«Жаночая сіла: змяняць, ствараючы». Кацярына Старавойтава: З дзецьмі развіваешся рознабакова

Ёй цікава, чым займаюцца яе дзеці, што адчуваюць. Не кантраляваць іх па дробязях, а выбудоўваць такія адносіны, каб нашчадкі самі захацелі падзяліцца сваімі хваляваннямі і радасцямі — правіла Кацярыны Старавойтавай, пераможцы рэспубліканскага конкурсу «Жанчына года — 2022» у намінацыі «Мацярынская слава».

Наша гутарка з Кацярынай Васільеўнай адбылася ў парку Горкага ў Мінску, дзе праходзіла свята, прымеркаванае да Дню абароны дзяцей. Малодшыя Старавойтавы, Арыяна і Арцём, весяліліся, елі марожанае, каталіся на атракцыёнах, — атрымлівалі асалоду ад летняга дня, калі ўсё цудоўна і мама побач. Гледзячы на сваіх гарэзаў, Кацярына Васільеўна шчасліва ўсміхалася. 

«Быць сябрамі сваім дзецям»

У сям’і Старавойтавых пануе атмасфера цеплыні і даверу. Усе дзеці добра ладзяць паміж сабой, а старэйшыя дапамагаюць выхоўваць малодшых. 

— Лічу, бацькі павінны быць сябрамі сваім дзецям, але пры гэтым не губляць аўтарытэту, — дзеліцца сваімі педагагічнымі прынцыпамі Кацярына Васільеўна. 

Старэйшая дачка, Ганна, скончыла Інстытут бізнесу БДУ, атрымала прафесію менеджара-эканаміста. Антон хутка скончыць навучанне ў БДУФК па спецыяльнасці «Турызм і гасціннасць». 

— Гатаваць смачныя стравы, прыдумваць новыя рэцэпты — яго захапленне, — расказвае маці. — Цяпер сын атрымлівае добрую практыку, працуючы поварам у школьнай сталовай. 

Сярэдняя дачка, Ангеліна, яшчэ шукае сябе. Ёй падабаюцца танцы, ігра на гітары. Зараз дзяўчына трэніруецца ў секцыі каратэ і цікавіцца культурай папулярнага сучаснага танцавальнага напрамку K-POP. 

— Іван у нас самы кампанейскі, душа калектыву, з адкрытым сэрцам, — усміхаецца Кацярына Васільеўна. — Я нават трошкі хвалююся за такую яго даверлівасць. Вельмі актыўны, займаецца тайскім боксам, любіць гуляць у футбол.

Другакласніца Арыяна таксама часу дарма не губляе. Дзень у здольнай, крыху сарамлівай дзяўчынкі распісаны: урокі, наведванне лагапеда, танцы, дадатковыя заняткі па чытанні, басейн. 

— Самы маленькі — жэўжык Арцём. Пакуль ён застанецца ў садку. Лічу, псіхалагічны ўзрост дзіцяці павінен адпавядаць школе. Дзяцінства пры магчымасці трэба працягнуць, бо цёплыя ўспаміны пра яго вельмі важныя ў далейшым жыцці, — тлумачыць шматдзетная маці. 

«Заўсёды адчуваю сябе маладой»

— У юнацтве не думала, што ў мяне будзе вялікая сям’я, — дзеліцца Кацярына Васільеўна. — Марыла стаць дыпламатам, кар’ера была на першым месцы. 

Аднак аднойчы на трэніроўцы яна сустрэла сваё каханне. З таго часу яны з Віталём разам. Ажаніліся ў 22 гады. Неўзабаве ў сям’і з’явілася Ганна. 

— А вось Антон нарадзіўся ў цяжкім стане, нават ляжаў у рэанімацыі. Некаторы час пасля гэтага баялася заводзіць дзяцей. Але лёс склаўся так, што ў нас з’явілася Ангеліна. Мацярынства ў 22 гады і пасля 30 адрозніваецца кардынальна! Спакайней ставішся да многага, набіраешся вопыту. Таму пазней мы ўжо вельмі хацелі вялікую сям’ю. Сярод плюсаў шматдзетнасці — ты пастаянна развіваешся рознабакова. Я, напрыклад, заўсёды адчуваю сябе маладой. 

Аб чым марыць Кацярына Старавойтава? Каб яе дзеці былі прыстасаваныя да жыцця і знайшлі ў ім сваё месца. 

— Я люблю іх і заўжды ім дапамагу, але і пра сябе забываць жанчына ў вялікай сям’і не павінна, — кажа шматдзетная маці. 

«Без любімай працы сябе не ўяўляю»

У парку да Кацярыны Васільеўны часта падыходзілі жанчыны, віталіся. 

— Ведаю ўсіх маці ў нашай арганізацыі, цікаўлюся іх жыццём, дапамагаю, — тлумачыць яна. 

Першамайская раённая арганізацыя г. Мінска ГА «Беларуская асацыяцыя шматдзетных бацькоў», якую ўзначальвае Кацярына Старавойтава, таксама падрыхтавала падарункі дзецям да Дню абароны дзяцей. 

— Падарункі ў нас не толькі ў святочныя дні, — расказвае Кацярына Васільеўна. — Дапамагаем тым, хто мае ў гэтым патрэбу. Дорым кнігі, адзенне, іншыя рэчы. Напрыклад, камусьці тэрмінова спатрэбілася каляска — шукаем. 

Шматдзетныя маці з арганізацыі сустракаюцца і за кубачкам гарбаты. Абмяркоўваюць прынцыпы выхавання дзяцей, псіхалогію падлеткаў, іншыя тэмы. Ды і проста разам адпачываюць. 

— Мне вельмі падабаецца размаўляць з людзьмі, дапамагаць ім, — дзеліцца Кацярына Старавойтава. — Не магу сядзець на адным месцы, мне абавязкова трэба штосьці рабіць. Рада, што магу сумяшчаць любімую працу і сям’ю. 

У Першамайскую раённую арганізацыю Кацярыну Васільеўну запрасіла жанчына — шматдзетная маці, па прафесіі маляр; яна рабіла рамонт у кватэры Старавойтавых. 

— Пасля нараджэння Ангеліны вырашыла паспрабаваць і прыйшла. Праз некалькі месяцаў мне прапанавалі стаць старшынёй арганізацыі. Спачатку сумнявалася, ці здолею, але ўрэшце пагадзілася. З таго часу прайшло 12 гадоў. Без любімай працы сябе не ўяўляю, — рэзюмуе Кацярына Васільеўна, якая гарманічна спалучае важную для грамадства справу і мацярынства з яго нястомнымі клопатамі. 

«Маю перамогу святкавалі ўсёй сям’ёй»

— Узнагароджанне пераможцаў рэспубліканскага конкурсу «Жанчына года — 2022» праходзіла ў Мінску, у храме-помніку ў гонар Усіх Святых і ў памяць аб ахвярах, якія выратаванню Айчыны нашай паслужылі, — успамінае Кацярына Васільеўна. — Гэта неверагоднае месца: перад урачыстай цырымоніяй для нас арганізавалі экскурсію, ад якой я была ў захапленні. Абавязкова прыеду яшчэ раз туды разам з дзецьмі! Я была вельмі шчаслівая, калі аб’явілі маё прозвішча! Перамогу святкавалі ўсёй сям’ёй. Я спякла торт «Напалеон». Вельмі ганаруся сабой! 

Сёлета да Дню маці арганізацыя шматдзетных бацькоў плануе правесці творчы конкурс для жанчын, якія захапляюцца маляваннем, умеюць шыць, вязаць. Амаль усе шматдзетныя маці — выдатныя рукадзельніцы. І наша гераіня не выключэнне. «Абавязкова буду ўдзельнічаць у конкурсе!» — усміхаецца Кацярына Старавойтава. 

Дом, у якім усім цёпла і ўтульна

Арыяна з Арцёмам хочуць пакатацца на каруселі. Кацярына Васільеўна правярае, каб дзеці былі добра прышпіленыя. Колькі захаплення ў іх вачах! 

— Мама, можна, мы вунь там пабегаем? — пасля атракцыёна запытваецца ў маці Шустрык (так у сям’і ласкава называюць Арцёма). 

Кацярына Васільеўна дазваляе: дзяцінства павінна быць шчодрым на забавы і радасці. 

— Мне 47 гадоў, а я і зараз з цеплынёй успамінаю тыя гады: лета ў вёсцы, гульні на свежым паветры, бабуліну ласку. 

Калісьці менавіта бабуля навучыла яе гатаваць, вязаць, спраўляцца з ніткай і іголкай. 

— Дзеці часта прыводзяць да нас сваіх сяброў. Я цудоўна пяку: піцу, розныя пірагі, печыва. Вельмі люблю прымаць гасцей! 

Акрамя рукадзелля і гатавання смачных страў, шматдзетная маці захапляецца вырошчваннем кветак. Адных півоняў у яе больш за 35 сартоў! Летам ў яе абавязковай «праграме» — агарод і кветкі.

Неад’емная частка раскладу дня — клопат пра хатніх гадаванцаў. У Старавойтавых ёсць сабака, дзве кошкі з кацянятамі і кот.

Разам сям’я любіць ездзіць у вёску, гатаваць шашлыкі, хадзіць на рыбалку. А яшчэ — гуляць у настольныя гульні. 

— Калі вечарам усе збіраюцца разам, у доме не сціхае «мама-мама», — з пяшчотай кажа Кацярына Васільеўна. 

А ўвогуле, кожны дзень у гэтай шчаслівай сям’і праходзіць па-рознаму і незабыўна!

Юлія РАМАНЬКОВА

Праект створаны пры фінансавай падтрымцы ў адпаведнасці з Указам Прэзідэнта № 131 ад 31 сакавіка 2022 года.