Акцыя «Белая Русь» — з любоўю да дзяцей» становіцца добрай традыцыяй
У дзень Незалежнасці ў сталічным раддоме №7 нарадзілася пятнаццаць новых жыхароў Мінска: 8 хлопчыкаў і 7 дзяўчынак. Старшыня РГА «Белая Русь» Аляксандр Радзькоў і міністр аховы здароўя Васіль Жарко павіншавалі мам, якія падарылі свету новае жыццё пад стрэлы святочнага салюта.
Для Рэспубліканскага грамадскага аб'яднання акцыя «Белая Русь» — з любоўю да дзяцей» стала традыцыйнай: шосты год запар яго актывісты разам з прадстаўнікамі ўлады краіны і медыцынскімі работнікамі ўручаюць падарункі жанчынам, якія 3 ліпеня не святкавалі Дзень Незалежнасці разам з усімі, а вырашалі не менш важную для краіны задачу — нараджалі дзяцей. Старшыня РГА «Белая Русь» Аляксандр Радзькоў адзначыў, што, па статыстыцы, другіх і трэціх дзяцей у сем'ях беларусаў стала больш: «Гэта сведчыць аб тым, што сем'і, якія прымаюць рашэнне завесці другое дзіця, давяраюць дзяржаве, яны ўпэўнены, што ў нашай краіне будучыня іх дзяцей будзе шчаслівай». Дарэчы, Аляксандр Радзькоў, які стаяў ля вытокаў акцыі, 1 верасня гэтага года пойдзе ў школу з дзецьмі, што нарадзіліся 6 гадоў таму, 3 ліпеня 2009. Менавіта тады акцыю правялі ўпершыню. «Белая Русь» ужо рыхтуе для першакласнікаў прыемныя падарункі.
У апошнія гады ў краіне назіраецца станоўчая дынаміка прыросту насельніцтва. Гэтаму спрыяе прыярытэтная ўвага ўлад да аховы мацярынства і дзяцінства. Сёлета за 5 месяцаў у Беларусі нарадзілася на 807 дзяцей больш, чым за аналагічны перыяд мінулага года. Па інфармацыі Сусветнай арганізацыі аховы здароўя, Беларусь увайшла ў спіс 50 краін свету, дзе забяспечваецца бесперашкодны доступ да мацярынства. За апошнія тры гады ў Беларусі не зафіксавана ніводнага выпадку смерці маці падчас і пасля родаў. Смяротнасць немаўлят у краіне складае 3 выпадкі на тысячу дзяцей, якія нарадзіліся жывымі.
Два новыя раддамы з'явяцца ў краіне сёлета: бабруйскі раддом ужо ўведзены ў эксплуатацыю, а раддом у горадзе Брэсце амаль гатовы прымаць першых будучых мам.
Любоў Бяляева.
Фота аўтара.
Святочныя наборы адзення для нованароджаных учора былі ўручаны маці 15 дзетак у Мінскім абласным раддоме ад абласной арганізацыі РГА «Белая Русь». Гэта стала працягам адной з самых прыкметных акцый грамадскай арганізацыі ў святочныя ліпеньскія дні.
— Нараджэнне кожнага чалавека ў нашай краіне — гэта ўжо само па сабе свята і для сям'і, і для ўсёй Бацькаўшчыны, — падзяліўся з журналістамі эмоцыямі старшыня Мінскай абласной арганізацыі РГА «Белая Русь», намеснік старшыні Палаты прадстаўнікоў Нацыянальнага сходу Віктар ГУМІНСКІ. — Акцыя ж «Белая Русь — з любоў да дзяцей» — не толькі віншаванні маці, якія нарадзілі дзяцей у Дзень Рэспублікі, але і магчымасць звярнуць увагу грамадскасці да дэмаграфічнай праблемы нашай краіны. Пра яе кажа кіраўніцтва Беларусі, для яе вырашэння прымаюцца меры на дзяржаўным узроўні. І дзякуючы ўсім станоўчыя зрухі ёсць. Сёлета за першае паўгоддзе толькі ў гэтай клініцы нарадзілася на 456 дзяцей больш, чым за адпаведны леташні перыяд.
Мінскі абласны перынатальны цэнтр аказвае медыцынскую дапамогу жанчынам і іх дзеткам у найбольш складаных выпадках. 15 дзетак за дзень — гэта звычайная колькасць нованароджаных для гэтай клінікі ў апошні час. Сёлета за першыя шэсць месяцаў тут з'явіліся на свет 34 двойні, 16 немаўлят важылі пры нараджэнні менш за 1 кг. Палова ўсіх неданошаных дзетак Міншчыны нарадзіліся і былі выхаджаны менавіта ў абласным раддоме. Яшчэ адна лічба, якой ганарацца медыкі гэтай установы, — самы нізкі сярод абласных перынатальных цэнтраў паказчык аперацый кесаравага сячэння.
Разам са старшынёй абласной арганізацыі РГА «Белая Русь» жанчын віталі старшыня Мінскага абласнога Савета дэпутатаў Іван Ліпніцкі, старшыня Мінскага раённага Савета дэпутатаў Сяргей Шаблыка і старшыня Мінскай раённай арганізацыі РГА «Белая Русь» Галіна Харытонава. Пасля цёплых слоў у адрас маці і ўручэння падарункаў госці і віноўніцы ўрачыстасці сфатаграфаваліся разам на памяць. І потым асобна прадстаўнікі «Белай Русі» сфатаграфаваліся з Юліяй Пяткевіч, жыхаркай аграгарадка Ратамка, якая нарадзіла 3 ліпеня сваё трэцяе дзіця.
Вольга МЯДЗВЕДЗЕВА.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?