Маладзёжны велапрабег, прымеркаваны да Дня народнага адзінства, адбудзецца 10 верасня ўздоўж Дняпроўска-Бугскага канала ў Пінскім раёне, паведамілі карэспандэнту «Звязды» ў аддзеле ідэалагічнай работы і па справах моладзі райвыканкама.
Маршрут велапрабегу працягласцю 35 км закальцаваны вакол знакавых аб'ектаў канала і праляжа праз вёскі Дамашыцы, Жытновічы, Ізін, Стаховічы. На шляху яго ўдзельнікаў сустрэнуцца дзве паромныя пераправы, рэліктавы дубовы лес і самыя маляўнічыя мясціны Пінскага раёна.
Дняпроўска-Бугскі канал — адна са славутасцяў Пінскага раёна. Пасля ўз'яднання Заходняй і Усходняй Беларусі, устанаўлення савецкай улады, у 1940 годзе была праведзена грандыёзная рэканструкцыя канала. Па ім пайшлі караваны судоў на Брэст, Мазыр, Гомель, Кіеў, сталі курсіраваць таварныя і пасажырскія параходы. Па сутнасці, рачным шляхам звязалі Піншчыну з Усходняй Беларуссю. Таму напярэдадні Дня народнага адзінства ўдзельнікі велапрабегу захацелі праехаць па знакавых мясцінах, аддаючы даніну памяці і павагі тым рабочым, якія аднаўлялі канал.
Мерапрыемства разлічана ў асноўным на моладзь. Але ў ім могуць прыняць удзел усе ахвотныя — аматары актыўнага адпачынку, у тым ліку з іншых раёнаў. Велапрабег не мае спартыўных мэт, а носіць больш экскурсійна-пазнавальны характар і накіраваны на павышэнне турыстычнай прывабнасці рэгіёна.
З велапрабегу ў Пінскім раёне стартуе Тыдзень народнага адзінства, падчас якога таксама запланаваны маладзёжны форум, аўтапрабег, выставы і іншыя мерапрыемствы.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
