Нядаўна ў сталічных аддзяленнях паштовай сувязі сталі з'яўляцца новыя тэрміналы, з дапамогай якіх можна самастойна адпраўляць карэспандэнцыю вагой да двух кілаграмаў. «Звязда» апрабавала новую прыладу самаабслугоўвання.
— Тэрміналы SMАRT-роst мы ўстанаўліваем для зручнасці нашых кліентаў, каб яны маглі з камфортам і без чаргі дасылаць свае адпраўленні, — расказвае начальнік упраўлення паштовых і фінансавых паслуг Алена ДРАЗДОВІЧ.
Першы тэрмінал самаабслугоўвання ўсталявалі на мінскім Галоўпаштамце яшчэ сёлета ў чэрвені, але паўнавартаснае выкарыстанне такіх прылад пачынаецца толькі цяпер. За гэты час па Мінску ўжо паставілі 40 тэрміналаў у розных, пераважна буйных, аддзяленнях паштовай сувязі. Пакуль што яшчэ спецыялісты адсочваюць водгукі кліентаў, але плануецца, што неўзабаве такія апараты з'явяцца і ў іншых рэгіёнах.
Новы сэрвіс уяўляе сабой прыстасаванне, аснашчанае вагай, прынтарам, накапляльнік для захоўвання паштовых адпраўленняў з праграмным забеспячэннем, якое звязана з плацежна-даведачным тэрміналам.
Усё афармленне пісьма ўкладаецца ў пяць немудрагелістых крокаў. Начальнік упраўлення дэманструе нам, як працуе навінка.
— Па-першае, неабходна ліст пакласці на вагу, — гаворыць Алена Драздовіч і кладзе канверт на паверхню прылады. Тут жа высвечваецца яго вага, і мы працягваем аперацыю.
На экране плацежна-даведачнага тэрмінала тым часам трэба выбраць рэжым: «Паштовыя паслугі» і «Прыём заказнога пісьма». Далей камп'ютар папросіць указаць адпраўніка: фізічную ці юрыдычную асобу. Паколькі мы здзяйсняем індывідуальную адпраўку, то, як фізічная асоба, павінны ўказаць звесткі пра сябе: прозвішча, імя, імя па бацьку, а таксама адрасы — спачатку адпраўніка, пасля атрымальніка. Усё тое самае, што мы звычайна пішам на канвертах, цяпер набіраем на экране тэрмінала.
— Калі 10 лістоў трэба даслаць, то нямала ўводзіць давядзецца, — заўважае мужчына, які назірае за дэманстрацыяй. Начальнік упраўлення пагаджаецца, але ж ці менш нам даводзіцца пісаць, калі мы пазначаем адрасы ўручную?
Далей неабходна выбраць спосаб аплаты. Разлічвацца за такую паслугу можна як наяўнымі грашыма праз купюрапрымальнік, так і плацежнай карткай. Алена Драздовіч выбірае апошні варыянт і аплачвае аперацыю. Дарэчы, каштуе яна столькі ж, колькі тая самая паслуга пры апрацоўцы аператарам: да 20 грамаў — 13200 рублёў, а пасля за кожны наступны грам налічваецца 300 рублёў.
Заўважаю, што купюрапрымальнік разлічаны на асігнацыі наміналам ад адной да 200 тысяч рублёў. Рэшты аўтамат не выдае.
— Як жа можна ўнесці 200 рублёў? — запытваю ў Алены Драздовіч.
— Неабходна ўнесці 14000, а астатняя сума залічваецца на мабільны тэлефон. Пры афармленні ліста на тэрмінале адкрываецца дадатковае акенца, дзе неабходна ўвесці нумар тэлефона, і рэшта залічваецца на яго.
Пасля ўвядзення рэквізітаў і афармлення ліста раздрукоўваюцца квітанцыя і адрасны ярлык, які трэба наклеіць на канверт. На гэтым ярлыку ўказваецца штрых-код, пры дапамозе якога можна адсочваць шлях ліста ў анлайн-рэжыме на сайце www.bеlроst.bу альбо праз тэрмінал. Цяпер ліст гатовы да адпраўкі і яго трэба ўкінуць у накапляльнік для захоўвання адпраўленняў.
— Тэрміны перасылкі такіх адпраўленняў не адрозніваюцца ад тых, якія афармляе аператар, — заўважае Алена Драздовіч.
Начальнік упраўлення тлумачыць, што выемка лістоў з накапляльніка адбываецца да моманту абмену з поштай: прасцей кажучы, пакуль па заказныя лісты не прыедзе паштовая машына, якая павязе іх на сартаванне.
Дарэчы, хутка мінчане змогуць не толькі самастойна адпраўляць карэспандэнцыю, але і атрымліваць яе — пры дапамозе паштаматаў. Першую такую прыладу ўжо ўстанаўліваюць на прадпрыемстве «Мінская пошта». Сутнасць сэрвісу заключаецца ў тым, што, калі пасылка паступае на гэты тэрмінал, атрымальніку прыходзіць SMS-паведамленне з нумарам доступу да ячэйкі. Кліент прыходзіць да паштамата, выбірае паслугу «Выдача паштовага адпраўлення», уводзіць код, які прыйшоў яму на тэлефон. Пасля гэтага ячэйка адчыняецца і адпраўленне можна забіраць.
Дзіяна СЕРАДЗЮК
sеrаdzуuk@zvіаzdа.bу
Фота Яўгена ПЯСЕЦКАГА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
