7 верасня пад Шчучынам пройдзе першы конны фестываль
Ініцыятары мерапрыемства — уладальнікі дзвюх аграсядзіб у Шчучынскім раёне — «Конны двор «Кентаўр» і «Бабровая даліна», якія спецыялізуюцца ў тым ліку на конным спорце і верхавой яздзе. Яны вырашылі ў Год каня арганізаваць свята для вяскоўцаў і гасцей раёна, падарыць ім магчымасць пазнаёміцца з відовішчнымі відамі коннага спорту і атрымаць радасць зносін з прыродай і жывёламі.
— У праграме свята — выездка коней, канкур, джыгітоўка, эстафета, выступленні фальклорных калектываў, рыцарскага клуба, сярэднявечныя танцы і гульні, конкурсы з удзелам гледачоў, дэгустацыя мёду і адвараў з зёлак... Усе ахвотныя атрымаюць кансультацыі па конегадоўлі і пазнаёмяцца з рознымі пародамі коней, — паведаміў гаспадар аграсядзібы «Бабровая даліна» Алег СЯМАШКА.
Фестываль пачнецца ў вёсцы Кульбачына 7 верасня ў 11.00. Уваход для дарослых каштуе 40 тысяч рублёў, для дзяцей — 20 тысяч.
Паводле слоў гаспадыні аграсядзібы «Конны двор «Кентаўр» Людмілы БАСАК, у перспектыве конны фестываль можа стаць традыцыйным — а значыць, яшчэ адной цікавосткай, якая прываблівае турыстаў у Шчучынскі раён.
Надзея ПАЎЛАВА
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.