Каля 90% работ на Беларускай АЭС сёлета выканаюць айчынныя спецыялісты
Цяпер на гэтай грандыёзнай будоўлі ў Астраўцы працуюць дзевяць беларускіх будаўнічых і дзве расійскія спецыялізаваныя арганізацыі. Сіламі айчынных спецыялістаў летась выканана больш за 95% ад гадавога аб'ёму ўсіх будаўнічых работ. Агульная колькасць будаўнічага персаналу на пляцоўцы Беларускай АЭС складае больш за 2 тысячы чалавек, дзе задзейнічана 239 адзінак будаўнічай тэхнікі, паведамілі рэдакцыі ў прэс-службе Мінбудархітэктуры.
Сёлета на вышэйзгаданай пляцоўцы будуць выкананы работы па ўзвядзенні будынкаў рэактара і турбіны, вежавай выпарнай градзірні, пырскальных басейнаў энергаблока №1 і пачаты работы па ўзвядзенні падмуркаў пад аб'екты энергаблока №2. Плануецца зманціраваць 27 тысяч тон арматуры і ўкласці 78 тысяч кубаметраў бетону.
Спецыялісты міністэрства адзначаюць, што летась там было асвоена 4 281,3 млрд рублёў, у тым ліку са сродкаў дзяржаўнага экспартнага крэдыту Расійскай Федэрацыі — 3 502,8 млрд. На збудаванні аб'ектаў першага энергаблока зманціравана 7,5 тысячы тон арматуры і ўкладзена 29 тысяч кубічных метраў бетону. У конкурсах на пастаўку абсталявання і матэрыялаў для АЭС прынялі ўдзел 83 беларускія арганізацыі. У выніку таргоў 26 беларускіх прадпрыемстваў і арганізацый заключылі дагаворы на пастаўку абсталявання, матэрыялаў і аказанне паслуг для ўзвядзення атамнай станцыі на суму 3,795 млн долараў, што складае каля 30% усіх паставак закупленага абсталявання 4-га класа бяспекі (агульнапрамысловай).
Увогуле, на будаўніцтве Беларускай АЭС сёлета плануецца асвоіць 470 млн долараў. Пры гэтым беларускія будаўнікі выканаюць больш за 86% аб'ёму работ, астатнія 13% — расійскія арганізацыі.
Сяргей КУРКАЧ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?