Напэўна, многія чулі фразу: «Хто не жыў у інтэрнаце — той студэнцкага жыцця не бачыў». Паспрачацца з гэтай думкай, вядома, можна, але ж пагадзіцеся: не ва ўсіх інтэрнатах прысутнічае асаблівая, непаўторная атмасфера — атмасфера студэнцтва, назавём яе так. А вось жыхарам інтэрната №2 Беларускага дзяржаўнага ўніверсітэта інфарматыкі і радыёэлектронікі пашанцавала і з дахам над галавой, і з той самай атмасферай...
Нядаўна інтэрнат адкрыўся пасля капітальнага рамонту. Ва ўрачыстасцях узялі ўдзел прадстаўнікі рэктарата, Мінгарвыканкама, намеснік міністра адукацыі Віктар Якжык, будаўнікі і студэнты.
Інтэрнат №2 БДУІР разлічаны на 1225 месцаў. Кожны з 245 блокаў 14-павярховага корпуса мае асобны санвузел і душавую кабіну. Пакоі пераважна двух- і трохмесныя. Чатыры з іх прыстасаваны для людзей з абмежаванымі магчымасцямі.
Будаўнічыя работы на аб'екце вяліся каля трох гадоў. Гэта нядоўга, улічваючы, што рамонт праводзіўся толькі з частковым адсяленнем студэнтаў. У БДУІР увогуле надаецца шмат увагі такому важнаму пытанню, як забеспячэнне іншагародніх студэнтаў жыллём. Адрамантаваны інтэрнат — істотны ўклад у вырашэнне гэтай праблемы. З яго ўводам у эксплуатацыю паказчык забяспечанасці студэнцкай моладзі месцамі ў інтэрнатах павялічыўся да 70 працэнтаў. Нагадаем, што ў 2010 і 2012 гадах у БДУІР былі адкрыты два новыя інтэрнаты (адзін з іх — у Студэнцкай вёсцы).
Рэктар БДУІР Міхаіл БАТУРА ацаніў абноўлены інтэрнат на «дзявятку» па дзесяцібальнай шкале. Вельмі падабаецца новае жыллё і студэнтцы факультэта камп'ютарнага праектавання БДУІР Дар'і Астрэйцы:
— Зараз я вучуся на чацвёртым курсе. Два гады была вымушана здымаць кватэру, а з мінулага года жыву тут. Вельмі задаволена створанымі ўмовамі: цудоўнае абсталяванне, новая мэбля, душ, ванны пакой, выдатная гукаізаляцыя. Праўда, прадугледжана толькі адна кухня на «крыло», але я не назвала б гэта праблемай: чэргаў, каб прыгатаваць сабе ежу, няма. За інтэрнат плачу 120 тысяч рублёў у месяц. І з суседзямі мне пашанцавала.
— Яшчэ не ўсе паспелі засяліцца, таму што ў гэтым інтэрнаце будуць жыць і замежныя студэнты, а яны засяляюцца да лістапада, — патлумачыў дырэктар студэнцкага гарадка Анатоль ЛУЦКІ. — Сёння тут жывуць прадстаўнікі ўсіх курсаў: ад першага да пятага... Знайшлося месца і для шасці студэнцкіх сем'яў. Я бачыў, што тут было чатырнаццаць гадоў таму і якім чынам гэтае месца змянялася з цягам часу.
Капітальны рамонт урад узяў пад свой кантроль. Пад канкрэтныя праграмы выдзяляліся грошы: напрыклад, вонкавыя работы (устаноўка шклопакетаў і ўцяпленне) былі зроблены яшчэ ў першы этап рамонту ў пачатку 2000-х гадоў. Потым быў распрацаваны праект, які прайшоў экспертызу. На правядзенне капітальнага рамонту са сродкаў дзяржаўнага бюджэту было выдаткавана каля 40 мільярдаў беларускіх рублёў.
Вольга ШЫЛА
Летась зафіксавана зніжэнне колькасці выпадкаў гібелі на вытворчасці.
Карэспандэнты «Звязды» пабачылі, як праходзяць рэпетыцыі.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.