаратаў для лячэння цяжкіх і рэдкіх хвароб. Такая практыка прымяняецца ў многіх краінах. Яе ўвядзенне ў нашай краіне абмяркоўваецца ў парламенце Беларусі. Новая норма прапісана ў праекце змяненняў Закона Рэспублікі Беларусь «Аб лекавых сродках», які быў учора прыняты ніжняй палатай у першым чытанні.

На думку намесніка старшыні Пастаяннай камісіі па ахове здароўя, фізічнай культуры і маладзёжнай палітыцы Аляксандра Старавойтава, законапраект аблегчыць даступнасць лекаў, якія толькі ўводзяцца на рынак.

Дзеючы закон працуе з 2006 года. «Новаўвядзенні трактуюцца як новая рэдакцыя закона, — пракаментаваў ён дакумент журналістам. — Унясенне змяненняў звязана з гарманізацыяй нашага заканадаўства ўнутры ЕАЭС. Акрамя таго, улічваючы планы Беларусі па ўступленні ў Сусветную гандлёвую арганізацыю, і ў выніку Пагаднення па гандлёвых аспектах правоў інтэлектуальнай уласнасці (TRІРS) у законапраекце прадугледжана абарона інтэлектуальнай уласнасці на арыгінальныя прэпараты на чатыры і два гады».

Да таго ж, праект закона замацоўвае існуючую (але дагэтуль не прапісаную) практыку продажу ўрачамі альбо фельчарамі лекаў сельскім жыхарам там, дзе няма аптэк.

Дэпутат ад Жыткавіцкай акругі Ірына Кралевіч спытала міністра аховы здароўя, які прадстаўляў законапраект у Авальнай зале Палаты прадстаўнікоў, ці не пацягне стварэнне адзінага рынку лекаў на тэрыторыі Еўразійскага эканамічнага саюза паслаблення кантролю за іх абаротам у Беларусі.

«Стварэнне адзінага рынку мае на ўвазе стварэнне і адзінага рэестра. Да таго ж, рэгістрацыя па Пратаколе ЕАЭС прадугледжвае паведамленне ўсім краінам-членам аб рэгістрацыі і яе абгрунтаванні. Акрамя таго, кожная партыя любога прэпарата, які трапляе ў краіну, падлягае ўваходнаму кантролю, — адказаў Уладзімір Каранік. — Гэта сістэма дзейнічае 15 гадоў, і не было зарэгістравана ніводнага выпадку ўвозу фальсіфікаваных лекавых сродкаў».

Апроч сказанага, міністэрства прапрацоўвае сістэму дадатковага кантролю за якасцю лекаў у выглядзе фармінспекцыі, якая будзе вымаць з аптэк і бальніц прэпараты і накіроўваць іх у сертыфікацыйную лабараторыю без указання вытворцы. Такім чынам, у выніку рэдакцыі дзеючага закона, кантроль за якасцю лекаў у краіне не будзе аслаблены, запэўніў міністр.

Адказваючы на пытанні журналістаў аб тым, чаму ў беларускіх аптэках знікаюць тыя або іншыя прэпараты, кіраўнік міністэрства растлумачыў: так адбываецца з-за таго, што фірмы не праводзяць паўторную рэгістрацыю лекаў, у якіх яны не зацікаўленыя. «Згодна з законапраектам, калі прэпарат зарэгістраваны, пяць гадоў прымяняецца ў нас і іншых краінах свету, праходзіць працэдуру перарэгістрацыі, то ўжо наступнае рэгістрацыйнае пасведчанне даецца бестэрмінова», — дадаў ён.

Уладзімір Каранік паведаміў, што міністэрства прааналізавала ўсе прэпараты, у якіх налета завяршаецца рэгістрацыя (такіх больш за 900). «Мы практычна па ўсіх гэтых пазіцыях прапрацавалі: нехта пацвердзіў паўторную рэгістрацыю, некага прыйшлося ўзмоцнена запрасіць на паўторную рэгістрацыю, недзе вырашаем пытанне замены пастаўшчыка, каб гэтыя прэпараты засталіся на рынку», — расказаў міністр.

Усяго ў першы дзень работы восеньскай, апошняй, сесіі Палаты прадстаўнікоў шостага склікання дэпутаты разгледзелі чатыры законапраекты ў першым чытанні, тры — у другім і ратыфікавалі сем міжнародных дакументаў.

Вольга МЯДЗВЕДЗЕВА

Выбар рэдакцыі

Спорт

«Людзі думаюць, што ўсёмагутныя і — разбіваюцца»

«Людзі думаюць, што ўсёмагутныя і — разбіваюцца»

Ці так небяспечны парашутны спорт, як здаецца на першы погляд?

Грамадства

Дзе знаходзяць падтрымку бацькі асаблівых малых?

Дзе знаходзяць падтрымку бацькі асаблівых малых?

Стаялі ў калідоры і ўспаміналі першыя крокі ў выхаванні сваіх асаблівых дзетак.

Культура

«Калі чалавецтва зноў паставіць перад сабой высокія пытанні, яно мяне ўспомніць»

«Калі чалавецтва зноў паставіць перад сабой высокія пытанні, яно мяне ўспомніць»

Пагутарылі з нявесткай вядомага ўраджэнца Віцебска Лазара Хідэкеля.