Надзвычайны і Паўнамоцны Пасол Азербайджанскай Рэспублікі ў Рэспубліцы Беларусь Ульві Бахшаліеў завяршае дыпламатычную місію ў нашай краіне. У асобе Старшыні Савета Рэспублікі ён выказаў удзячнасць беларускаму боку за падтрымку азербайджанскага народа і садзейнічанне ў развіцці ўзаемадзеяння паміж дзвюма краінамі.
Як падкрэсліла спікер верхняй палаты парламента, для беларусаў Азербайджан — не проста сяброўская краіна, а краіна, якая падтрымлівае нас. «І мы падтрымліваем азербайджанскі народ, — удакладніла Наталля Качанава. — Тыя задачы, якія сёння стаяць перад намі ў нашым супрацоўніцтве, для нас вельмі знакавыя. Нашы народы сябруюць. І, вядома, тон гэтым адносінам паміж нашымі краінамі задаюць нашы лідары».
Старшыня Савета Рэспублікі нагадала пра нядаўнюю сустрэчу Аляксандра Лукашэнкі з Ільхамам Аліевым на палях Сусветнага саміту па барацьбе са змяненнямі клімату ў ААЭ, якая, па яе словах, уяўляла сабой не проста сустрэчу двух лідараў, а размову добрых сяброў. Па словах спікера, трэба зрабіць усё для таго, каб адносіны, якія звязваюць нашы народы, захаваць.
Наталля Качанава адзначыла, што добрыя сяброўскія адносіны складваюцца і паміж парламентарыямі Беларусі і Азербайджана. Старшыня Савета Рэспублікі расказала, што накіравала сваёй калезе Сагібе Гафаравай запрашэнне наведаць Беларусь з афіцыйным візітам. «Будзем рады сустрэць у нашай краіне маю калегу і дэлегацыю нашых калег-парламентарыяў Азербайджана, — падкрэсліла яна. — У нас шмат цікавых праектаў. Па ўсіх кірунках, якія ёсць у нашым узаемадзеянні, мы гатовы ўключыцца ў гэтую работу. Думаю, гэта будзем абмяркоўваць і ў ходзе афіцыйнага візіту».
Наталля Качанава расказала, што пры Савеце Рэспублікі створана Група сяброўства паміж Беларуссю і Азербайджанам. «Для нас Азербайджан — гэта стратэгічны партнёр, — акцэнтавала ўвагу спікер. — Мы падтрымліваем адзін аднаго на міжнародных пляцоўках у гэты складаны час. Гэтая падтрымка дарагога варта». Па яе словах, у канфліктных сітуацыях, якія разгортваюцца па ўсім свеце, важна мець верных і надзейных таварышаў, сяброў, якія дапамогуць у вырашэнні ўсіх пытанняў і задач.
Сёлета Азербайджан падтрымаў маладзёжны праект «Цягнік Памяці», які ў свой час ініцыявалі верхнія палаты парламентаў Беларусі і Расіі. У наступным годзе юнакі і дзяўчаты з гэтай краіны будуць прымаць у ім удзел. Старшыня Савета Рэспублікі таксама выказала ўдзячнасць за прадстаўнічую дэлегацыю азербайджанскіх спартсменаў на ⅠⅠ Гульнях краін СНД. Праз два гады гэтае спартыўнае мерапрыемства будзе прымаць Азербайджан.
«Мы заўсёды рады любым ініцыятывам і прапановам, якія будуць сыходзіць з азербайджанскага боку, — рэзюмавала спікер верхняй палаты парламента. — У нас сапраўды склаліся вельмі добрыя, сяброўскія і канструктыўныя адносіны».
Кажучы аб маючым адбыцца афіцыйным візіце азербайджанскіх парламентарыяў у Беларусь, Наталля Качанава адзначыла, што самае галоўнае, каб былі прыняты рашэнні, якія ў далейшым будуць садзейнічаць эфектыўнай рабоце нашых парламентаў, накіраваны на ўмацаванне эканомік дзвюх краін.
«Нам прыемна працаваць у сяброўскай краіне, а калі гэтая краіна яшчэ і брацкая, нам удвая прыемна, — адзначыў Ульві Бахшаліеў. — Той высокі ўзровень даверу, якія існуе паміж нашымі прэзідэнтамі, надае нам імпульс і настройвае на далейшае паглыбленне нашых адносін».
У размове з журналістамі Ульві Бахшаліеў падзякаваў беларускаму боку за добрае супрацоўніцтва. «Нашы адносіны развіваюцца ва ўсіх сферах: гэта высокі ўзровень палітычных адносін, паглыбляюцца эканамічныя і гуманітарныя адносіны, — канкрэтызаваў пасол Азербайджана ў Беларусі. — У Рэспубліцы Беларусь я заўсёды адчуваў цеплыню сяброўскіх адносін і, натуральна, павагі да маёй краіны. Паміж нашымі краінамі склаліся даверлівыя адносіны».
Вераніка КАНЮТА
Фота БелТА
Старшыня Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаіл Русы:
— Лідары нашых дзяржаў дамовіліся па буйнамаштабнай і поўнамаштабнай рабоце па супрацоўніцтве і па стварэнні цэлых галін. За гэты час у Гянджы былі пабудаваны філіялы Мінскага трактарнага завода і Мінскага аўтамабільнага завода. З дапамогай Беларусі ў Азербайджане з’явілася цэлая галіна сельгасбудавання. Узаемнае супрацоўніцтва вельмі перспектыўнае. Вельмі добра ідзе развіццё па лініі сельскай гаспадаркі. Інвестыцыі Азербайджана назад ідуць у Рэспубліку Беларусь — такім чынам, ажыццяўляецца рух у два кірункі. Вельмі шмат дапамагалі ў арганізацыі малочнай вытворчасці ў Рэспубліцы Азербайджан. У Габале была пабудавана цудоўная малочна-таварная ферма, кансультавалі нашы спецыялісты. Мільярд таваразвароту — гэта рэальна.
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
