Сёння ў Кітаі адзначаюць Дуаньу — свята драконавых лодак, перадае «Жэньмінь жыбаа» анлайн».
З гэтай нагоды ў Паднябеснай трохдзённыя вакацыі. Дуаньу таксама называюць «двайной пяцёркай», паколькі штогод яго адзначаюць на пяты дзень пятага месяца па месяцовым календары. З набліжэннем свята жыхары па ўсёй краіне пачалі рыхтаваць цзунцзы — страву з клейкага рысу ў лісці бамбука або трыснёга. Асноўныя інгрэдыенты — клейкі рыс і начынне, якое загорнута ў лісце. У сувязі з рознымі харчовымі звычкамі паўночныя кітайцы аддаюць перавагу цзунцзы з салодкім начыннем, а паўднёўцы — з салёным. У апошнія некалькі гадоў асаблівай папулярнасцю сярод маладых кітайцаў карыстаюцца цзунцзы са змяшаным начыннем, у тым ліку з дабаўленнем сыру.
Святы Дуаньу, Чуньцзэ (свята Вясны), Цынмін (Дзень памінання памерлых) і Чжунцю (свята Сярэдзіны восені) з’яўляюцца чатырма традыцыйнымі святамі Кітая. Культура Дуаньу аказала шырокі ўплыў на ўвесь свет — у розных краінах і раёнах праходзяць шматлікія тэматычныя мерапрыемствы. У верасні 2009 года ЮНЕСКА афіцыйна адобрыла ўнясенне гэтага свята ў «Спіс нематэрыяльнай культурнай спадчыны чалавецтва». Такім чынам, свята Дуаньу стала першым кітайскім фестывалем, які трапіў у гэты спіс. Акрамя падрыхтоўкі цзунзцы, у гэты перыяд таксама праводзяцца гонкі на драконавых лодках, развешваюцца лекавыя травы, людзі носяць мяшочкі з араматычнымі рэчывамі і пяцікаляровыя ніткі з натуральнага шоўку.
Напярэдадні ў правінцыі Хунань (Цэнтральны Кітай) на ваду спусцілі дзіўную лодку. Гэта адзіная ў сваім родзе лодка-дракон «лунчжоў» даўжынёй 99,9 метра, якую адрознівае від веславання. У адрозненне ад звычайных «лунчжоў», у гэтай лодцы весляры размяшчаюцца ў чатыры шэрагі: два шэрагі веслуюць седзячы, два другія — стоячы. У ёй размяшчаюцца 420 весляроў. У 2016 годзе лодка-дракон «лунчжоў» з чатырма радамі вёслаў увайшла ў спіс аб’ектаў нематэрыяльнай культурнай спадчыны правінцыі Хунань. Падчас Дуаньу паўсюль ладзяць гонкі на драконавых лодках, так што стометровы «лунчжоў» правераць на спаборніцтвах.
Мікалай ЛІТВІНАЎ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».