Расія прапануе Беларусі актыўна далучацца да рэалізацыі праграм у сферы авіябудавання

Аб гэтым заявіў пасол Беларусі ў Расіі Дзмітрый Крутой. «Авіябудаванне — сегмент, які ў нас знаходзіўся фактычна на нулявой адзнацы (размова пра ўзровень узаемадзеяння ў гэтай сферы яшчэ некалькі гадоў таму. — „Зв.“). Асобна па гэтым блоку на апошнім пасяджэнні Вышэйшага дзяржсавета (29 студзеня 2024 года ў Санкт-Пецярбургу. — „Зв.“) нашы міністры прамысловасці дакладвалі лідарам краін. І Прэзідэнт Расійскай Федэрацыі Уладзімір Пуцін падтрымаў асабліва менавіта гэты блок і яшчэ раз запрасіў беларусаў вельмі актыўна, настойліва, дзесьці нават агрэсіўна ўваходзіць у гэтыя праграмы камплектацыі авіябудаўнічых прадпрыемстваў Расіі», — сказаў пасол.

«Усе мадэлі самалётаў, якія ў 2024–2025 гадах будуць уведзены ў грамадзянскі абарот (МС-21, Sukhoі Superjet New, Ту-214, Іл-76), — усюды беларусы павінны сябе бачыць», — удакладніў Дзмітрый Крутой.

Паводле яго слоў, ёсць шэраг такіх новых кірункаў для развіцця сумеснай работы з расійскім бокам. «Гэта і станкабудаванне, і мікраэлектроніка, і суднабудаванне. Зноў жа, на апошнім ВДС расійскія партнёры нас запрасілі папрацаваць з Аб’яднанай суднабудаўнічай карпарацыяй (найбуйнейшая суднабудаўнічая кампанія Расіі. — «Зв.»), — дадаў ён.

Раней на розных узроўнях паведамлялася аб планах і канкрэтнай практычнай рабоце па імпартазамяшчэнні на беларускіх прадпрыемствах вялікай колькасці камплектуючых для розных расійскіх самалётаў. Размова таксама ідзе аб планах па арганізацыі вытворчасці ў Беларусі лёгкага самалёта. «У сферы авіябудавання рухаемся даволі хутка. Мы сёння разам распрацоўваем і ствараем гэты самалёт, вядзём доследна-канструктарскія работы. Павінны да 2026 года зрабіць першыя два самалёты. Вельмі важна, што мы ўжо сёння маем цвёрды заказ — мінімальную колькасць самалётаў, якія павінны будзем вырабіць да 2030 года. Гэта 85–100 штук. Калі будзем паспяхова выконваць пастаўленыя задачы, іх можа быць і больш», — сказаў журналістам у студзені бягучага года віцэ-прэм’ер Пётр Пархомчык.

Паводле БелТА