З 1 сакавіка ў большасці рэгіёнаў Беларусі (за выключэннем Віцебшчыны) уводзіцца забарона на лоўлю шчупака, якая будзе доўжыцца па 15 красавіка. У Віцебскай вобласці забарона будзе дзейнічаць з 9 сакавіка па 25 красавіка, паведамілі ў Дзяржаўнай інспекцыі аховы жывёльнага і расліннага свету.
Ахоўныя меры звязаны з пачаткам нерасту ў гэтага віду. Шчупак ідзе на яго раней за іншых вяснова-нерастуючых рыб, паколькі не такі патрабавальны да прагрэву вады, а часам нерастуе нават пад лёдам. Прэснаводны драпежнік вельмі важны для балансу іхціафаўны, ён з'яўляецца свайго кшталту рэгулятарам: знішчае малакаштоўную дробязь, хворых і аслабленых рыб, што спрыяе лепшаму росту каштоўных відаў і аздараўленню іх папуляцый.
Вылаў шчупака падчас нераставай забароны цягне сур'ёзную адказнасць. За кожную незаконна здабытую асобіну спаганяецца шкода ў патройным памеры — па дзевяць базавых велічынь (261 рубель). Таксама парушальніку можа быць прызначаны штраф у памеры да 30 базавых велічынь, згодна арт. 16.25 КаАП РБ (уступіць у сілу з 1 сакавіка 2021 года). Прычыненне шкоды на суму 100 і больш базавых велічынь цягне крымінальную адказнасць па арт. 281 КК РБ і яшчэ больш суровыя санкцыі.
За тыдзень да пачатку нераставай забароны на лоўлю шчупака інспектары Гомельскай вобласці разам з міліцыяй затрымалі шасцярых парушальнікаў на вадаёме каля вёскі Слабада Добрушскага раёна. Браканьеры лавілі рыбу забароненымі прыладамі — пяццю жакамі і восцямі. Ва ўлове аказалася 38 рыб, з іх — 34 асобіны шчупака. Ужо сёння кошт шкоды ад гэтай рыбалкі ацэньваецца ў 3,3 тысячы рублёў. А калі б парушальнікі папаліся ў перыяд забароны, толькі за шчупакоў ім давялося б заплаціць амаль 8,9 тысячы рублёў.
Сяргей РАСОЛЬКА
Фота з сайта Дзяржінспекцыі
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
