(Пачатак у нумары за 21 студзеня).
Гарэлка далёка не адразу стала пануючым напоем на шляхецкіх застоллях. Да пачатку ХVІІ стагоддзя яе пілі ў асноўным на паляванні або на вайне, каб зняць сапраўдны мужчынскі стрэс, — «права на гарэлку» не так проста было заслужыць. Асноўнымі напоямі былі віно (асабліва вугорскае) і пітны мёд. Ну, і піва — замест сучасных ахаладжальных напояў, паколькі пры тагачасным узроўні гігіены ваду піць было часам небяспечна. Толькі за чэляддзю прызнавалася права піць гарэлку «проста так». А калі ўжо шляхта гадоў гэтак 400 таму рабіла ласку да гарэлкі, то пілі яе з такіх вось зграбных чар. Менавіта так паважліва — «чара». Пагадзіцеся, нашмат больш салідна, чым «чарка», якая звычайна суправаджае «скварку». Толькі па меры псавання нораваў гарэлка распаўсюджвалася ўсё шырэй — хаця, дарэчы, звычайная «белая» так ніколі і не прыжылася ў прывілеяваных класаў. Шляхта піла моцную амаль выключна ў выглядзе розных настоек на траве і спецыях, на садавіне і ягадах, як салодкіх, так і горкіх. (І амаль кожная традыцыйная настойка лічылася лекамі ад той або іншай хваробы, так што для піцця заўсёды мелася самае «высакароднае» тлумачэнне — «лечымся»!)
Піва даўней пілі з высокіх шкляных куфляў, на ножцы-падстаўцы або без, упрыгожаных роспісам або разьбой, якія зваліся «шкляніцамі». У ХVІІІ стагоддзі, калі амаль усё таварыскае і грамадскае жыццё круцілася вакол піцейных рытуалаў, піва пілі і з больш экзатычнага посуду, мода на які прыходзіла з‑за мяжы. Як сведчыць вядомы летапісец нораваў і звычаяў Саскай эпохі (1697–1763) Енджэй Кітовіч: «Для піва ўжываліся доўгія шкляныя палкі з вялікай булдавешкай на канцы — туды лезла кварта піва; куфлі з трубкамі, праз якія трэба было смактаць пітво, трубы, валторны, паўгарцавыя шкляніцы з трыма абручыкамі. Палкі, кубкі, трубкі рабілі прыкрасць не так самім пітвом, бо няшмат у іх месцілася піва, як нязручным спосабам піцця: п'ючы з палкі або трубкі, трэба было ламацца і выгінацца ўзад. Калі ж хто хацеў адняць ад вуснаў куфаль, а не ведаў, як заткнуць языком трубку, каб перастала цячы піва, дык тут жа абліваўся. Калі ж хто ўзяўся выпіць шкляніцу з абручыкамі, павінен быў абвясціць усёй кампаніі, да якога абручыка адным глытком вып'е; калі не дапіў або замнога выпіў, дык яму адразу далівалі». Апісаная Кітовічам «доўгая шкляная палка з вялікай булдавешкай на канцы» — не што іншае, як славуты англійскі «ярд элю» (уаrd-оf-аlе), адмысловы посуд для жартоўных піўных спаборніцтваў. Стандартная рурка (шкляная трубка — Аўт.) такога посуду мела даўжыню 1 ярд (91 см), а ёмістасць была разлічана на дзве з паловай англійскія пінты (1,42 л).
А вось гэта што за посуд, падобны на пясочны гадзіннік, ведаеце? Гэта так званы «падвойны келіх» — жартоўны сямейны посуд, для мужа і жонкі, таксама тыповы для ХVІІІ стагоддзя. Той, што на малюнку, зроблены на Урэцкай шкляной мануфактуры князёў Радзівілаў. Хоць, як вы ўжо, пэўна, здагадаліся, ніводнага асобніка такога посуду з Урэчча ў Беларусі, на жаль, не засталося.
Пра цікавы посуд, у якім сканцэнтравалася наша гісторыя, можна напісаць яшчэ нямала. Але даводзіцца з сумам адзначыць, што звычайнаму беларусу практычна няма дзе іх убачыць. Большасць годных узораў, нават тых, што выпускаліся на нашай тэрыторыі, — хіба толькі ў музеях суседніх краін. Мабыць, усё, што было да «малянкоўскай» кантаванай шклянкі, не захавалася ў народнай памяці. Як вось гэты, напрыклад, тыповы кілішак-«карчмяк» з грубага шкла, да пачатку ХХ стагоддзя адзін з найболей распаўсюджаных тыпаў посуду для піцця на нашых землях. Ацаніце яго сціплую вытанчанасць.
Кухмістр Верашчака
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?