Вы тут

Штучным кветкам не месца на могілках


Напярэдадні Радаўніцы прадстаўнікі Цэнтра экалагічных рашэнняў выказалі сваю занепакоенасць праблемай масавага выкарыстання штучных кветак на могілках.


— Нягледзячы на сваю прывабнасць і прастату выкарыстання штучныя кветкі ўяўляюць сабой сур'ёзную небяспеку для навакольнага асяроддзя і здароўя чалавека, — тлумачыць пазіцыю эколагаў кіраўнік праграмы па экалагічна дружалюбным ладзе жыцця Дар'я ЧУМАКОВА. — Як правіла, кветкі вырабляюць са штучных матэрыялаў. Пялёсткі — з сінтэтычных тканін, напрыклад, з паліэстару, латэксу, арганзы, апрацаваных рознымі хімічнымі саставамі для надання ім пластычнасці і трываласці. Для афарбоўвання часцей за ўсё выкарыстоўваюцца анілінавыя фарбы, якія ўяўляюць сабой досыць таксічныя злучэнні, што могуць аказваць негатыўнае ўздзеянне на здароўе, выклікаючы галавакружэнне, галаўны боль, слабасць.

Сцябло, бутоны і іншыя дэкаратыўныя элементы штучных кветак у большасці выпадкаў вырабляюцца з пластыку, часцей за ўсё ПВХ, які таксама даволі таксічны.

Асяродак кветак і дробны дэкор можа вырабляцца з афарбаванага ці неафарбаванага пенапласту. Пенапласт пры награванні (напрыклад, на сонцы) можа вылучаць канцэрагеннае рэчыва — стырол.

Штучныя кветкі, гэтак жа як і іншыя штучныя пахавальныя ўпрыгажэнні, рана ці позна аказваюцца на сметніку. Выкінутыя штучныя кветкі могуць працягваць вылучаць таксічныя рэчывы, забруджваючы глебу, паветра і грунтавыя воды. А пры іх спальванні ў навакольнае асяроддзе могуць выдзяляцца цяжкія металы і дыяксіны.

Эколагі папярэджваюць: перапрацоўцы штучныя кветкі не паддаюцца, паколькі складана ўстанавіць тып пластыку для адпаведнага сартавання адходаў. Да таго ж яны ўтрымліваюць шмат пабочных матэрыялаў, якія цяжка раздзяліць. Такім чынам, што б мы ні рабілі са штучнымі кветкамі, пазбавіцца ад іх, не нашкодзіўшы прыродзе і чалавеку, не атрымаецца. Такім чынам, купляючы штучныя кветкі, мы ўкладваем свае грошы ў смецце...

Па статыстыцы за 2015 год у Беларусі на Радаўніцу могілкі наведала каля 1,5 мільёна чалавек. Нават калі траціна з усіх, хто наведае могілкі, прынясе з сабой хоць бы дзве штучныя кветкі, то на магілах нашых памерлых акажацца каля аднаго мільёна штучных кветак! А гэта прыблізна 10 тон пластыку!

Да таго ж традыцыя штучных кветак не мае глыбокіх гістарычных каранёў і налічвае не больш як 10—15 гадоў. Прынята лічыць, што штучныя кветкі каштуюць танней за сапраўдныя і даўжэй захоўваюць сваю знешнюю «свежасць». Часткова — гэта міф. На адкрытай прасторы і сонцы яны даволі хутка страчваюць свой таварны выгляд. Лепш пасадзіць побач з магілай жывыя кветкі, якія будуць доўга яе ўпрыгожваць.

«Ёсць і яшчэ адна важная акалічнасць, — падкрэслівае Дар'я Чумакова. — Кідкія штучныя кветкі зусім не адпавядаюць атмасферы могілак у яе хрысціянскім разуменні. Гэта не пляцоўка для дэманстрацыі яркіх «кіслотных» фарбаў і безгустоўных штучных упрыгожванняў, а месца, дзе жывыя могуць у цішыні ўспомніць у малітве памерлых і, не адцягваючы сваю ўвагу, пабыць разам з імі».

Надзея НІКАЛАЕВА

nіkalaeva@zvіazda.by

Фота Анатоля КЛЕШЧУКА

Загаловак у газеце: Жывая памяць — жывыя кветкі

Каментары

Па маім успамінам, штучныя кітайскія кветкі з"явіліся на рынках у Мінску пачатку 90-х, калі ў Маскве пачаў працаваць мелкааптовы Чаркізаўскі кірмаш. Тыя кветкі былі больш сціплымі па колерам і больш густоўна вырабленымі, іх куплялі для ўпрыгожвання кватэр, некаторыя гандляры нават спрабавалі з іх ладзіць нейкія пано, кампазіцыі. А потым нехта дапяў насіць такія кветкі на могілкі, і хваля перадрадаўнічнага попыту парадзіла яшчэ большую хвалю прапановы. "Чаркізон" у 2009 годзе быў зачынены, але кветак менш не стала. Зараз прыйсці на могілкі бяз гэтых кветак неяк няёмка: "ўсе ж нясуць - падумаюць, што я шкадую грошай дзеля сваіх памерлых". Утварылася нейкая дзікунская традыцыя, падобная на тое, калі б магілы пачалі размалёўваць каляровымі фарбамі. І немаведама як яе зараз спыніць.

Выбар рэдакцыі

Грамадства

Асваенне адчужэння. Што паглядзець падчас экскурсіі ў радыяцыйнай зоне?

Асваенне адчужэння. Што паглядзець падчас экскурсіі ў радыяцыйнай зоне?

Ці небяспечныя такія «вылазкі» і колькі яны каштуюць?

Грамадства

Мітрапаліт Павел: Я ўдзячны, што Гасподзь павёў мяне па гэтым шляху

Мітрапаліт Павел: Я ўдзячны, што Гасподзь павёў мяне па гэтым шляху

Уладыка расказаў, чаму з асцярогай упершыню ехаў у Мінск у якасці мітрапаліта.

Калейдаскоп

Вясёлыя гісторыі чытачоў

Вясёлыя гісторыі чытачоў

Добрая жонка і дома рай, а благая — хоць цягу дай

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.