Незвычайны фэст для аматараў стрытфуду ў беларускай сталіцы ўпершыню адбыўся летась, прадоўжылася эстафета ў чэрвені гэтага года. Трэці фестываль па сутнасці закрыў сезон.
Асноўная мэта фэсту засталася першапачатковай: арганізатары знаёмяць гараджан з якаснай і разнастайнай вулічнай ежай, імкнуцца паказаць, што яна можа быць не толькі простай і даступнай, але смачнай і карыснай. На фестывальнай пляцоўцы сабраліся беларускія брэнды, якія прадстаўляюць нацыянальную кухню розных краін свету. Сярод удзельнікаў - не толькі прадстаўнікі грамадскага харчавання, але і гастраэнтузіясты. Для іх ежа – сур’ёзнае захапленне, якому яны аддаюць шмат часу і сіл.
- Думаю, у нас атрымалася сабраць максімальную разнастайнасць фарматаў вулічнай ежы ў адным месцы і ў адзін час, - кажа арганізатар фэсту Vulitsa.Ezha Ягор РЫТВІНСКІ. – З 60 пададзеных заявак мы адабралі 42 удзельнікаў, якія падаліся найбольш цікавымі. Ідэя і філасофія фэстаў – даць магчымасць кожнаму паказаць сябе, свой прадукт, праверыць яго на аўдыторыі і зразумець, наколькі ён запатрабаваны на дадзены момант і ў перспектыве.
Так, аматары вулічнай ежы атрымалі магчымасць паласавацца стрытфудам розных нацыянальных кухняў: блізкаўсходняя з фалафелем і нутам, узбекская з пловам і лагманам, японская з рамэнам і роламі, амерыканская з бургерамі і хот-догамі, італьянская з піцай і паніні, венгерская з абаранкамі. Таксама можна было пакаштаваць вустрыцы, сапраўдны галандскі селядзец, баварскія шлеі, бельгійскія і ганконгскія вафлі і мора самых розных напояў ад крафтавага піва і гарачых ліманадаў да язмінавага чаю і гарбузовага латэ.
Сярод прысутных найбольшай папулярнасцю карысталіся стравы амерыканскай і узбекскай кухні. Дарэчы, узбекскі плоў гатаваўся ў велізарным казане па асаблівым рэцэпце, які ўсмешлівы повар палічыў за лепшае пакінуць у таямніцы.
- Я прыйшла на свята з двума ўнукамі, - расказвае бабуля Марыя. – Нам вельмі падабаецца, што на фэсце шмат цікавостак для дзетак, нават спецыяльную зону арганізавалі.
А вось малады чалавек Уладзіслаў прыйшоў з дзяўчынай. “Я ўжо другі раз наведваю свята стрытфуду ў Мінску, - кажа ён. - На гэты раз на пляцоўцы прадстаўлена намнога больш розных фарматаў ежы. Палепшыліся, на мой погляд, зоны адпачынку і якасць музычнага суправаджэння”.
Парадавала і забаўляльная праграма праекта Vulitsa.Ezha, бо госці фэсту атрымалі цудоўную магчымасць не толькі смачна паесці, але і цікава прабавіць час. Два дні дзейнічалі дзіцячая зона, асенняя фотазона, прафесіяналы сваёй справы праводзілі кулінарныя майстар-класы. Сярод фургончыкаў з ежай і зонамі адпачынку разгарнуўся кінатэатр пад адкрытым небам. Тут можна было прайсціся па гандлёвых шэрагах, дзе беларускія майстры і дызайнеры прадстаўлялі аўтарскя аксесуары для сябе і дома. Незабыўнымі эмоцыямі ўпрыгожылі фестываль выступленні мінскіх дыджэяў.
Вераніка УЛАСЕВІЧ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.