20 студзеня, субота

Вы тут

Мецэнаты ёсць, нават калі іх не заўважаеш


У той час, як у краіне і ў прыватнасці ў сталіцы арганізуюцца буйныя і не вельмі культурныя праекты, мы можам не заўважыць працу арганізатараў і абысці ўвагай спонсараў — у сённяшнім кантэксце так прыгожа названых мецэнатамі.


Тэатральны форум «ТэАрт», кінафестываль «Лістапад», «Славянскі базар у Віцебску», мерапрыемствы Нацыянальнага мастацкага музея, Вялікага ці Купалаўскага тэатраў, Цэнтра сучасных мастацтваў, іншых устаноў, шэраг рознага кшталту фестываляў, форумаў, івэнтаў прыцягваюць да сябе неабыякавых бізнесменаў, каб у выніку ажыццявіць свае праекты. Мы завялі прыгожую традыцыю кожны год аддаваць даніну «сацыяльна адказным» арганізацыям. Чарговая цырымонія ўшаноўвання пераможцаў акцыі «Мецэнат культуры Беларусі», якая бярэ свой пачатак з 2012 года, адбылася ў чацвер у Палацы Рэспублікі.

Мы назіраем апошнім часам даволі актыўны ўдзел банкаў і прадпрыемстваў у культурным жыцці краіны, што відаць, напрыклад, па імкненні збіраць (ці вяртаць) беларускі жывапіс у карпарацыйныя калекцыі. У гэтым рэчышчы да цырымоніі ўшаноўвання мецэнатаў можна прымеркаваць дзве падзеі. У галерэі «Ракурс» Нацыянальнай бібліятэкі зараз праходзіць выстаўка карпарацыйнай калекцыі сучаснага беларускага жывапісу «Белінвестбанка», дзе прадстаўлена каля сарака пяці работ. У цэлым калекцыя налічвае каля ста твораў у розных тэхніках і жанрах, напісаных пачынаючы з 1990-х гадоў, «Белінвестбанк» таксама фінансава дапамагаў арганізацыі «Лістапада» і «Славянскага базара».

Да таго ж на пляцоўцы Палаца Рэспублікі распачала работу «галерэя Арт-Беларусь» (яна была таксама прадстаўлена 13 красавіка), як карпарацыйная выставачная пляцоўка Белгазпрамбанка. Гэта значыць, у Мінску стварылася новая экспазіцыйная прастора — тут прадстаўлена каля пяцідзесяці твораў беларускіх аўтараў, якія Белгазпрамбанк збірае з 2011 года. У экспазіцыі — Марк Шагал, Хаім Суцін, Леон Бакст, Фердынанд Рушчыц, Восіп Цадкін, Валенцій Ваньковіч і іншыя. Праект «Арт-Беларусь» уключае ў сябе разнапланавую дзейнасць па такім, можна сказаць, лікбезе — правядзенне выставак, стварэнне кніг і фільмаў. Карпарацыйная калекцыя Белгазпрамбанка налічвае каля ста твораў, напісаных з пачатку XVІ стагоддзя, а новая галерэя стане пастаяннай пляцоўкай для правядзення мерапрыемстваў у рамках праекта «Арт-Беларусь».

Вось прыкладна як гэта працуе — на карпарацыйнай сацыяльнай адказнасці, якую сёння можна прыпісаць дзевяноста арганізацыям — столькі кандыдатур разглядаў аргкамітэт перад цырымоніяй ушаноўвання пераможцаў акцыі, а дыплом «Мецэнат культуры Беларусі» прызначыў сямідзесяці шасці. У розных намінацыях на цырымоніі ў Палацы Рэспублікі былі адзначаны Белгазпрамбанк, Беларусбанк, Беларуськалій, Белдзяржстрах, Белавіа, Белтэлекам, Беларуская чыгунка, Мінскі завод пеністых він і іншыя.

Прыемна ў гэтым кантэксце адзначыць, што арганізацыі-мецэнаты становяцца і ініцыятарамі культурных праектаў і што яны застаюцца спонсарамі нават не ў лепшыя часы.

Соф'я КІСЯЛЁВА

Загаловак у газеце: Мецэнаты і кампанія

Дадаць каментар

Выбар рэдакцыі

Грамадства

Звычайная настаўніца фізікі трапіла на адронны калайдар

Звычайная настаўніца фізікі трапіла на адронны калайдар

Што насамрэч адбываецца на мяжы Швейцарыі і Францыі, дзе на глыбіні каля ста метраў размяшчаецца Вялікі адронны калайдар?

Грамадства

Як мы наведалі курсы перападрыхтоўкі для беспрацоўных

Як мы наведалі курсы перападрыхтоўкі для беспрацоўных

Не так даўно навукоўцы выявілі, што стрэс ад страты або змены месца працы ўваходзіць у топ-3 самых моцных негатыўных перажыванняў сучасных людзей. 

Грамадства

Як беларускія дзяўчаты частавалі ліванцаў стравамі з бульбы

Як беларускія дзяўчаты частавалі ліванцаў стравамі з бульбы

Ваенныя медыкі Вера Паўлянковіч і Вольга Яхнавец  былі ў Ліване з міратворчай місіяй.