Кожны з удзельнікаў пятага абласнога конкурсу прафесійнага майстэрства, які прайшоў на базе Гомельскага дзяржаўнага політэхнічнага ліцэя, упэўнены: без працы, а значыць, і без заробку яны не застануцца ніколі. Іх прафесіі сёння — самыя запатрабаваныя: токар, фрэзероўшчык, слесар-інструментальшчык і электразваршчык.
Раней у прафесійных спаборніцтвах прымала ўдзел толькі моладзь да 31 года. Сёлета Гомельскае аб'яднанне прафсаюзаў — галоўны арганізатар конкурсу — змяніла яго ўмовы. І цяпер кожны, хто лічыць сябе прафесіяналам, даказваў гэта справай. Верагодна, таму і колькасць удзельнікаў, якія прыехалі ў Гомель з самых розных прадпрыемстваў вобласці, значна павялічылася. (Былі нават бацька з сынам — абодва працуюць токарамі на ААТ «Станкагомель».)
Да абласнога тура, дарэчы, дайшлі тыя, хто перамог у адборачных турах на прадпрыемствах. Таму фактычна гаворка ішла пра вызначэнне «лепшых з лепшых». Усе прэтэндэнты спачатку здалі тэарэтычны экзамен, а потым выканалі практычнае заданне.
— конкурс праводзім для таго, каб прапагандаваць рабочыя прафесіі, павысіць іх прэстыж у грамадстве, — адзначае намеснік старшыні Гомельскага абласнога аб'яднання прафсаюзаў Пётр Шылаў. — Між іншым у ліцэі машынабудавання няма дэфіцыту навучэнцаў. Штогод толькі сюды прыходзяць, каб атрымаць рабочую спецыяльнасць, каля 300 чалавек.
На рынку працы рабочыя з высокай кваліфікацыяй цэняцца не менш, чым спецыялісты з вышэйшай адукацыяй. А ў многіх выпадках — і больш. Да таго ж добры зваршчык павінен не толькі выконваць тэхналагічны працэс, але і адчуваць уласцівасці металаў, ведаць асновы супрамату, электратэхнікі і гэтак далей.
Сёлета лепшым у гэтай прафесіі стаў электразваршчык Гомельскага завода металаканструкцый ААТ «Гомельаблдарбуд» Сяргей Піун. Хлопец шэсць гадоў працуе на прадпрыемстве і за гэты час не расчараваўся ў сваім прафесійным выбары. Першы раз з падачы кіраўніцтва ўзяў удзел конкурсе і адразу усіх перамог:
— Мне цікавы сам працэс зваркі, як метал плавіцца... Работа, безумоўна, цяжкая, але ж — мужчынская. Ёсць чаму і надалей вучыцца. Цяпер спадзяюся павысіць свой рабочы разрад.
А вось сёлетні «залаты» токар Аляксандр Кохан, які працуе на «Гомсельмашы», ужо мае 6-ы разрад. За 18 гадоў працы набыў вопыт, у тым ліку і ўдзелу ў конкурсах. І аднойчы ўжо станавіўся пераможцам. Тым не менш вельмі хваляваўся:
— Хочацца ж быць лепшым, і ўсё робіш для гэтага. Мне прыходзілася дапамагаць маладым асвойваць прафесію, і скажу, што сярод юнакоў ёсць дастаткова зацікаўленых у прафесіі. Умовы працы на «Гомсельмашы» значна змяніліся ў лепшы бок за апошнія гады. Усе маюць спецадзенне, тэмпературны рэжым у цэхах нармальны падтрымліваецца. А станочнік заўсёды будзе запатрабаваны, у любыя часы.
— Аднаўленне такой забытай формы работы, як конкурсы прафесійнага майстэрства рабочых, выклікала вялікі інтарэс у моладзі, — гаворыць старшыня Гомельскага абласнога аб'яднання прафсаюзаў Леанід Барабанаў. — Прафсаюзныя камітэты і кіраўнікі прадпрыемстваў падтрымліваюць нашу ініцыятыву. Мы і надалей будзем заахвочваць рабочых, якія маюць жаданне пастаянна ўдасканальвацца ў прафесійным майстэрстве.
Ірына АСТАШКЕВІЧ. Фота аўтара.
Сумесныя праекты ядзерных тэхналогій.