У Токіа ўжо тыдзень кіпяць алімпійскія жарсці. На жаль, пакуль ён не прынёс беларускім спартсменам медалёў. Але сутнасць Алімпійскіх гульняў у тым, што гэты форум заўсёды дорыць сенсацыі і таму сачыць за галоўнымі стартамі заўсёды цікава, незалежна ад пераваг. Чым запомніўся ўсяму свету першы тыдзень алімпіяды?
У японскую сталіцу беларускія дзюдаісты ехалі поўныя надзей і настроеныя на рашучую барацьбу. Але, нібыта, ў дрэнным кіно ўмяшаліся абставіны, якія не далі беларусам праявіць сябе. У першым паядынку супраць немца Карла-Ріхарда Мікіта Свірыд не проста прайграў, але і атрымаў сур’ёзную траўму рукі. «Алімпійскія гульні ў Токіа скончыліся для мяне на першым крузе шостай хвіліны схваткі ў той момант, калі выскачыў локаць, у выніку чаго прывяло да пералому рукі. Як гэта адбылося? На гэтае пытанне цяжка адказаць, мабыць, усё ж такі шчыльны графік спаборніцтваў, пераездаў, згонак вагі, усё разам прывяло да такой траўмы. Схватка была роўная, і я быў гатовы паказаць сваю лепшую барацьбу. Але локцевы сустаў выскачыў у самы непадыходзячы момант. Урачы ў бальніцы спрабавалі ўставіць локаць без анестэзіі на працягу трох гадзін, і толькі пасля ўколу яны змаглі гэта зрабіць. Што я адчуваў у гэты момант? Шокавы стан, пякельны боль і самае вялікае спусташэнне ў маім жыцці. Я ішоў да гэтай алімпіяды пяць гадоў і яшчэ на працягу трох гадоў праходзіў адбор, але ў мяне так нічога не выйшла... Усе мары разбітыя...», — падзяліўся Мікіта на сваёй старонцы ў Instagram.
Пасля гэтага ўсе надзеі ў дзюдо былі на Марыну Слуцкую. Беларуска паспяхова завяршыла першы раўнд, справіўшыся з прадстаўніцай Трынадада і Табага Габрыэлай Вуд, але далей саступіла Міджын Хан з Рэспублікі Карэя. Паводле інфармацыі прэс-службы Нацыянальнага алімпійскага камітэту, Марына таксама атрымала траўму рукі.
«Увесь алімпійскі цыкл рыхтаваліся да гэтых стартаў у Токіа. Праведзена каласальная работа з Леанідам Свірыдам. Здабытыя шмат перамог, шкада, што ў Японіі не атрымалася. У Мінску пройдзем дадатковае абследаванне пасля траўмы. Зараз трохі трэба аднавіцца псіхалагічна. Усе ведаюць, як я чакала гэтых стартаў, але... цяпер застаецца толькі падзякаваць, хто працуе са мной, хварэе за мяне», — адзначыла Марына прэс-службе НАК Беларусі.
Такім чынам, Беларусь страціла ўсе шанцы на алімпійскія медалі ў дзюдо.
Пакуль лідары беларускай каманды церпяць няўдачы, на авансцэну выйшлі тыя, ад каго не чакалі поспехаў. Як, напрыклад, лучніцы Карына Дзмёмінская, Ганна Марусава і Карына Казлоўская. Але на гэтым тыдні менавіта яны паказалі лепшы сярод беларусаў вынік — чацвёртае месца ў камандных спаборніцтвах. Упэўнена абышлі моцных кітаянак і рашучых японак і ўступілі толькі галоўным прэтэндэнтам на золата — спартсменкам з Паўднёвай Карэі, а потым і Германіі.
Здаецца, што злы рок суправаджае ў Токіа не толькі беларусаў, але і ўсіх тэнісных зорак. Адзін за адным з алімпіяды вылятаюць спартсмены, якія звычайна на сыходзяць з навінных стужак у якасці пераможцаў турніраў. У першым жа крузе прайграла лідар жаночага рэйтынгу аўстралійка Эшлі Барці. У матчы другога круга з алімпійскай дыстанцыі сышла трэцяя ракетка свету Арына Сабаленка. У 1/8 фіналу барацьбу скончыла Наомі Асака, якая запальвала алімпійскі агонь падчас цырымоніі адкрыцця.
У паўфінале адзіночнага разраду мужчынскага тура легендарны Новак Джокавіч прайграў расіяніну Аляксандру Звераву. Так разбілася яго мара сабраць Залаты шлем — стаць пераможцам чатырох турніраў Вялікага шлему і Алімпійскіх гульняў за адзін сезон.
Спаборніцтвы па спартыўнай гімнастыцы сталі трыумфам каманды Расіі. Спартсмены не стамляліся здзіўляць назіральнікаў. Усё пачалося з Артура Далаляна. За тры месяцы да алімпіяды ён парваў ахілава сухажылле, даволі распаўсюджаная ў спартыўных гімнастаў траўма і вельмі сур’ёзная. Насуперак медыкам, якія прагназавалі яму адсутнасць шанцаў на аднаўленне, спартсмен трэніраваўся нават у бальніцы. Да апошняга моманту трэнеры сцвярджалі, што ў Токіа Артур выступіць толькі на чатырох снарадах. І непастрэдна напярэдадні кваліфікацыі гімнаст заявіў, што зробіць усё, уключаючы небяспечныя для яго апорны скачок і вольныя практыкаванні.
Пасля Артур Далалян разам з Мікітам Нагорным, Давідам Бяляўскім і Дзянісам Аблязіным упершыню за 25 гадоў заваявалі для Расіі золата ў камандным мнагабор’і і спынілі гегемонію кітайцаў і японцаў у спартыўнай гімнастыцы. Пачынаючы з Алімпійскіх гульняў 2000 года японцы выйгравалі двойчы, кітайцы — тройчы. Каб разумець, наколькі гэта значная і драматычная перамога, варта адзначыць, што японцаў хлопцы апярэдзілі на 0,103 бала, а кітайцаў — на 0,606 бала.
Жаночая зборная Расіі па спартыўнай гімнастыцы таксама засталася ў ценю. Спачатку Ангеліна Мельнікава, Уладзіслава Уразава, Вікторыя Лістунова і Лілія Ахаімава зламалі баявы дух непераможнай Сімоны Байлс, якая пасля гэтай кваліфікацыі ўвогуле знялася з турніру. Дзяўчаты выйгралі золата ў камандным мнагабор’і, набраўшы 169,528 балаў. Гэта першая перамога Расіі ў камандным мнагабор’і пачынаючы з Алімпійскіх гульняў 1992 года. Варта адзначыць, што алімпіяда 1992 года была зорным часам Віталя Шчэрбы. Тады ў Барселоне ён стаў алімпійскім чэмпіёнам у камандным першынстве, шматбор’і, практыкаваннях на колах, кані, брусах і ў апорным скачку.
На гэтым тыдні завяршыліся спартыўныя кар’еры, вартыя не проста ўвагі, а захаплення. Гімнастцы Аксаны Чусавіцінай з Узбекістана — 46 гадоў, пісталетчыцы Ніно Салуквадзе з Грузіі — 52 гады. І ў Токіа яны прыехалі спаборнічаць. Цікавы факт, гэтыя спартсменкі выступалі на Алімпійскіх гульнях пад рознымі сцягамі. Ніно — пад савецкім у Сеуле 1988 года, у складзе Аб’яднанай каманды ў 1992 у Барселоне і, пачынаючы з 1996, пад грузінскім. Ніно — першая жанчына ў гісторыі сусветнага спорту, якая выступіла на дзевяці алімпіядах. Аксана Чусавіціна прыязджала ў алімпійскія сталіцы восем разоў. У складзе Аб’яднанай каманды ў 1992 годзе, у 2008 і 2012 гадах як прадстаўніца Германіі (у 2002 годзе сям’я спартсменкі пераехала ў Германію, каб лячыць сына, хворага на лейкемію), з 2013 года Аксана выступае за Узбекістан.
На гэтых Алімпійскіх гульнях вопыт Аксаны Чусавіцінай і Ніно Салуквадзе ім не дапамог нават выйсці ў фіналы спаборніцтваў. Так, у Токіа скончыліся дзве неверагодныя спартыўныя гісторыі. Якорь
У Токіа пачаліся спаборніцтвы па лёгкай атлетыцы, наперадзе турніры па мастацкай гімнастыцы, скачках на батуце, цяжкай атлетыцы. А значыць, парад алімпійскіх сенсацый працягнецца.
Валерыя СЦЯЦКО
Фота: НАК Беларусі
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
