Надвор'е: у канцы тыдня тэмпература нават днём будзе даходзіць да мінус 5 градусаў

Апошні месяц сезона яшчэ часта называюць перадзім’е, бо ён спалучае ў сабе рысы восені і зімы. Тэмпература паветра ўсё часцей становіцца адмоўнай, а ў ападках пачынае пераважаць мокры снег і проста снег, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

А сёлета першая дэкада лістапада парадавала жыхароў Беларусі цёплым надвор’ем. Тэмпературны фон за першыя 10 дзён лістапада аказаўся на 4 градусы вышэйшы за кліматычную норму. Паводле папярэдніх звестак, у гэтыя выхадныя месцамі маразы стануць яшчэ больш адчувальнымі, пры гэтым у разрэзе краіны па-ранейшаму будуць захоўвацца кантрасты тэмператур паміж халодным паўночным усходам і цёплым паўднёвым захадам краіны.

У сераду ноччу месцамі, а днём на большай частцы тэрыторыі краіны пройдуць ападкі ў выглядзе снегу, мокрага снегу і дажджу. Ноччу і раніцай у асобных раёнах чакаюцца слабыя туман і галалёд, на дарогах месцамі галалёдзіца. Тэмпература паветра ўначы складзе ад мінус 3 па паўночным усходзе да плюс 7 градусаў па паўднёвым захадзе краіны. Днём будзе ад нуля да плюс 7 градусаў, у паўднёвых раёнах — да 9 цяпла.

Амаль паўсюдна чакаецца снег, мокры снег з дажджом і ў чацвер. Уначы такія кароткачасовыя ападкі пройдуць на большай частцы тэрыторыі краіны, а днём пройдуць толькі месцамі. У асобных раёнах магчымыя слабыя туман і галалёд, на дарогах месцамі галалёдзіца. Тэмпература паветра ўначы складзе ад мінус 4 градусаў па паўночным усходзе да плюс 4 градусаў па паўднёвым захадзе краіны, днём — ад мінус 2 градусаў да 5 цяпла.

І ў пятніцу месцамі па краіне пройдуць кароткачасовыя ападкі (снег, мокры снег, па паўднёвым захадзе з дажджом). У асобных раёнах чакаюцца слабыя туман і галалёд, на дарогах галалёдзіца. Тэмпература паветра ўначы складзе ад мінус 6 градусаў да плюс 1, па паўднёвым захадзе — да плюс 3 цяпла. Днём — ад мінус 2 да плюс 5 градусаў.

Згодна з папярэднімі прагнозамі айчынных сіноптыкаў, у перадапошнія выхадныя лістапада стане холадна нават у дзённыя гадзіны, а ўначы падмарозіць не на жарт. У суботу ў асобных раёнах краіны пройдуць кароткачасовы снег, мокры снег, па паўднёвым захадзе магчымы дождж. У асобных раёнах чакаюцца слабыя туман, шэрань, на дарогах галалёдзіца. Тэмпература паветра ўначы складзе ад мінус 4 да плюс 3, пры праясненнях будзе халадней — да мінус 5–12 градусаў. Днём — ад мінус 5 градусаў па паўночным усходзе да плюс 6 па паўднёвым захадзе краіны.

У нядзелю ноччу месцамі, днём на большай частцы тэрыторыі краіны пройдуць кароткачасовыя ападкі ў выглядзе снегу, мокрага снегу і дажджу. У асобных раёнах чакаюцца туман і галалёд, на дарогах галалёдзіца. Тэмпература паветра ўначы складзе ад мінус 11 градусаў па паўночным усходзе да плюс 3 па паўднёвым захадзе. Днём будзе ад мінус 2 градусаў да плюс 5, а ў заходніх раёнах краіны — да 8 цяпла.

Сяргей КУРКАЧ