«Мінімальныя прахадныя балы пры паступленні ў вышэйшыя навучальныя ўстановы могуць быць скарэктаваны», — заявіў на форуме педагагічных работнікаў Магілёўскай вобласці міністр адукацыі Беларусі Сяргей МАСКЕВІЧ.
«І калі мы пойдзем на гэты крок, то толькі з мэтай павышэння якасці беларускай адукацыі», — падкрэсліў міністр.
На думку кіраўніка галіны, у нас пакуль няма падстаў казаць пра зніжэнне якасці адукацыі. Па міжнародных ацэнках, канкурэнтаздольнасць беларускай адукацыі ў апошнія гады паступова расце. Хутчэй, можна разважаць пра абясцэньванне пэўных дыпломаў, да чаго прывяла масавасць вышэйшай адукацыі ў нашай краіне.
Нагадаем, што сёлета цалкам запоўніць бюджэтныя месцы падчас першай хвалі залічэння ўдалося толькі пяці дзяржаўным ВНУ. Таму давялося праводзіць дабор на вакантныя бюджэтныя месцы. Напрыклад, абітурыентам, якія паступалі ў рамках дадатковага набору на ваенныя, спартыўныя і сельскагаспадарчыя спецыяльнасці, дастаткова было мець у сертыфікаце ўсяго 3 балы. Прычым гэта тычылася ўсіх экзаменацыйных дысцыплін...
Да таго ж дэфіцыт абітурыентаў фактычна прывёў да таго, што сёлета амаль усе ахвотныя маглі стаць студэнтамі платнай формы навучання. Цікава, што колькасць платных месцаў у некаторых дзяржаўных ВНУ істотна перавышала колькасць бюджэтных месцаў па той жа спецыяльнасці. Адзінай перашкодай стала мінімальная планка, устаноўленая для ўдзельнікаў цэнтралізаванага тэсціравання. Для маладых людзей, гатовых плаціць грошы за сваё навучанне, парог зніжаць не сталі. Напэўна, таму недзяржаўныя ВНУ ўвогуле засталіся без абітурыентаў?
Надзея НІКАЛАЕВА
Сумесныя праекты ядзерных тэхналогій.