Прыгожы рытуал уручэння гэтага найважнейшага атрыбута сувораўца адбыўся падчас Дня ведаў. 104 хлопцы з усёй краіны атрымалі пунсовыя пагоны з рук генералаў, у тым ліку кіраўніка абароннага ведамства. Па традыцыі выхаванцы вучылішча вымавілі клятву сувораўца — гэтае высокае званне яны паабяцалі пранесці праз усё жыццё.
Віншуючы хлопчыкаў з найважнейшай падзеяй, а таксама пачаткам новага навучальнага года, міністр абароны Віктар Хрэнін адзначыў, што за спінай у тых, хто сёння стаіць у сувораўскім страі, — сур'ёзныя выпрабаванні, уступная кампанія. «Вы паспяхова пераадолелі яе і сталі выхаванцамі вучылішча, якое мае славутую 70-гадовую гісторыю і традыцыі, — звяртаючыся да сувораўцаў, заўважыў кіраўнік абароннага ведамства. — Традыцыі навучання і выхавання тых, хто стаяў і стаіць на абароне Айчыны. Перад вамі адкрываюцца найшырэйшыя магчымасці: цудоўная адукацыя, найлепшыя педагогі і выхавацелі, трывалая культурная аснова і спартыўная загартоўка. Упэўнены, што навучанне ў вучылішчы дазволіць вам развіць у сабе самыя лепшыя якасці, стаць годнымі грамадзянамі нашай краіны, сапраўднымі патрыётамі і абаронцамі сваёй Радзімы».
Міністр звярнуў увагу на тое, што сёння беларуская армія — гэта сучасная армія, узброеная магутнай зброяй. «А ў аснове маральнага духу ляжыць патрыятызм, падмуркам якога з'яўляецца Вялікая Перамога, — нагадаў Віктар Хрэнін. — Вы — новае пакаленне, якое ў хуткім часе зойме шэрагі абаронцаў Айчыны. Мы ўскладаем на вас вялікія надзеі. Менавіта вам трэба будзе забяспечваць суверэнітэт і незалежнасць Беларусі. Любіце і абараняйце сваю краіну так, як гэта робіць наш Галоўнакамандуючы — Прэзідэнт Рэспублікі Беларусь Аляксандр Рыгоравіч Лукашэнка. Будзьце вартымі пакалення пераможцаў».
Конкурс у Мінскае сувораўскае ваеннае вучылішча традыцыйна высокі. Сёлета на адно месца прэтэндавалі больш як тры чалавекі. У парадным шэрагу — найлепшыя з найлепшых. У распараджэнні будучых абаронцаў Радзімы — сучасная вучэбна-матэрыяльная база, шматфункцыянальны спартыўны комплекс і спартыўныя залы, унікальныя аб'екты для набыцця навыкаў будучай прафесіі. Магчымасці, якімі валодае вучылішча, дазваляюць арганізоўваць і праводзіць адукацыйны працэс на самым высокім узроўні, фарміраваць прафесійныя інтарэсы і навыкі будучых афіцэраў.
Па словах начальніка Мінскага сувораўскага ваеннага вучылішча Дзмітрыя Кучука, з кожным годам усё больш маладых людзей краіны хоча звязаць свой лёс з гэтай навучальнай установай. «Галоўная задача, якую перад нашым вучылішчам паставіў кіраўнік дзяржавы, — выхаванне сапраўдных патрыётаў краіны, тых людзей, якія ў далейшым зоймуць адказныя пасады не толькі ва Узброеных Сілах, але і ў дзяржаўных органах кіравання і будуць весці нашу краіну далей, — адзначыў ён. — Вучылішча з'яўляецца важным этапам для станаўлення будучага афіцэра. Выхаванцы становяцца тут самастойнымі, упэўненымі ў сабе маладымі людзьмі, якія здольныя адэкватна думаць, аналізаваць сітуацыю і прымаць адзінае правільнае рашэнне. Таксама юнакі становяцца ў сценах вучылішча ўнутрана дысцыплінаванымі і свядомымі».
Як расказаў Макар Бярозкін, які сёлета паступіў у сувораўскае, з дзяцінства ён марыць стаць афіцэрам. І ўсё дзякуючы старэйшаму брату, які праходзіў навучанне ў Мінскім сувораўскім ваенным вучылішчы і сёлета паступіў у адну з ваенных устаноў Расійскай Федэрацыі. «Мне здаецца, што тут я навучуся шмат чаму, — лічыць хлопец. — Дысцыпліне, вучэбным прадметам, якія выкладаюцца на павышаным узроўні. Разумею, што, магчыма, будзе няпроста, але вучоба ў вучылішчы загартуе мяне, сфарміруе мяне як мужчыну».
Дзямід Кайко падзяліўся, што на яго выбар працягнуць навучанне ў сувораўскім вучылішчы ніхто не ўплываў. Звязаць жыццё са службай — самастойнае рашэнне. Да гэтага ён ішоў мэтанакіравана: добра вучыўся ў школе, таму праблем з паступленнем не было. Як заўважыла маці хлопца, такое жаданне нельга было не падтрымаць, нават калі гэта адзінае дзіця ў сям'і. «Усе прадзеды сына служылі, таму, можна лічыць, пагоны з дзяцінства прымяраем, — расказала Ірына Вядзёрка. — Вядома, мне як маці няпроста адпусціць адзінага сына з дома, але гэта яго будучыня і толькі яму выбіраць, якой яна будзе».
Вераніка КАНЮТА
Фота Віктара ІВАНЧЫКАВА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
