Адзін з іх пад нумарам 56 знаходзіцца ў сценах магілёўскай гімназіі № 3 па вуліцы Ленінскай, гістарычнае мінулае якой звязана з вядомым вучоным, даследчыкам Поўначы і Паміра, энцыклапедыстам Ота Юльевічам Шмідтам. На ўваходных дзвярах спіс вуліц і дамоў, жыхароў якіх тут чакаюць. Асаблівасць участка ў тым, што за ім замацавана шмат студэнтаў. А яны, як вядома, маюць звычку галасаваць загадзя.
Старшыня выбарчага ўчастка № 56, дырэктар гімназіі Міхаіл Якубук запрашае паглядзець залу для датэрміновага галасавання, дзе можна будзе аддаць свой голас за таго ці іншага кандыдата з 20 да 24 лютага. Яна ўжо цалкам гатовая да прыёму выбаршчыкаў. У асноўны дзень выбараў народ запросяць у больш прасторнае памяшканне. Яно таксама гатовае, напярэдадні яго даабсталююць усім неабходным.
Старшыня камісіі ўдакладняе, што для членаў каманды, якая задзейнічана ў рабоце выбарчай кампаніі, абавязкі не новыя. У гімназіі і ў ранейшыя часы размяшчаўся ўчастак для галасавання, так што алгарытм дзеянняў у цэлым вядомы і зразумелы.
Але кожны ведае, наколькі важнае гэта мерапрыемства, і адрэпеціраваць свае абавязкі яшчэ раз лішнім не будзе. У сувязі з гэтым у гімназіі праводзяцца трэнінгі, на нядаўнім з якіх пабывалі акрэдытаваныя ў адпаведнасці з выбарчым заканадаўствам назіральнікі. Яны таксама пажадалі ацаніць ступень гатоўнасці ўчастка да значнай палітычнай падзеі. Члены камісіі правялі ў іх прысутнасці працэс апячатвання урны, абмяркоўвалі, як будзе ажыццяўляцца датэрміновае галасаванне, а таксама працэдура падлікаў галасоў і нявыкарыстаных бюлетэняў.
— Мы аформілі залу ў адпаведнасці з усімі рэкамендацыямі акруговай выбарчай камісіі, — удакладняе старшыня ўчастковай камісіі. — Забяспечана безбар’ернае асяроддзе, устаноўлены пандусы. На бачным месцы знаходзіцца інфармацыя пра тое, што гэта адзіны дзень галасавання і ўпершыню кандыдаты ў дэпутаты абіраюцца адразу па трох узроўнях — у Палату прадстаўнікоў, абласны і гарадскі Саветы дэпутатаў.
На стале пры ўваходзе ў пакой — дэзсродкі і аднаразовыя маскі. Меры бяспекі ў складаны эпідперыяд ніхто не адмаўляў. Па ходзе руху — стэнды з біяграфічнымі данымі кандыдатаў, у зоне дасягальнасці падрыхтаваныя для азнаямлення Канстытуцыя Рэспублікі Беларусь на трох мовах, Выбарчы кодэкс і памяткі.
— Усім выбаршчыкам, якія сёлета ўпершыню прымаюць удзел у такім адказным мерапрыемстве, будзем уручаць Асноўны Закон Беларусі ў падарунак, — каментуе Міхаіл Якубук. — А такіх у нас 336 чалавек.
Для галасавання прадугледжаны тры кабінкі. Адна з іх — для людзей з абмежаванымі магчымасцямі. Яна шырэйшыя па памерах, каб было дзе развярнуцца на калясцы, а стол для зручнасці зроблены крыху ніжэй.
— Кабінкі адпавядаюць нормам па шырыні і вышыні, — заўважае Міхаіл Якубук. — У кожнай на стале памятка па запаўненні бюлетэня і папераджальная інфармацыя, што відэа- і фотаздымка забаронены. За гэта прадугледжана адказнасць.
Участак забяспечаны камп’ютарам, аргтэхнікай, сейфам, стацыянарным тэлефонам, счытвальнікам для ІD-карт. Выбаршчыкаў з біяметрычнымі пашпартамі становіцца ўсё больш. Да паслуг грамадзян са слабым зрокам — лупы і трафарэты.
Магчыма, хтосьці пажадае азнаёміцца з падрабязнасцямі асвятлення электаральнай кампаніі ў краіне і захоча пагартаць мясцовыя або рэспубліканскія перыядычныя выданні. Калі ласка! Яны ляжаць на палічках у шафе. Побач з карыснай літаратурай.
— Прынцыпова новага нічога не з’явілася, — рэзюмуе Міхаіл Якубук. — Існуе цалкам адпрацаваная схема, і мы яе прытрымліваемся. Адзінае, што памянялася, гэта падыход у афармленні кабінак для галасавання. Пажадана, каб сценкі ў іх былі белага або малочнага колеру, а шторы — чырвонага.
Да датэрміновага галасавання ўжо падрыхтавана празрыстая урна для бюлетэняў. У асноўны дзень іх для зручнасці і большай праходнасці на ўчастку будзе дзве. Для грамадзян сталага ўзросту і тых, хто ў сувязі з захворваннем не зможа наведаць участак, прадугледжаны дзве пераносныя скрыні.
— На 15 лютага трое жыхароў ужо выказалі жаданне прагаласаваць дома, — інфармуе суразмоўнік. — Калі пачнецца датэрміновае галасаванне, народ яшчэ больш актывізуецца.
А 25 лютага, непасрэдна ў Дзень выбараў, на ўчастку будзе не толькі ўрачыста, але і весела. Для выбаршчыкаў тут рыхтуюць змястоўную культурна-забаўляльную праграму і ўмовы для работы выязнога гандлю. Сваёй смачнай прадукцыяй народ будзе частаваць Магілёўскі мясакамбінат. Асноўная пляцоўка для галасавання размесціцца якраз паблізу ад актавай залы і гімназічнай сталовай. Дарэчы, чакаецца, што праз участак № 56 за час выбараў, у тым ліку і ў дні датэрміновага галасавання, пройдзе болей чым 1700 чалавек.
Важна!
Грамадзяне, якія зарэгістраваны па адным адрасе, а збіраюцца галасаваць па іншым, павінны да 24 лютага падысці на найбліжэйшыя ўчастковыя камісіі з пашпартам і дакументам, што пацвярджаюць факт пражывання на дадзеным выбарчым участку — гэта можа быць дакумент куплі-продажу або арэнды жыллёвага памяшкання, камандзіровачнае пасведчанне і гэтак далей — і іх унясуць у спіскі.
Старшыня Магілёўскай абласной выбарчай камісіі Яўген Алекса:
— Пры фарміраванні ўчасткаў для галасавання мясцовыя органы выканаўчай улады зыходзілі з таго, каб яны былі традыцыйныя і ў тых месцах, дзе ўжо існавалі. Каб людзі ведалі, як іх знайсці. Раней кандыдатаў у дэпутаты абіралі паасобна і краіна перманентна знаходзілася ў стане выбараў. Цяпер, у адпаведнасці з папраўкамі ў Канстытуцыю, адзіны дзень выбараў кандыдатаў у Палату прадстаўнікоў і мясцовыя прадстаўнічыя органы будзе праходзіць у апошнюю нядзелю лютага. Асаблівасць у тым, што выбаршчык у Магілёве і Бабруйску атрымае тры віды бюлетэняў, каб прагаласаваць за кандыдата ў дэпутаты ў Палату прадстаўнікоў, аблсавет і гарсавет, а ў сельскай мясцовасці — чатыры, каб выбраць яшчэ і дэпутата ў сельсавет.
Нэлі ЗІГУЛЯ
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
