Удзельнікі гомельскіх студэнцкіх сэрвісных атрадаў атрымалі запрашэнне на працу ва Усерасійскі дзіцячы цэнтр «Арляня» і дзіцячы санаторна-аздараўленчы лагер «Марская хваля», што ў Туапсінскім раёне Краснадарскага краю. Студатрады, якія накіроўваюцца на працу ў Расійскую Федэрацыю, сфармаваныя з ліку студэнтаў ВНУ і навучэнцаў сярэдне спецыяльнай адукацыі.
З Гомельшчыны ў «працоўнае лета» накіраваліся 50 байцоў. Гэта лепшыя студэнты і навучэнцы, якія выдатна праявілі сябе ў вучобе і ўдзеле у культурна-масавых і спартыўных мерапрыемствах, арганізаваных Беларускім рэспубліканскім саюзам моладзі. Каб трапіць у студатрады, юнакам і дзяўчатам прадстаяла датэрмінова здаць сесію, вывучыць асновы аховы працы і працоўнага права, прайсці медыцынскую камісію. Сёлета працоўная вахта для байцоў студатрадаў ва Усерасійскім дзіцячым цэнтры «Арляня» і дзіцячым санаторна-аздараўленчым лагеры «Марская хваля» працягнецца да канца жніўня.
Сярод тых, хто адпраўляецца на вахту, — малады спецыяліст, педагог-арганізатар Гомельскага дзяржаўнага каледжа кулінарыі. Ліліяна Аб’язднова распавяла, што не толькі ў першы раз будзе працаваць у саставе сэрвіснага атрада, але і ўпершыню пабывае на моры.
— Многага чакаю ад гэтай паездкі і спадзяюся, што ўсё атрымаецца. Гэта магчымасць адпачыць, знайсці новых сяброў і, што вельмі важна, аздаравіцца на моры. Жадаю ўсім нам папрацаваць як мае быць і крута адпачыць, — падзялілася баец сэрвіснага студэнцкага атрада.
Дзяўчына накіроўваецца на працу ў аздараўленчы лагер «Марская хваля».
— Буду працаваць кухонным рабочым. Па сваёй спецыяльнасці магла б арганізоўваць святы для дзяцей, ставіць і развучваць з імі танцавальныя нумары. Думаю, было б выдатна ў наступны раз паспрабаваць свае сілы ў працы ў лагеры ў гэтым напрамку, — адзначыла гамяльчанка.
Адразу некалькі байцоў, якія адпраўляюцца ў працоўнае лета ў Краснадарскі край, — студэнты Гомельскага дзяржаўнага медыцынскага ўніверсітэта.
— Удзячна нашаму студэнцкаму савету за прапанову паспрабаваць сябе ў працы ў сэрвісным атрадзе, — распавяла студэнтка чацвёртага курса Дзяржмедуніверсітэта Юлія Мукамела.
Вядома, што студэнты ВНУ на працягу ўсяго года актыўна ўдзельнічаюць у разнастайных валанцёрскіх атрадах.
— Нас едзе цэлая група, таму не так хвалююся. Пакуль не ведаем, якую працу будзем выконваць у лагеры. Мне б хацелася патрапіць на кухню працаваць, бо, думаю, нарэшце навучуся што-небудзь гатаваць, спраўляцца на кухні, — прызналася студэнтка.
Многіх юнакоў і дзяўчат у паездку прыйшлі праводзіць бацькі, браты і сёстры.
— Трэба абавязкова падтрымліваць такое жаданне дзяцей папрацаваць. Гэта вучыць і большай самастойнасці, а яшчэ гэта вельмі добры новы жыццёвы досвед, — падзякавала за магчымасць для дачкі актыўна і з карысцю правесці лета Святлана Мукамела.
Як адзначыў камісар Гомельскага абласнога штаба студэнцкіх атрадаў Беларускага рэспубліканскага саюза моладзі Мікалай Сядзельнік, гэтым летам у лагеры Краснадарскага краю Расійскай Федэрацыі атрымалі магчымасць працаўладкавацца звыш 170 студэнтаў.
— Кожны год тэрытарыяльныя штабы студэнцкіх атрадаў Гомельшчыцы дапамагаюць дзецям знайсці работу па душы, у тым ліку за межамі Рэспублікі Беларусь. Беларускія студэнты добра зарэкамендавалі сябе ў працы, таму кіраўніцтва «Арляня» і «Марской хвалі» заўсёды з радасцю запрашае іх, — падзяліўся камісар Гомельскага абласнога штаба студатрадаў.
Наталля КАПРЫЛЕНКА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.