У Кітаі абвешчана «аранжавае» папярэджанне ў сувязі з магчымымі геалагічнымі бедствамі

Улады Кітая абвясцілі папярэджанне «аранжавага» ўзроўню ў сувязі з магчымымі геалагічнымі бедствамі, выкліканымі дажджамі на паўднёвым захадзе краіны, перадае «Жэньмінь жыбаа» анлайн».

Міністэрства прыродных рэсурсаў КНР і Кітайскае метэаралагічнае ўпраўленне папярэдзілі аб рызыцы выкліканых дажджамі стыхійных бедстваў геалагічнага характару ў цэнтральнай частцы горада цэнтральнага падпарадкавання Чунцын (Паўднёва-Заходні Кітай). Да слова, гэта найбуйнейшы па колькасці насельніцтва мегаполіс у свеце.

Ведамствы таксама аб’явілі папярэджанне «жоўтага» ўзроўню з-за рызыкі такіх стыхійных бедстваў у асобных раёнах аўтаномнага раёна Унутраная Манголія, правінцый Ляанін, Цзілінь, Хубэй, Гуйчжоў, Юньнань, Шэньсі і горада Чунцын. Мясцовым жыхарам рэкамендавана прыняць меры засцярогі, асабліва ў тых раёнах, дзе існуюць схаваныя небяспекі.

Як вядома, у Кітаі дзейнічае чатырохузроўневая сістэма папярэджанняў аб геалагічных бедствах з каляровай кадзіроўкай, у якой найвышэйшы ўзровень небяспекі пазначаецца чырвоным колерам, за ім ідуць аранжавы, жоўты і сіні.

Таксама стала вядома, што Дзяржаўны камітэт па памяншэнні страт ад стыхійных бедстваў і Міністэрства па кіраванні надзвычайнымі сітуацыямі КНР сумесна задзейнічалі ў Чунцыне рэжым экстраннага рэагавання чацвёртага ўзроўню ў сувязі з паводкамі і геалагічнымі бедствамі. Туды накіравалі рабочую групу, якая правядзе ацэнку сітуацыі і будзе каардынаваць і падтрымліваць работу па аказанні дапамогі мясцовым жыхарам, закранутым стыхійнымі бедствамі.

З 3 ліпеня на большасць раёнаў Чунцына абрынуліся залевы, у выніку чаго ўзровень вады ў сямі рэках горада падняўся вышэй за небяспечную адзнаку. У выніку залеваў загінулі 15 чалавек, чацвёра прапалі без звестак. У мегаполісе ўведзены рэжым экстранага рэагавання на паводкі чацвёртага ўзроўню.

Мікалай ЛІТВІНАЎ