Наталля Качанава: «Галоўнае — гэта чалавек, яго патрэбы»

Урад распрацаваў план рэалізацыі Указа №78 «Аб мерах па павышэнні эфектыўнасці сацыяльна-эканамічнага комплексу Рэспублікі Беларусь». Пра гэта паведаміла намеснік прэм'ер-міністра Наталля Качанава па выніках сустрэчы з кіраўніцтвам Мінгарвыканкама, паведамілі ў прэс-службе ўрада.

«Указам №78 прадугледжана сацыяльная падтрымка грамадзян. Гэта, перш за ўсё, малазабяспечаныя, сем'і, што выхоўваюць дзяцей, пенсіянеры. Таму ўрадам распрацаваны план па рэалізацыі ўказа, — сказала Наталля Качанава. — Галоўнае — гэта чалавек, яго патрэбы. Пры рэалізацыі плана мерапрыемстваў акцэнт будзе зроблены на падтрымку малазабяспечаных людзей, тых, хто маюць патрэбу ў дапамозе».

Віцэ-прэм'ер звярнула ўвагу, што на падтрымку малазабяспечаных людзей будуць накіраваны сродкі. «Гэта дзяржаўная адрасная сацыяльная дапамога, таксама будзе павялічаны бюджэт пражытковага мінімуму, і, адпаведна, узрастуць дапамогі, якія выплачваліся, зыходзячы з БПМ. Будзе аказана падтрымка па аплаце паслуг ЖКГ тым грамадзянам, якія будуць у гэтым мець патрэбу», — удакладніла намеснік прэм'ер-міністра, паведамляе БЕЛТА.

Адносна развіцця Мінска, яна адзначыла, што беларуская сталіца валодае вялікім патэнцыялам росту. Звярнуўшы ўвагу на адзін з пунктаў дакумента, які датычыцца скарачэння выдаткаў, Наталля Качанава заўважыла, што рэзервы ў гэтым кірунку ёсць. «Гэта тыя плошчы на прадпрыемствах і ў арганізацыях горада, якія неэфектыўна выкарыстоўваюцца, аптымізацыя структур, дублюючых функцый, якія ёсць у некаторых арганізацыях», — заўважыла віцэ-прэм'ер. «Каб прадпрыемства працавала эфектыўна, трэба ўважліва паглядзець, з чаго складаюцца выдаткі. Бо пры роўных умовах гаспадарання ёсць шмат прадпрыемстваў, якія працуюць паспяхова, з прыбыткам, рэнтабельна, выпускаюць запатрабаваную на ўнутраным і знешнім рынках прадукцыю. Гэта вельмі важна ў цяперашняй сітуацыі», — падкрэсліла Наталля Качанава.

Яна таксама нагадала, што ацэньваць эфектыўнасць працы кіраўнікоў усіх узроўняў будуць, зыходзячы з вынікаў па прыцягненні прамых замежных інвестыцый, па рацыянальным імпартазамяшчэнні, росце і дыверсіфікацыі экспарту, а таксама стварэнні новых працоўных месцаў. «У Мінску ў 2016 годзе трэба стварыць 13,3 тыс. новых працоўных месцаў. Адно з заданняў, якое стаіць перад кіраўнікамі рэгіёнаў краіны, — гэта стварэнне працоўных месцаў, каб кожны жыхар меў права працаваць», — падкрэсліла віцэ-прэм'ер.