Аб гэтым папярэджвае старшы памочнік пракурора Гродзенскай вобласці Вячаслаў ІГНАЦІК на падставе сітуацый, у якія трапляюць удзельнікі падобных здзелак па, здавалася б, вельмі выгаднай схеме. Прычым церпяць і прадаўцы, і пакупнікі аўтамабіляў.
— Вячаслаў Уладзіміравіч, невыпадкова, мусіць, продаж аўтамабіляў па генеральнай даверанасці ў апошнія гады набыў масавы характар. Значыць, выгадна?
— На першы погляд, сапраўды, у выйгрышы абодва бакі такой здзелкі. Новы ўладальнік аўтамабіля можа яго абмяняць, прадаць без узгаднення цаны з уласнікам, на якога зарэгістраваны гэты транспартны сродак — толькі дарыць нельга. Даволі прывабна і тое, што пры продажы аўтамабіля па генеральнай даверанасці не трэба ўказваць грашовую суму здзелкі. Таму пры заключэнні такога дагавора не плаціцца падатак. Акрамя таго, не трэба стаяць у чарзе для зняцця машыны з уліку. Пакупнік можа сам і зняць яе з уліку, і зноў паставіць там, дзе хоча. А прадавец не павінен паведамляць свае даходы ад продажу пры запаўненні дэкларацыі. У такіх «казырных» умовах і цану можна знізіць.
— У чым жа рызыка для ўдзельнікаў падобных здзелак?
— Спачатку пра тое, чым рызыкуе прадавец. Па-першае, яму не трэба забываць, што транспартны сродак — гэта крыніца павышанай небяспекі. Прадаўшы яго па генеральнай даверанасці, уласнік працягвае несці пэўныя абавязкі, адказваць за шкоду, прычыненую гэтым аўтамабілем, калі за рулём быў новы ўладальнік альбо калі той акажацца недасяжным для праваахоўных органаў і суда.
Другое. Як вядома, шмат дзе на дарогах устаноўлены відэарэгістратары, якія фіксуюць нумары машын і перадаюць інфармацыю аб парушальніках у Дзяржаўтаінспекцыю. І не новаму карыстальніку, а менавіта чалавеку, на якога гэты аўтамабіль зарэгістраваны, будуць прад'яўлены прэтэнзіі ў выпадку парушэння правілаў карыстання транспартным сродкам.
Апошнім часам гэта адбываецца вельмі часта. Людзі, якія прадалі аўтамабіль па генеральнай даверанасці, атрымліваюць адміністрацыйныя пратаколы са штрафнымі санкцыямі, пасля чаго скардзяцца ў падраздзяленні ДАІ, органы пракуратуры, суды. Маўляў, магу даказаць, што ў той час, калі было здзейснена гэтае парушэнне, знаходзіўся зусім у іншым месцы — на рабоце, у бальніцы ці нават за мяжой. А хто быў за рулём — не ведаю, бо машыну даўно прадаў па даверанасці. Аднак такія аргументы дапамагаюць рэдка, хіба што калі ўласнік аўтамабіля сам прыводзіць парушальніка ў Дзяржаўтаінспекцыю.
— Атрымліваецца, што новы ўладальнік аўтамабіля, які атрымаў транспартны сродак па даверанасці, нават не адказвае за свае парушэнні...
— З сур'ёзнымі непрыемнасцямі пры такіх здзелках можа сутыкнуцца і пакупнік. Вось прыклад. Аляксандр прадаў Арцёму аўтамабіль маркі «BMW 520і». Быццам і зручна: пры афармленні даверанасці не спатрэбіўся тэхнічны агляд у ДАІ. Праблемы ўзніклі потым, калі Арцём хацеў зняць машыну з уліку. Аказалася, што сапраўдны ідэнтыфікацыйны нумар выразаны, а прывараны іншы, які значыцца па дакументах. Завялі крымінальную справу і Аляксандра прызналі вінаватым у падробцы і знішчэнні нумара кузава ў мэтах збыту транспартнага сродку, аштрафавалі на 26 мільёнаў рублёў. Аднак гэта не палегчыла становішча пакупніка гэтага аўтамабіля, бо ён канфіскаваны ў даход дзяржавы.
Безумоўна, у пацярпелага ёсць права дабівацца праз суд спагнання з нядобрасумленнага прадаўца фактычнай сумы, якую той атрымаў пры падобнай здзелцы. Але даказаць гэта і вярнуць грошы ў такіх выпадках зусім не проста. Прадавец можа заявіць, што грошай не браў, а аддаў сваю машыну ў часовае карыстанне, пакатацца...
Такім чынам, і для прадаўца, і для пакупніка такія здзелкі могуць прывесці да непрыемнасцяў.
Барыс ПРАКОПЧЫК.
Даведка «Звязды»
Генеральная даверанасць на права кіравання і карыстання аўтамабілем рэгламентуецца артыкулам 186 Грамадзянскага кодэкса Рэспублікі Беларусь. Даверанасцю прызнаецца пісьмовае ўпаўнаважанне, якое выдаецца адной асобай другой асобе — для прадстаўніцтва перад трэцімі асобамі (праходжанне тэхагляду транспартнага сродку, страхаванне, рэгістрацыя ў органах Дзяржаўтаінспекцыі). Генеральная даверанасць выдаецца на тэрмін да трох гадоў. Пры гэтым яна не з'яўляецца пацвярджэннем здзелкі куплі-продажу аўтамабіля.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.