Вёска Дубітава, што ў Івацэвіцкім раёне, — старажытная, праз некалькі гадоў будзе адзначаць сваё 500-годдзе. У 60-70-х гадах тут пражывала больш за чатыры сотні чалавек, гэта быў час росквіту вёскі. Сем'і ў асноўным былі шматдзетныя, па 7-8 дзяцей, а ў некаторых і па 12. Але дарог добрых не было, як кажуць старажылы гэтага краю, з балота было не выбрацца ў вясновы і асенні час. А потым з'явіліся дарогі, але па іх маладыя паўцякалі з вёскі ў пошуках гарадскіх выгод...
Сёння тут жывуць толькі 36 чалавек. Акрамя адной сям'і, усе пенсіянеры. Затое месцічы больш за некаторых маладых умеюць радавацца жыццю і цаніць сямейныя каштоўнасці. Найстарэйшая сямейная пара Турчыных з задавальненнем успамінае сваю маладосць:
— Пасля школы я паехала на Урал, каб вярнуцца з заробкаў з пашпартам, — расказвае Ганна Дзмітрыеўна Турчына. — Працавала там у дзіцячым садку, а праз сцяну жыла старшыня сельсавета. Мы пасябравалі, і яна дапамагла мне зрабіць пашпарт. Калі вярнулася з Урала, то Іван ужо быў у арміі. Яго забралі ў маракі на чатыры гады. Як цяпер памятаю: ён вярнуўся з войска і пасля танцаў бег за мною так, што аж марская фуражка яго зляцела з галавы.
Маладыя людзі сталі сустракацца, а праз восем месяцаў вырашылі пажаніцца. Сказалі бацькам, і тыя заслалі сватоў. Вяселле ў Ганны Дзмітрыеўны і Івана Пятровіча адбылося больш за паўвека таму — у 1959 годзе, на восьмага сакавіка.
Вяселле ў тыя часы ладзілася на дзве хаты: у першы дзень — у маладой, назаўтра — у маладога. Іван быў у сям'і старэйшы з пяцярых дзяцей, а Ганна ў маці была восьмай. Старэйшыя браты і сёстры былі не супраць, што Ганна не пайшла жыць да свекрыві пасля вяселля, а наадварот, мужа ўзяла ў прымакі. Турчыны, да слова, і сёння жывуць у бацькоўскай хаце Ганны Дзмітрыеўны.
Маладых пасля вянчання бацькі сустракалі на парозе з хлебам і соллю. Караваі рабілі каравайніцы, а хлеб пякла сама маці Ганны Дзмітрыеўны. Наогул, яна была здатнай пекаркай: яшчэ пры Польшчы ёй хлеб заказвалі настаўнікі, такі ён атрымліваўся ўдалы. А каравайніцы пяклі не адзін каравай, а некалькі, каб хапіла ўсім гасцям. Каб атрымліваўся высокі, не патрэсканы, спявалі песні. Упрыгожвалі каравай косамі, кветкамі.
Без шампанскага, але з кісялём
— Мне падышла вясельная сукенка маёй сястры, — узгадвае Ганна Турчына. У Галынцы сястра і вэлюм узяла для мяне. Вэлюм у нас называлі «валя». Туфлі былі новыя, але чорныя. Белых не было ні ў кога. «Валю» напрыканцы вяселля дружкі па парадку прымяралі, танцавалі ў ёй.
— Ці багаты ладзілі стол?— цікаўлюся.
— Халадзец, мяса, катлеты смажылі. А вось што такое галубцы, не ведалі. Кісель варылі, толькі не такі, як цяпер вараць, а з аўсянай мукі. І саладуху варылі. Нават не ведаю, як растлумачыць — яна падобна на кашу. А пілі самагонку, віна толькі крыху прыкуплялі. Пра шампанскае таксама не ведалі.
— Жартавалі на вяселлі?
— А як жа! Бывала, толькі пойдзеш танцаваць, як тваё месца займаюць падробныя нявеста і жаніх: нявеста — пераапрануты мужчына, а жаніх — пераапранутая жанчына. Гэта пара магла быць з ліку гасцей, а магла быць і з чужых. Тады сват і маладзіца выкуплялі месцы нашы. За гарэлку, за грошы, за закуску, што скажуць, тое і павінны даць, крыху патаргаваўшыся.
Пачастунак па правілах
— Адорвалі маладых, як каравай дзялілі?
— Каравай у нас выносіў асаблівы чалавек. Яго называлі сёмак. Ён казаў: «Дазвольце, маці і бацько, каравай пачаці». І так тры разы пытаўся ён дазволу, а потым каравай рэзаў па старшынстве роду. Спачатку казаў: «Ёсць у нашай маладой бацько і маці. Просім на падарунок». І так усю радню па парадку клікаў, а потым дружак, суседзяў і г.д.
...А яшчэ, прыгадваюць Турчыны, акрамя каравая, майстрыхі пяклі птушку ўдода і яго ўпрыгожвалі саломкай, стужкамі. Вочы — з чорнай фасолі, а хлопцы-дружкі павінны былі птушку гэтую ўкрасці, каб атрымаць за яе выкуп.
— Ну і як, у маладых жыццё ўдалося?
— Я не шкадую, што пайшла за Івана, бо той кавалер, з якім я гуляла, ужо на тым свеце, а мы жывём 55 гадоў разам. Бедна ці не бедна, а грошай чужых не пазычалі, каб ажаніць ці ў армію выправіць дзяцей. У нас ужо чацвёра ўнукаў, пяць праўнукаў.
— Муж не раўнівы? — дапытваюся.
— Пасля свайго вяселля я маладзіцай гуляла на вяселлях пяць разоў. Маладзіца — гэта на вяселлі «пара» свату. Я спачатку баялася, што танцую на вяселлі ўсё са сватам, думала, што зараз муж прыраўнуе, а ён толькі ўсміхаецца. На трэці раз адмовіла свату, маўляў, ногі баляць, а муж кажа: «Ідзі, табе ж так падабаецца танцаваць». Не раўнівы аказаўся — каб толькі мне добра было, думаў. А я так любіла танцаваць! І вальс, і польку-бабачку, падыспань, кракавяк... Муж запрашаў толькі на вальс і факстрот.
Удод на ўспамін
...Аб традыцыі пячы ўдода на вяселле загадчыца Дубітаўскага Дома сацыяльных паслуг Наталля Клютко распытвала ўсіх доўгажыхароў вёскі, сваіх блізкіх, шукала вясельныя традыцыі ў інтэрнэце.
— Чаму ўдод, а не якая іншая птушка? — разважае Наталля Міхайлаўна. — Знайшла карцінкі: удод сапраўды прыгожы, яркі, з чорна-аранжавым апярэннем, з хахалком і загнутай дзюбай. Гэтая птушка, дарэчы, была аб'яўлена летась птушкай года. Але калі гаварыць пра вясельныя традыцыі, то, магчыма, за незвычайнасць і неардынарную прыгажосць яе людзі выбралі для адмысловага абраду — звярнуць увагу на тых, каго не заўсёды запрашалі на вяселле, ці на тых, каго забылі запрасіць. Яны пяклі птушку і прыходзілі з такім заўважным падарункам. Гаспадары ў адказ, каб схаваць сваю непрадбачлівасць і разгубленасць, адкупляліся гасцінцамі са стала. Людзі, што прыносілі ўдода, дзякавалі песнямі і ішлі гуляць сваёй кампаніяй. З часам непазваныя госці сталі саромецца напамінаць аб сабе такім чынам, але каравайніцы пачалі самі пячы птушку, каб захаваць такую яркую традыцыю і лішні раз павесяліць гасцей.
Валянціна БОБРЫК.
Вясельныя фота прадастаўлены Наталляй Клютко.
Сумесныя праекты ядзерных тэхналогій.