Касавыя зборы кітайскага кінапракату склалі амаль 55 мільярдаў юаняў за мінулы год

Кітайскі кінарынак дэманструе ўпэўненую дынаміку аднаўлення, а агульныя касавыя зборы за мінулы год перавысілі 54,91 мільярда юаняў (больш за 7,75 млрд. долараў), перадае «Жэньмінь жыбаа» анлайн».

Гэтая лічба ніжэй за рэкордныя паказчыкі 2019-га і 2018-га гадоў, якія перавысілі 60 млрд. юаняў, аднак блізкая да ўзроўню 2017 года, што робіць яе чацвёртымі па велічыні касавымі зборамі ў гісторыі кітайскага кінематографа. Як сведчаць звесткі, апублікаваныя Дзяржаўным упраўленнем кінематаграфіі КНР, за год было прададзена амаль 1,3 мільярда білетаў на кінапаказы. Кітайскія фільмы прынеслі больш за 46 млрд. юаняў касавых збораў, што складае 83,77 працэнта ад іх агульнага аб’ёму па краіне.

У топ-10 касавага чарта дамінуюць кітайскія фільмы: першае месца заняла вострасюжэтная камедыя «Паўнаводная чырвоная рака» , на другім і трэцім месцах размясціліся адпаведна фантастычны блокбастар «Блукаючая Зямля 2» і крымінальная драма «Ставак больш няма». Прафесар Кітайскай акадэміі мастацтваў Чжы Фэйна падкрэсліла, што сёлета якасць айчынных фільмаў прыкметна павысілася, яны былі прысвечаны традыцыйнай кітайскай культуры і адлюстроўвалі рэальнае жыццё, эмацыйна ўздзейнічаючы на гледачоў.

Ацэньваючы вынікі 2023 года, варта адзначыць высокія касавыя зборы ў ключавыя для кінапракатчыкаў сезоны, у тым ліку свята Вясны (кітайскі Новы год па месяцовым календары) і летнія вакацыі. За мінулы год з’явілася вялікая колькасць маладых кітайскіх рэжысёраў, акцёраў і сцэнарыстаў, якія сталі важнай сілай, якая садзейнічае росту індустрыі. Па меркаванні экспертаў, іх працы дэманструюць вялікія далягляды і патэнцыял.

Рэжысёр Го Фань і яго каманда, якія стварылі нашумелую франшызу «Блукаючая Зямля», нястомна працуюць над тым, каб перанесці кітайскую навуковую фантастыку на вялікі экран. Каманда, якая стварыла анімацыйны фільм «Чан’ань», пастаралася расказаць пра жыццё «несмяротнага паэта» Лі Бо ў часы дынастыі Тан (618-907 гг.). У баявіку «Народжаныя лётаць» драматычна паказана, як элітныя пілоты Кітая адчуваюць новыя знішчальнікі. «Гісторыі расказаны ў даступнай і энергічнай манеры», — пракаментаваў адзін з інтэрнэт-карыстальнікаў. «Я c нецярпеннем чакаю працягу «Блукаючай Зямлі», — напісаў другі.

З’яўляючыся сродкам культурнага абмену, кінаіндустрыя адыграе найважнейшую ролю ў развіцці кантактаў і ўзаемнага навучання паміж рознымі цывілізацыямі. За мінулы год імпартныя блокбастары розных жанраў узбагацілі кітайскі кінарынак, а шэраг айчынных фільмаў, якія выйшлі ў свет, уразілі замежную публіку зачараваннем кітайскай культуры.

У розных краінах на вялікія экраны выйшлі фантастычны блокбастар «Блукаючая Зямля 2» і міфалагічная эпапея «Узвышэнне ў ранг духаў: Каралеўства штармоў». Кітайскія фільмы, такія як «Утоены клінок», «Адзіны і непаўторны» і «Закінутыя ў зорках» таксама былі прадстаўлены на экранах замежных кінатэатраў.

Летась КНР правяла фестывалі і выставы кітайскага кіно ў такіх краінах, як Кенія, ПАР, Нігерыя і Расія, што дазволіла замежным кінематаграфістам глыбей зразумець кітайскія фільмы. Акрамя таго, летась у Паднябеснай была заснавана прэмія «Залатая панда», якая прысуджаецца розным сусветным кінадзеячам за дасягненні ў галіне мастацкага кінематографа, тэлебачання, дакументальнага кіно і анімацыі, дэманструючы намаганні па пашырэнні кінематаграфічных абменаў паміж Кітаем і светам.