Акрамя таго, падчас калегіі, у якой прынялі ўдзел кіраўніцтва ведамства і дэпартаментаў, кіраўнікі і намеснікі цэнтральнага апарату міністэрства, тэрытарыяльных органаў, падраздзяленняў і арганізацый сістэмы МНС, абмеркавалі перспектыўныя задачы, якія стаяць перад ратавальнікамі. Міністр па надзвычайных сітуацыях Вадзім Сіняўскі абазначыў праблемныя пытанні і расставіў прыярытэты на бягучы год.
Што датычыцца вынікаў работы ведамства ў мінулым годзе, своечасова прынятыя прафілактычныя меры дазволілі захаваць дасягнутую па выніках 2022 года станоўчую дынаміку зніжэння колькасці пажараў і людзей, якія загінулі на іх. Колькасць пажараў зменшылася на 4,4% (з 5938 да 5677), загінулых ад іх людзей — на 16,6% (з 628 да 524 чалавек). Не дапушчана росту дзіцячай гібелі: калі ў 2022 годзе ў агні загінула 14 непаўналетніх, то ў 2023 годзе — дзевяць дзяцей. Стала менш і ўзгаранняў у прыродных экасістэмах. Колькасць загінулых ад такіх узгаранняў зменшылася ў 8 разоў (з 17 да 2 чалавек), а плошчы — у 4 разы. Рэалізаваныя мерапрыемствы па папярэджанні няшчасных выпадкаў на вадзе дазволілі зменшыць колькасць патанулых на водных аб’ектах на 7,3%, у тым ліку дзяцей — на 22%.
Як адзначыў міністр па надзвычайных сітуацыях Вадзім Сіняўскі, у мінулым годзе ведамства спрацавала добра па ўсіх паказчыках. І гэта нягледзячы на форс-мажор, які ўзнік у пачатку года, калі Рэспубліканскі атрад спецыяльнага прызначэння «ЗУБР» адправіўся ў Турцыю для ліквідацыі наступстваў землятрусу і выканаў пастаўленыя задачы на ацэнку «выдатна». «Самае галоўнае — станоўчая дынаміка скарачэння колькасці надзвычайных сітуацый, у тым ліку пажараў, гібелі людзей ад іх, захаванне чалавечых жыццяў на вадзе (дынаміка станоўчая ўжо другі год запар), — падкрэсліў кіраўнік ведамства. — Але сённяшнія вынікі і крытычная ацэнка дзейнасці міністэрства сведчаць аб тым, што мы яшчэ толькі на пачатку свайго развіцця. У Год якасці нам трэба перагледзець свае планы, вызначыць новыя рашэнні ў арганізацыі работы і працягнуць эфектыўную дзейнасць па аказанні дапамогі людзям, якія трапілі ў бяду. Вядома, вялікая ўвага — пытанням прафілактыкі і папярэджання надзвычайных сітуацый».
Міністр расказаў, што падраздзяленні МНС хуткімі тэмпамі аснашчаюцца самай сучаснай тэхнікай. «Набыта новая пажарная аварыйна-ратавальная тэхніка: больш чым 300 адзінак шматлікіх найменняў, — удакладніў Вадзім Сіняўскі. — Пастаўлены на ўзбраенне новыя верталёты „Мі-17“ — з усім спектрам ратавальных работ, якія мы толькі праводзім. Па ўсёй краіне ўводзяцца ў эксплуатацыю новыя пажарныя дэпо».
Кажучы аб прыярытэтных кірунках развіцця ведамства ў бягучым годзе, асаблівую ўвагу міністр звярнуў на ўдасканаленне сістэмы перадачы паведамленняў аб надзвычайнай сітуацыі «Маланка». «Сур’ёзная ўвага будзе па-ранейшаму ўдзяляцца пытанням грамадзянскай абароны, — дадаў ён. — Многае ўжо зроблена, але ёсць яшчэ над чым папрацаваць. Гэта і апавяшчэнне нашага насельніцтва, і абарончыя збудаванні, якія павінны быць прыведзены ў адпаведны стан для работы ў асаблівых умовах, гэта і падрыхтоўка ведамства, як дзейнічаць у асаблівых умовах».
Вадзім Сіняўскі выказаў упэўненасць у тым, што МНС зможа вырашыць усе пастаўленыя задачы. «Калектыў дастаткова згуртаваны, ураўнаважаны, — дадаў ён. — Спецыялісты высокага ўзроўню гатовы выконваць сваю работу ў любых умовах: на зямлі, вышыні, пад зямлёй. Ведаем, куды рухацца. Упэўнены, мы справімся з задачамі на ацэнку «добра».
Як адзначыў дзяржаўны сакратар Савета бяспекі Аляксандр Вальфовіч, на выніковай калегіі Міністэрства па надзвычайных сітуацыях былі разгледжаны ўсе аспекты дзейнасці, а таксама дадзены падрабязны аналіз задач, якія стаялі перад ведамствам у мінулым годзе. «У цэлым ведамства з усімі пастаўленымі задачамі справілася, — падкрэсліў ён. — Прыкметная станоўчая дынаміка ў пытаннях змяншэння пажараў, вырашэння задач, звязаных з ліквідацыяй надзвычайных сітуацый. Менш загінулых па выніках 2023 года. Але калі ёсць хаця б адзін загінулы, асабліва калі гэта дзіця, то патэнцыял для вырашэння задач яшчэ мае месца быць, а таму трэба прыкладаць усе намаганні, каб гібелі ўвогуле не было».
Па словах дзяржсакратара Савета бяспекі, галоўныя задачы МНС — засцерагчы людзей, ратаваць іх жыцці, не дапускаць узнікнення тых ці іншых катастроф і надзвычайных сітуацый, а ў выпадку іх узнікнення — прафесійна і на высокім узроўні вырашаць задачы па іх лакалізацыі.
Аляксандр Вальфовіч адзначыў работу Міністэрства па надзвычайных сітуацыях на міжнароднай арэне. Ён нагадаў, што ў мінулым годзе супрацоўнікі ведамства прымалі ўдзел у вырашэнні шэрагу задач па выратаванні людзей у Турцыі пасля землятрусу. Акрамя таго, немалую дапамогу авіяцыя МНС аказала гэтай краіне і пры тушэнні пажараў у Турцыі, што праводзіцца на сістэмнай аснове, як і дастаўка гуманітарных грузаў. Пастаўлена задача, каб у Год якасці ратавальнае ведамства працавала з падвоенай нормай.
«Калектыў Міністэрства па надзвычайных сітуацыях падрыхтаваны як у прафесійным, так і маральным плане, — звярнуў увагу дзяржсакратар Савета бяспекі. — Гэта людзі дзяржаўныя, якія бачаць праблемы, што неабходна вырашаць. Калектыў з’яўляецца адным з найлепшых сярод міністэрстваў сілавога блока па вырашэнні ўскладзеных на яго задач. У тым ліку на міністэрства ўскладзены задачы па ўдзеле супрацоўнікаў у вырашэнні задач дзяржаўнай сістэмы рэагавання на акты тэрарызму».
Па словах Аляксандра Вальфовіча, вельмі шмат ведамствам зроблена па паляпшэні сваёй матэрыяльна-тэхнічнай базы, павышэнні якаснай падрыхтоўкі кадраў. Ён прывёў у прыклад Універсітэт грамадзянскай абароны МНС. «Такой базай можа пахваліцца не кожная ўстанова адукацыі, — удакладніў дзяржсакратар. — Тут ёсць усё для таго, каб рыхтаваць высакакласных ратавальнікаў, афіцэраў Міністэрства па надзвычайных сітуацыях».
Вераніка КАНЮТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.