Бадай, кожны гараджанін нашай краіны штотогод сутыкаецца з праблемай, як перажыць адключэнне гарачай вады. Але такія адключэнні — не проста капрыз камунальмікаў, гэта пытанне працаздольнасці Мінжылкамгаса сумесна з арганізацыямі Міністэрства энергетыкі. Каб якасць нашага жыцця ў халады, якія надыдуць, была на дастаткова высокім узроўні, многім ведамствам трэба дбайна падрыхтавацца летам...
Як заявіла намеснік начальніка ўпраўлення камунальнай гаспадаркі і энергетыкі — начальнік аддзела энергетыкі надзвычайных сітуацый Міністэрства жыллёва-камунальнай гаспадаркі Святлана Цімошкіна, узровень выканання падрыхтоўчых работ да ацяпляльнага сезона ў іх ведамстве ўжо складае каля 70 %. «Яшчэ ў красавіку 2022 года была падрыхтавана рабочая праграма па выкананні асноўных відаў работ падрыхтоўкі аб’ектаў ЖКГ да работы ў асенне-зімовы перыяд на 2022—2023 гады. У адпаведнасці з ёй мы і распачалі падрыхтоўку», — распавяла спецыяліст.
За першае паўгоддзе ў сістэме ЖКГ выкананы работы па выпрабаванні абсталявання амаль 2,5 тысячы кацельняў, 10,6 тысячы кіламетраў цеплавых сетак, прафесіянальны агляд абсталявання 2273 кацельняў і 1026 цэнтральных цеплавых пунктаў. Заменена 180,6 кіламетра цеплавых сетак. Таксама перакладзена 150,8 кіламетра сетак водазабеспячэння і 57,8 кіламетра сетак каналізацыі, адрамантавана 419 артэзіянскіх свідравін. Выкананы прафрэмонт сістэм ацяплення 29 тысяч жылых дамоў, 25 тысяч цеплавых пунктаў. У жылфондзе адрамантавана 225 тысяч пагонных метраў стыкаў сценавых панэляў і 538 тысяч квадратных метраў дахаў.
Поўная гатоўнасць жыллёва-камунальнай гаспадаркі да работы да маючага адбыцца асенне-зімовага перыяду будзе забяспечана ва ўстаноўленыя тэрміны, перакананая эксперт.
Святлана Цімошкіна адзначыла, што арганізацыі жыллёва-камунальнай гаспадаркі напярэдадні маючага адбыцца асенне-зімовага перыяду рыхтуюць не толькі цеплавую гаспадарку, але і водаправодна-каналізацыйны, а таксама жыллёвы фонд, які знаходзіцца на абслугоўванні арганізацый ЖКГ.
Паводле слоў Святланы Цімошынай, містэрствам ажыццяўляецца штотыднёвы кантроль па 13 асноўных паказчыках: замена і капрамонт катлоў, замена цеплавых сетак і стварэнне запасаў драўнянага паліва. Таксама праводзіцца прафілактычны рамонт сістэм ацяплення жылых дамоў, цеплавых пунктаў, рамонт стыкаў, дахаў і іншае. У гэты час ажыццяўляецца штомесячны кантроль па больш чым 60 паказчыках: работы па выпрабаванні абсталявання кацельняў цеплавых сетак і прафілактычны рамонт абсталявання кацельняў і цэнтральных цеплавых пунктаў, прафілактычны агляд рамонту водаправодных і каналізацыйных сетак і збудаванняў на іх, рамонт электраабсталявання жылых дамоў і печаў, паверка прыбораў уліку і гэтак далей.
Спецыяліст звярнула ўвагу на тое, што згаданыя мерапрыемствы гарантуюць надзейнае і бесперабойнае цеплаводазабеспячэнне жылога фонду, а таксама забеспячэнне функцыянавання ўсёй інфраструктуры гарадскіх і сельскіх населеных пунктаў у ацяпляльны перыяд.
Як адзначыў першы намеснік генеральнага дырэктара — галоўны інжынер «Дзяржэнергагазнагляда» Дзмітрый Ласянкоў, напярэдадні сезона будзе аформлена каля
30 тысяч пашпартоў гатоўнасці да ацяпляльнага перыяду і амаль 10,3 тысячы пашпартоў гатоўнасці ведамасных цеплакрыніц. Па стане на 15 ліпеня ўжо зарэгістравана 14 % пашпартоў гатоўнасці спажыўцоў і 10 % пашпартоў па цеплакрыніцах.
Калі браць арганізацыі жыллёва-камунальнай гаспадаркі, цяпер зарэгістравана ўжо больш за 5 % пашпартоў гатоўнасці спажыўцоў і 17 % па пашпартах гатоўнасці цеплакрыніц. «Мы ідзём наперадзе на некалькі працэнтаў у параўнанні з паказчыкамі мінулага года. Цяпер спецыялісты «Дзяржэнергагазнагляда» абследуюць паднаглядныя аб’екты па падрыхтоўцы да асенне-зімовага перыяду», — дадаў спецыяліст.
Пры абследаванні аб’ектаў ЖКГ асаблівая ўвага аддаецца кантролю за выкананнем работ па тэхнічным абслугоўванні, рамонце, выпрабаваннях абсталявання цеплавых сетак і інжынерных камунікацый. Акрамя таго, ацэньваецца працаздольнасць запорнай і рэгулюючай арматуры абсталявання і трубаправодаў, наяўнасць ізаляцыйнага пакрыцця на трубаправодах і іншым абсталяванні сістэм цепласпажывання і гарачага водазабеспячэння.
Асобна праводзіцца работа ў рамках падрыхтоўкі да асенне-зімовага перыяду па кантролі за аднаўленнем пашкоджаных кабельных ліній і спажывецкіх кабельных ліній, якія знаходзяцца на балансе суб’ектаў гаспадарання.
Энергетыкі да ацяпляльнага сезона замянілі больш за 76 кіламетраў цеплавых сетак. Першы намеснік генеральнага дырэктара — галоўны інжынер ДВА «Белэнерга» Уладзімір Баброў адзначыў, што аб’екты энергетыкі паспяхова рыхтуюцца да асенне-зімовага перыяду і абавязкова забяспечаць надзейнае электра- і цеплазабеспячэнне спажыўцоў сваей краіны.
Ён, у прыватнасці, звярнуў увагу на тое, што падведамасныя арганізацыі гатовыя да любога развіцця сітуацыі. Так, завяршаюцца работы па стварэнні запасаў топачнага мазуту; плануецца нарыхтаваць 300 тысяч тон гэтага паліва.
— Сёння у нашых рэзервуарах захоўваецца больш за 270 тысяч тон мазуту. Ён забяспечвае рэзервовае выкарыстанне паліва ў выпадку якіх-небудзь абмежаванняў альбо сітуацый з прыродным газам, што выкарыстоўваецца як асноўнае паліва. Рэалізоўваецца план па папярэджанні розных надзвычайных сітуацый (пажараў і іншых), які ўключае 51 мерапрыемства. Камісіямі ўжо правераны сістэмы пажарнай аўтаматыкі, дымавыдалення, аб’екты супрацьпажарнага водазабеспячэння, каб усё гэта працавала як мае быць», — сказаў прадстаўнік «Белэнерга».
Работы па падрыхтоўцы да асенне-зімовага перыяду выконваюцца ў адпаведнасці з зацверджанымі графікамі, адзначыў ён. У цэлым па краіне капітальны рамонт павінен прайсці на больш чым 20 энергетычных катлах, 14 турбінах, 6 вадагрэйных і 4 паравых катлах. Таксама рыхтуецца да работы ў перыяд халадоў і электратэхнічнае абсталяванне. Усяго запланаваны капітальны рамонт 20 генератараў, 10 сілавых трансфарматараў, а таксама комплексны рамонт 169 падстанцый напружаннем 35-110 кВ. Работы вядуцца і на лініях электраперадачы — амаль 10 тысяч кіламетраў ЛЭП ужо капітальна адрамантаваная, а гэта 43 % ад гадавога плана.
Да маючага адбыцца асенне-зімовага перыяду сфарміравана 1,4 тысячы падраздзяленняў для выканання аварыйна-аднаўленчых работ агульнай колькасцю больш за 7 тысяч чалавек. Яны ў поўным аб’ёме ўкамплектаваны сродкамі аховы, неабходнымі матэрыяламі і інструментамі. На балансе энергазабеспячальных арганізацый знаходзіцца 186 дызельных электрастанцый. Адпрацаваны парадак дзеянняў аператыўных груп ва ўмовах узнікнення парушэнняў энергазабеспячэння з-за нізкіх тэмператур. Праводзяцца проціаварыйныя трэніроўкі.
Газазабеспячальныя арганізацыі праверылі тэхнічны стан 388 тысяч адзінак абсталявання напярэдадні ацяпляльнага сезона, рассказаў падчас прэс-канферэнцыі намеснік генеральнага дырэктара ДВА «Белпалівагаз» Дзмітрый Шаўлоўскі.
На самай справе, штогод «Белпалівагаз» распрацоўвае комплексы мерапрыемстваў і задач, гэтым разам — на 2022—2023 гады, у якім улічаны ўсе пытанні папярэдняга ацяпляльнага сезона. «Цяпер ідзе планамерная работа камісіі па кантролі і ўліку мерапрыемстваў, якія выконваюцца, па падрыхтоўцы да ацяпляльнага перыяду. Па рамонце і рэканструкцыі абсталявання газаразмеркавальных сетак і газавыкарыстальнага абсталявання за 6 месяцаў 2022-га праведзены праверкі тэхнічнага стану амаль 400 тысяч адзінак абсталявання», — заўважыў Дзмітрый Шаўлоўскі.
Сёлета таксама праведзена адключэнне газавыкарыстальнага абсталявання з арганізаваным адводам прадуктаў згарання ў 4,4 тысячы кватэр. У 43 % выпадкаў прычына адключэння — парушэнне правілаў карыстання газам у быце, 11 % — адсутнасць акта праверкі тэхнічнага стану і толькі 5 % — няспраўнасць дымавых і вентыляцыйных каналаў.
Па рамонце і замене асноўнага абсталявання на газаразмеркавальнай сістэме ўсе работы выконваюцца ў планавым аб’ёме і праблем не назіраецца, адзначыў спецыяліст. Што датычыцца прадпрыемстваў, якія займаюцца пастаўкай цеплавой энергіі ў пэўных аб’ёмах па населеных пунктах, то па катлах, артэзіянскіх свідравінах, рамонце цеплаабменнікаў, трансфарматараў, ліній электраперадачы, цеплавых камер і цеплавых сетак работы таксама вядуцца ў планавым парадку, ужо выканана 70 % ад запланаванага аб’ёму. Па забеспячэнні тарфяной паліўнай прадукцыі за першае паўгоддзе 2022 года аб’ём вытворчасці тарфяных брыкетаў склаў 394 тысяч тон, што складае 110 % да плана і 111 % да аналагічнага перыяду мінулага года.
Па словах намесніка дырэктара, запланавана вырабіць 1,29 мільёна тон паліўнай прадукцыі, што на 9 % перавышае паказчыкі аналагічнага перыяду мінулага года. «Усе прадпрыемствы «Белпалівагаза» будуць гатовыя да ацяпляльнага сезона 2022—2023 гадоў», — дадаў Дзмітрый Шаўлоўскі.
Вернемся да адключэння гарачай вады. Як адзначыла Святлана Цімошкіна, літаральна яшчэ да 2021 года ў нас у краіне тэрміны адключэння гарачай вады складалі 14 дзён. 3 прыняццем новай рэдакцыі Правілаў цеплазабеспячэння яны скараціліся да 13 дзён. У працэсе падрыхтоўкі дакумента (правілаў) абмяркоўвалася пытанне скарачэння работ да 10 дзён, але не было падтрымана ў тым ліку калегамі камунальнікаў з энергетыкі, улічваючы вялікі аб’ём работ, які неабходна выканаць.
Прадстаўнік Мінжылкамгаса дадала, што працягласць адключэння гарачай вады звязаная з тэхналагічным працэсам. Спачатку яе астуджваюць і зліваюць з труб, потым выконваюць неабходныя па рэгламенце работы, a потым зноў напаўняюць трубы і награваюць ваду.
«Адключэнне не залежыць ад кагосьці аднаго. Мы выконваем комплексны падыход: сумяшчаем работы як энергетычных службаў, так і камунальных, якія ажыццяўляюць праверку і настройку свайго абсталявання, што забяспечвае функцыянаванне сістэм ацяплення», — пацвердзіў словы калегі першы намеснік генеральнага дырэктара — галоўны інжынер ДВА «Белэнерга» Уладзімір Баброў.
Энергетыкі ў гэты час у тым ліку мяняюць цепласеткі, шукаюць найбольш уразлівыя ўчасткі і перакладваюць трубы там, а яшчэ робяць планавую замену старых. Уладзімір Баброў расказаў, што падчас адключэння гарачай вады праводзіцца праверка труб на цэласнасць пры дапамозе высокага ціску, потым робіцца праверка ўсіх выкананых работ, запаўненне труб і падключэнне. «У пачатку 2000-х мы і на 21 дзень адключалі, і на месяц», — нагадаў спецыяліст.
Сяргей КУРКАЧ
Прэв’ю: БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
