Пуцеправод па вул. Палявой у Жлобіне адкрылі пасля капрамонту

У Жлобіне ў Дзень Кастрычніцкай рэвалюцыі адкрылі пасля капітальнага рамонту пуцеправод па вул. Палявой, перадае БелТА.

Падзея для горада стала важнай, бо гэта асноўная транспартная артэрыя, якая звязвае спальныя мікрараёны райцэнтра з буйным прамысловым вузлом.

Першы намеснік старшыні Гомельскага аблвыканкама Дзмітрый Петражыцкі падкрэсліў: у Беларусі ёсць добрая традыцыя ў святы дарыць падарункі — новыя або абноўленыя сацыяльна значныя, інфраструктурныя аб’екты. І сённяшняе адкрыццё пуцеправода — адзін з такіх падарункаў.

«Дарога — гэта крывяносная сістэма эканомікі, а масты, пуцеправоды — неад’емная частка нашых дарог. Мы і далей будзем падтрымліваць у належным стане збудаванні, планава праводзіць на іх рамонты», — запэўніў першы намеснік старшыні аблвыканкама.

Словы ўдзячнасці ён адрасаваў будаўнікам, канструктарскай групе, інжынерным работнікам, якія ў даволі сціснутыя тэрміны годна выканалі работы.

«Пуцеправод быў на рамонце каля 11 месяцаў. І з сённяшняга дня жыхары Жлобіна вяртаюцца ў звыклы графік перамяшчэння, руху па горадзе», — дадаў Дзмітрый Петражыцкі.

«У нашай краіне вялікая ўвага надаецца развіццю сацыяльнай сферы, транспартнай інфраструктуры, вырашаюцца праблемы жыхароў. І гэта пацвярджае тое, што мы зрабілі правільны выбар, і сёння жывём у свабоднай, спакойнай, суверэннай Беларусі», — адзначыў старшыня Жлобінскага райвыканкама Сяргей Ярэц.

Абноўлены аб’ект — вынік згуртаванай працы і праектных арганізацый, і будаўнікоў, і многіх іншых, зрабіў акцэнт ён. «Пры капрамонце ўзнікаў шэраг момантаў, якія неабходна было вырашаць у рэжыме рэальнага часу. І ў выніку атрымалася больш чым на месяц паскорыць пуск руху ў параўнанні з прадугледжаным праектным рашэннем тэрмінам», — звярнуў увагу старшыня райвыканкама.

Ён падзякаваў кіраўніцтву вобласці, рэспублікі, будаўнікам, а таксама жыхарам, якія з разуменнем паставіліся да часова ўзніклых цяжкасцяў.

Генеральны дырэктар «Гомельаблдарбуда» Ігар Краўчанка прывёў дадзеныя: больш за 10 тыс.чалавек перамяшчаюцца штодня па гэтым пуцеправодзе. Транспартная артэрыя стала самай доўгай з усіх адрамантаваных пуцеправодаў сёлета ў Гомельскай вобласці, яе даўжыня складае каля 220 м.

Паводле слоў гендырэктара, пры капрамонце ўжылі даволі складаныя тэхнічныя рашэнні. У іх ліку — узмацненне адзінай маналітнай плітой. «Былі ўжытыя рашэнні па аб’яднанні маналітных бэлек у адзіную сістэму. Такім чынам, засталося толькі два дэфармацыйных шва замест васьмі, якія існавалі. Гэта істотна павялічвае трывальныя характарыстыкі пуцеправода, яго даўгавечнасць. Выкладзены новы асфальтабетон, зроблены шырокія тратуары, абсталявана больш за 2 тыс. м розных агародж, новае асвятленне. Усе канструкцыі, элементы ацынкаваныя», — адзначыў кіраўнік.

У асобныя дні на аб’екце працавалі адначасова да 70 работнікаў розных прадпрыемстваў, арганізацый, удакладніў Ігар Краўчанка. «Частка работ выконвалася ў кругласутачным рэжыме», — дадаў ён.

«Тэрмін службы пуцеправода пасля рамонту перавышае 25 гадоў. Спадзяемся, ён будзе служыць людзям доўгі час», — падкрэсліў Ігар Краўчанка.

На цырымоніі адкрыцця ўручылі заслужаныя ўзнагароды тым, хто ўнёс важкі ўклад у абнаўленне збудавання. Пасля таго як была перарэзана сімвалічная чырвоная стужачка, пад гучныя апладысменты жыхароў і гасцей горада па пуцеправодзе паехаў транспарт.

«Па гэтым пуцеправодзе дабіраюся на працу. На час капрамонту даводзілася аб’язджаць. Таму рады, што работы завершаны. Цяпер дабірацца стане зручней, хутчэй, камфортней», — падзяліўся жлобінчанін Андрэй Фядосаў.

Вельмі рада адкрыццю аб’екта і Іна Прачык. На адкрыццё маладая мама прыйшла з двума маленькімі сынамі — Эрыкам і Янам. «Я жыву побач і з балкона назірала, як ішоў працэс. Зараз зноў на другі бок горада зможам ездзіць без дадатковых колаў. Вядома, сённяшні дзень для нас свята», — падсумавала жыхарка горада.