Пад эгідай Міністэрства па падатках і зборах выйшла дзве навучальныя кнігі — «Прафесія падатковы інспектар » і «Падман у канверце, або зборнік павучальных апавяданняў і малюнкаў». Гэтыя выданні падыходзяць для агульнага развіцця дзяцей, правядзення тэматычных урокаў у школе, а таксама будуць карысныя і для дарослых. Кнігі напісаны простай мовай, каб кожны чытач мог разабрацца ў працэсах работы падатковай сістэмы нашай краіны, а таксама ўсвядоміць важнасць выплаты падаткаў.
Падчас прэс-канферэнцыі намеснік начальніка інспекцыі МПЗ па Мінску Вольга Тарасевіч і начальнік упраўлення інфармацыйна-растлумачальнай работы інспекцыі МПЗ па Мінску Тамара Свідзінская расказалі, як ствараліся кнігі, і якія важныя аспекты ў іх асвятляюцца.
«Мы з задавальненнем прадстаўляем увасабленне нашых ідэй, а таксама вынікі работы з падрастаючым пакаленнем. Вельмі доўга планавалася публікацыя гэтых кніг, мы хацелі максімальна напоўніць іх карыснай і цікавай інфармацыяй для мэтавай аўдыторыі», — адзначыла Вольга Тарасевіч.
У кнігу «Падман у канверце, або зборнік павучальных апавяданняў і малюнкаў» увайшлі лепшыя работы на тэму «Стоп зарплаце ў канвертах», прадстаўленыя на конкурсы малюнкаў, апавяданняў і відэаблогінгу «Юны падатковы інспектар», арганізаваныя ўстановай адукацыі «Мінскі дзяржаўны палац дзяцей і моладзі», інспекцыяй МПЗ па Мінску.
«Напаўненне выдання „Падман у канверце“ — гэта вынік конкурсу, які быў абвешчаны сярод школьнікаў нашай сталіцы. Да нас паступіла велізарная колькасць заявак на ўдзел, і калі мы пачалі ўсё чытаць, то былі вельмі здзіўлены глыбінёй разумення праблемы зарплаты ў канвертах. Дзеці даволі сур’ёзна пагружаныя ў гэтую праблему. У сваіх апавяданнях яны нават выказвалі ідэі наконт таго, як пазбегнуць выплаты заробкаў па такой схеме і якія могуць быць у гэтага наступствы», — падкрэсліла Вольга Тарасевіч.
На думку работнікаў Міністэрства па падатках і зборах, зарплата ў канверце — горшае, што працадаўца можа прапанаваць свайму супрацоўніку:
— Наша мэта — расказаць пра наступствы і пра тое, чаму так рабіць не трэба. Напрыклад, калі работнік атрымлівае зарплату ў канверце, ён павінен разумець, што пазбаўляецца асноўных дзяржаўных гарантый, звязаных з сацыяльным страхаваннем і не толькі.
Тамара Свідзінская дадала, што кніга «Падман у канверце» будзе цікавая і выкладчыкам. Напрыклад, па гэтай кнізе можна праводзіць урокі па тэме падаткаабкладання. Акрамя таго, тут прадстаўлены QR-коды, па якіх можна паглядзець відэа, малюнкі і прачытаць апавяданні.
Кніга «Прафесія падатковы інспектар» распавядае аб падатках і пра саму прафесію падатковага інспектара. Чытачы даведаюцца, у чым заключаецца работа падатковага інспектара і чаму гэтая прафесія настолькі важная для грамадства, аб яе паходжанні, перавагах і складанасцях.
«Мы вельмі рады, што нам дазволілі далучыцца са сваёй ідэяй да серыі „Маленькі прафесар“ і выпусціць дадзеную кнігу. Адзначу, што прафесія падатковы інспектар не новая, але пры гэтым пастаянна ўдасканальваецца. У кнізе мы апісваем працэс з’яўлення прафесіі, тлумачым яе важнасць і актуальнасць, гаворым пра тонкасці работы падатковай службы. Пакуль што ў нас няма навучальных устаноў, якія б займаліся падрыхтоўкай падатковых інспектараў. Гэтую прафесію чалавек атрымлівае непасрэдна на месцы. Спадзяемся, што гэтая кніга зможа паўплываць на выбар будучай прафесіі юных чытачоў», — патлумачыла намесніца начальніка інспекцыі МПЗ Мінску.
Яна таксама звярнула ўвагу, што падатковы інспектар — статусная прафесія, якая нясе вялікую карысць грамадству. «На дадзены момант мы імкнемся працаваць максімальна дыстанцыйна, каб не адрываць людзей і суб’екты гаспадарання ад іх паўсядзённых задач. Так, цяпер асабісты кабінет плацельшчыка набірае вялікую папулярнасць, у ім адлюстроўваецца ўся неабходная інфармацыя, у прыватнасці гісторыя ўзаемадзеяння з падатковай інспекцыяй», — патлумачыла Вольга Тарасевіч.
У сваю чаргу, Тамара Свідзінская падкрэсліла, што кнігу забяспечылі не толькі інфарматыўным матэрыялам, але і заданнямі, аўтары выдання хацелі данесці простай мовай шматграннасць прафесіі падатковага інспектара.
«Гэтая прафесія вельмі цікавая. І яна не горшая, чым, напрыклад, следчы. Тут трэба валодаць пэўным узроўнем ведаў, разбірацца ва ўсіх сферах — ад гандлю да медыцыны. Падатковы інспектар вучыцца заўсёды, на працягу ўсяго жыцця. Пры гэтым, нават калі чалавек не абярэ гэтую прафесію, ён усё роўна рана ці позна сутыкнецца з тэмай падаткаабкладання. Гэтыя веды будуць карысныя маладому чалавеку на працягу ўсяго яго жыцця», — заявіла Тамара Свідзінская.
Паводле яе слоў, сёння падатковая інспекцыя — кліентаарыентаваная служба. «Цяпер робіцца ўсё для таго, каб плаціць падаткі было зручна і хутка. Напрыклад, у кніге ёсць гісторыя стварэння цэнтраў абслугоўвання плацельшчыкаў, яна напісана ў фармаце казкі — як было калісьці і як стала цяпер. Таксама ў кніге тлумачыцца, з чым даводзіцца сутыкацца падатковым інспектарам падчас праверкі», — расказала начальнік упраўлення інфармацыйна-растлумачальнай работы інспекцыі МПЗ.
У выданні ёсць інфармацыя і пра тое, як выкарыстоўваць электронныя сэрвісы, мабільны дадатак, сайт, як звярнуцца ў кантакт-цэнтр. «Мы спрабавалі данесці гэтую інфармацыю да маленькіх чытачоў у зразумелай форме. Сімвалічна, што гэтая кніга выйшла ў год якасці. Важна, каб людзі плацілі падаткі, а дзяржава за іх кошт забяспечвала якаснае жыццё сваіх грамадзян», — падкрэсліла Тамара Свідзінская.
Сяргей КУРКАЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
