У Мінску прайшоў I Нацыянальны конкурс таленту, інтэлекту і прыгажосці «Міс і Містэр Студэнцтва Рэспублікі Беларусь — 2023»

Першы нацыянальны конкурс таленту, інтэлекту і прыгажосці «Міс і Містэр Студэнцтва Рэспублікі Беларусь — 2023» прайшоў 20 чэрвеня ў канцэртнай зале Prime Hall пад слоганам: «Нараджэнне новай эры: гармонія ў кожным з нас».

За перамогу ў конкурсе змагаліся 22 фіналісты: пераможцы абласных і Мінскага гарадскога тураў праекта. Удзельнікаў чакалі разнапланавыя конкурсы, якія ў поўнай меры раскрывалі іх харызму, таленты і інтэлект. Так, творчыя нумары здзіўлялі сваёй яркасцю і запальнасцю. Сваё ўменне даносіць думкі да аўдыторыі ў поўнай меры можна было прадэманстраваць у конкурсе красамоўства, у якім трэба было даць відэа-спіч на тэму «Нараджэнне новай эры ў кожным». А упэўненасць у сабе і прафесіяналізм у розных канцэптуальных дэфіле.

Трэба адзначыць, што шоу «Міс і Містэр Студэнцтва» з’яўляецца рэбрэндынгам папулярнага конкурсу «Каралева студэнцтва Беларусі» (раней «Каралева Вясна»). Дзякуючы змене фармату, колькасць удзельнікаў павялічылася больш як у два разы. Адборачныя туры конкурсу адбыліся ў лютым — красавіку бягучага года ў 42 установах вышэйшай адукацыі з удзелам больш за 600 прэтэндэнтаў. Таксама гэты конкурс з’яўляецца нацыянальным адборам для ўдзелу прадстаўнікоў Беларусі ў Міжнародным конкурсе інтэлекту, таленту і прыгажосці «Міс і Містэр Студэнцтва».

Па выннікам конкурсу таленту, інтэлекту і прыгажосці тытулы Міс і Містэр Студэнцтва Рэспублікі Беларусь атрымалі студэнтка БДУ Анастасія Сіротка і студэнт БДАА Данііл Баброўскі. Першая віцэ-Міс і Першы віцэ-Містэр сталі студэнтка ГрДМУ Вікторыя Абрамава і студэнт АМУС Ягор Стэльмакоў адпаведна. Тытулу Другая віцэ-Міс і Другі віцэ-Містэр былі ўдастоены студэнтка ВДТУ Ганна Краўцова і студэнт ГрГу імя Янкі Купалы Арцём Камінскі.

Арганізатарамі мерапрыемства выступіў Беларускі рэспубліканскі саюз моладзі пры падтрымцы Міністэрства адукацыі Беларусі і Нацыянальнай школы прыгажосці.

Лізавета ГОЛАД

Фота аўтара