Гродна прымае эстафету культурнай сталіцы Беларусі

З гэтай нагоды 18 студзеня ў абласным драматычным тэатры адбудзецца святочны канцэрт з удзелам вядомых артыстаў — ураджэнцаў горада над Нёманам Сашы Нэма, Галіны Шышковай, Валерыя Скаражонка, творчых калектываў нацыянальных аб'яднанняў, дзіцячых ансамбляў, групы сучаснай харэаграфіі «ТАД», Гродзенскай капэлы, музычнага тэатра «Рада», ансамбля песні, музыкі і танца «Белыя росы».

Святочная імпрэза распачнецца з тэатралізаванага прадстаўлення, дзе артысты будуць у вобразе гістарычных асоб мінуўшчыны. А знакавыя факты сучаснай гісторыі горада будуць пазначацца ў спецыяльна вырабленай вялікай кнізе, якую ўрачыста прэзентуюць у гэтыдзень на сцэне драмтэатра. Акрамя таго, адбудуцца майстар-класы па розных відах рамёстваў і народнай творчасці, выставы мастацкіх работ гродзенскіх аўтараў, а таксама макетаў будынкаў —помнікаў гістарычнай спадчыны.

Дарэчы, ужо распрацаваны лагатып культурнай сталіцы — 2014, які ўяўляе сабой выяву Гродзенскага абласнога драмтэатра, упрыгожаную беларускім арнаментам.

Лагатып будзе выкарыстоўвацца пры вырабе сувенірнай і рэкламнай прадукцыі, размяшчацца ў грамадскім транспарце і розных установах. Будуць таксама ўстаноўлены білборды з партрэтамі знакамітых гарадзенцаў розных эпох, турыстычныя маршрутызатары, памятныя інфармацыйныя таблічкі. Неўзабаве ў грамадскім транспарце жыхары і госці горада змогуць пачуць вершы вядомых гродзенскіх паэтаў.

Цікавыя навінкі рыхтуюцца і да фіналу традыцыйнага, ужо Х рэспубліканскага фестывалю нацыянальных культур, які адбудзецца ў Гродне 6-7 чэрвеня. Напрыклад, упершыню ў фестывальным фармаце мяркуецца правесці конкурс прыгажосці сярод прадстаўніц нацыянальных аб'яднанняў, а ў яго рамках — прэзентацыі нацыянальных касцюмаў. У парку імя Жана Эмануэля Жылібера будуць прадстаўлены работы ўдзельнікаў творчага пленэру «Гродна вачамі мастакоў розных нацыянальнасцяў». На фестываль запрошаны прадстаўнікі беларускіх нацыянальных аб'яднанняў з Латвіі, Літвы, Польшчы, Расіі і Украіны.

Барыс ПРАКОПЧЫК