Нервовае перанапружанне, завалодаўшы намі, вымотвае не на жарт. Стрэс могуць выклікаць розныя падзеі: ад непрыемнасцяў на працы да выйгрышу ў латарэю. І паколькі пад каўпак сябе не схаваеш, выйсце адно: навучыцца правільна рэагаваць на падобнае.
Як навучыцца жыць са стрэсам і не дазволіць яму разбурыць ваш арганізм, тлумачыць загадчык аддзела грамадскага здароўя Мінскага абласнога Цэнтра гігіены, эпідэміялогіі і грамадскага здароўя Віктар Данілавіч.
Як мінімізаваць стрэс?
- Не спрачайцеся без патрэбы, пазбягайце канфліктных сітуацый.
- Не пераацэньвайце ступень важнасці праблемы, магчыма, затрачаныя эмоцыі не вартыя чаканага выніку.
- Пакідайце невялікую долю сумнення ў поспеху маючай адбыцца справы. Плануйце і адмоўны вынік, каб няўдача не збіла вас напавал. Майце запасны варыянт і падрыхтуйце «шлях адступлення».
- Не дайце адмоўным думкам авалодаць вамі, не канцэнтруйцеся толькі на іх.
- Старайцеся кожнае выпрабаванне, якое выпала на вашу долю, успрымаць як чарговы ўрок мужнасці і цярпення.
- Будзьце аптымістамі: верце, што вашы непрыемнасці не самыя страшныя. Успомніце, што вакол шмат людзей, якім нашмат цяжэй, чым вам цяпер.
- Не займайцеся самакапаннем, проста перад сном спакойна прааналізуйце мінулы дзень, паглядзіце на факты ва ўпор.
- Не паддавайцеся жаданню адхіліцца ад навакольнага свету і адысці ад праблем. Гэта шлях да дэпрэсіі. Найлепшым выйсцем з’яўляецца абмеркаванне сітуацыі з сябрамі і членамі сям’і: вы атрымаеце неабходную падтрымку і не будзеце адчуваць сябе адзінокім.
- Выкладайце ўсе вашы непрыемнасці на паперы, бесстаронне і падрабязна. А пасля скамячце гэты ліст і выкіньце ў сметніцу. Альбо зляпіце вашу «крыўду» з пластыліну, сцісніце яе, камячце, лайце, біце.
- Дазвольце сабе (калі няма сведак) выкрычацца, даць поўную волю эмоцыям, выплюхнуць іх вонкі.
- Часцей усміхайцеся, старайцеся сканцэнтравацца на станоўчых эмоцыях, вучыцеся радавацца маламу.
- Навучыцеся замяшчаць непрыемныя думкі прыемнымі. Не спрабуйце змяніць тое, што не ў вашых сілах, і паспрабуйце гэта прыняць.
- Запомніце: усе праблемы рана ці позна вырашаюцца.
Як расказаў спецыяліст, зняць стрэс дапамагаюць заняткі фізкультурай — гэта цудоўны спосаб зняць напружанне і трымаць сябе ў добрай форме.
— Адпачывайце, расслабляйцеся, бегайце, — рэкамендуе Віктар Данілавіч. — Зніміце напружанне з плечавага пояса, вам стане лягчэй. Дапамогуць таксама кантрасны душ і абліванне халоднай вадой. А яшчэ медытацыя смехам: паспрабуйце смяяцца хаця б 3 хвіліны штодня — гэта палепшыць ваш настрой.
Загадчык аддзела грамадскага здароўя Мінскага абласнога ЦДЭАЗ пералічыў прыкметы, якія павінны вас насцярожыць і падказаць: час рабіць крокі для паляпшэння самаадчування.
- пастаянны непакой;
- непераходзячае пачуццё стомленасці;
- немагчымасць засяродзіцца;
- болі ў сэрцы;
- затрымкі стрававання, неўласцівая для вас алергія;
- болі ў мышцах спіны, шыі і плячэй.
Экспрэс-дапамога для зняцця стрэсу:
- Займіцеся фізічнымі практыкаваннямі, пагуляйце на свежым паветры, зрабіце прабежку, пакатайцеся на веласіпедзе, роліках, лыжах.
- Засяродзьцеся на дыханні. Канцэнтрацыя на працэсе дыхання прымушае на час забыцца пра крыніцу стрэсу. Павольна ўдыхніце носам, затрымайце дыханне на некалькі секунд, выдыхніце павольна праз нос.
- Цалкам паслабцеся.
- Змяніце абстаноўку – схадзіце ў кіно, музей, тэатр.
- Майце зносіны з людзьмі.
