Адзін з найбуйнейшых навуковых і вучэбных цэнтраў у заходнім рэгіёне краіны — Брэсцкі дзяржаўны тэхнічны ўніверсітэт вядзе сваю гісторыю ад 1 красавіка 1966 года. За паўстагоддзя ў ВНУ падрыхтавана амаль 72 тысячы спецыялістаў.
Першы прарэктар універсітэта Вячаслаў ДРАГАН (на фота) расказвае, што ў забеспячэнні навуковага і адукацыйнага працэсаў зараз задзейнічаны 20 дактароў і 170 кандыдатаў навук, якія працуюць на 33 кафедрах. Цяпер ва ўніверсітэце займаецца каля 9 тысяч студэнтаў дзённай і завочнай формаў навучання, а таксама 300 замежных грамадзян з Кітая, Туркменістана, Турцыі, Нігерыі, Расіі, Таджыкістана, Казахстана, Егіпта, Марока і Лівана. Адукацыя БрДТУ карыстаецца попытам і папулярнасцю ў свеце, таму геаграфія экспарту адукацыйных паслуг год ад года пашыраецца.
Установа вядзе падрыхтоўку па 29 спецыяльнасцях першай ступені навучання і па 17 спецыяльнасцях другой ступені (магістратура). Цяпер у структуры ўніверсітэта восем факультэтаў: будаўнічы, эканамічны, машынабудаўнічы, электронна-інфармацыйных сістэм, інжынерных сістэм і экалогіі, завочнага навучання, інавацыйнай дзейнасці, кіравання і фінансаў, факультэт давузаўскай падрыхтоўкі. На кафедрах установы выконваюцца фундаментальныя, пошукавыя і прыкладныя даследаванні ў галіне архітэктуры, электронікі, машынабудавання, эканомікі і экалогіі.
У традыцыю Брэсцкага тэхнічнага даўно ўвайшло міжнароднае супрацоўніцтва. БрДТУ падтрымлівае сувязі з установамі Германіі, Францыі, Польшчы, Украіны, Расіі і іншых краін. Практыкуюцца сумесныя навуковыя даследаванні, абмен групамі студэнтаў, стажыроўкі выкладчыкаў і навучэнцаў. Установа ўключана ў сетку Універсітэтаў рэгіёна Балтыйскага мора (Thе Bаltіс Sеа Асаdеmу), якая створана па ініцыятыве Ганзейскага парламента (Гамбург, Германія). Зараз сетка аб'ядноўвае каля трох дзясяткаў універсітэтаў з Беларусі, Расіі, Польшчы, Латвіі, Літвы, Эстоніі, Фінляндыі.
Літаральна нядаўна на навукова-практычную канферэнцыю па актуальных праблемах захавання навакольнага асяроддзя даклады прадставілі 120 вучоных з васьмі краін свету. Большасць з іх прынялі ўдзел у навуковых дыскусіях форуму.
Варта сказаць, што актыўную дзейнасць па розных кірунках вядуць і студэнты ВНУ. Гаворка ідзе найперш пра дзевяць студэнцкіх навукова-даследчых лабараторый і творчых аб'яднанняў. Напрыклад, лабараторыя «Робататэхніка» распрацоўвае метады і алгарытмы кіравання аўтаномнымі мабільнымі робатамі. Летась яна заняла першае месца на чэмпіянаце Wоrld Skіlls у Беларусі, другое месца сярод каманд краін СНД і прыняла ўдзел у сусветным чэмпіянаце, што праходзіў у Бразіліі.
Студэнцкае жыццё навучальнай установы можна назваць цікавым і змястоўным. Маладыя людзі маюць самыя розныя магчымасці для самаразвіцця. Вялікай папулярнасцю ў юнакоў і дзяўчат карыстаюцца студэнцкія атрады. У Брэсцкім тэхнічным універсітэце першымі ў Беларусі адрадзілі будатрадаўскі рух. На рахунку ўніверсітэцкага атрада значыцца ўдзел ва ўзвядзенні дзясяткаў аб'ектаў і не толькі ў нашай краіне. Напрыклад, пачынаючы з 2014 года кожнае лета накіроўваюцца атрады ў Астравец на будоўлю Беларускай АЭС. Там ужо папрацавалі больш за 350 студэнтаў. А некалькі гадоў таму атрад у складзе 26 студэнтаў-старшакурснікаў выязджаў у Венесуэлу. Два месяцы хлопцы працавалі памочнікамі майстроў і прарабаў на будаўніцтве жылых дамоў і аб'ектаў сацыяльна-культурнага прызначэння ў Каракасе.
У справе падрыхтоўкі спецыялістаў тэхнічнага профілю студэнцкія атрады маюць асаблівае значэнне, яны становяцца выдатнай практыкай для будучых інжынераў.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
