Аб гэтым заявіў Аляксандр Лукашэнка на пасяджэнні Вышэйшага дзяржаўнага савета Саюзнай дзяржавы ў Маскве.
— Спадзяюся на далейшае канструктыўнае ўзаемадзеянне нашых галіновых міністэрстваў адносна фарміравання агульнага рынку газу, нафты і нафтапрадуктаў у рамках Еўразійскага эканамічнага саюза, — сказаў Аляксандр Лукашэнка.
Ён нагадаў, што раней у Санкт-Пецярбургу бакі ўзгаднілі стратэгію ўзаемадзеяння ў гэтай сферы да 2025 года.
Кіраўнік беларускай дзяржавы адзначыў, што Беларусь і Расія арыентуюцца на далейшае ўмацаванне палітычнага і эканамічнага партнёрства. «Сёння мы праводзім найбольш актуальныя і маштабныя мерапрыемствы ў нашых двухбаковых адносінах — пасяджэнне Вышэйшага дзяржаўнага савета і Форум рэгіёнаў. Прысутнасць на гэтых пляцоўках вялікай колькасці прадстаўнікоў буйных прадпрыемстваў і арганізацый з Беларусі і Расіі з'яўляецца сведчаннем цесных сувязяў двух брацкіх народаў, дэманстрацыяй узаемнай нацэленасці на далейшае ўмацаванне палітычнага і эканамічнага партнёрства», — дадаў Аляксандр Лукашэнка.
— Мы пацвердзілі гатоўнасць працягваць канструктыўны дыялог, вырашаць самыя вострыя пытанні па ўсіх напрамках супрацоўніцтва. Нашы дзяржавы маюць намер цалкам задзейнічаць саюзны патэнцыял для ўстойлівага развіцця і павышэння ўзроўню дабрабыту брацкіх народаў, — падкрэсліў Прэзідэнт Беларусі.
Аляксандр Лукашэнка падтрымаў ідэю адмены роўмінгу на тэрыторыі Саюзнай дзяржавы: «Думаю, гэта разумная прапанова. Давайце даручым. Мы пратакольна зробім такі запіс».
Па выніках пасяджэння Вышэйшым дзяржаўным саветам Саюзнай дзяржавы былі прыняты рашэнні па дзевяці пытаннях. Удзельнікі падпісалі пастановы: аб захаванні патэнцыялу машынабудаўнічага комплексу Саюзнай дзяржавы, аб супрацоўніцтве ў сферы аграпрамысловага комплексу, аб выніках гандлёва-эканамічнага супрацоўніцтва Беларусі і Расіі за 2016 год, а таксама аб ходзе выканання Прыярытэтных напрамкаў і першачарговых задач далейшага развіцця Саюзнай дзяржавы на сярэднетэрміновую перспектыву.
Акрамя таго, былі ўхвалены пастановы аб ходзе выканання Праграмы ўзгодненых дзеянняў у галіне знешняй палітыкі на 2016—2017 гады, аб старшыні Пагранічнага камітэта Саюзнай дзяржавы і аб асноўных пытаннях да пасяджэнняў ВДС на 2017 год.
Таксама былі падпісаны дзве рэзалюцыі: аб выніках рэалізацыі Канцэпцыі сацыяльнага развіцця Саюзнай дзяржавы на 2011—2015 гады і аб ходзе выканання рашэнняў Вышэйшага дзяржаўнага савета.
Уладзіслаў ЛУКАШЭВІЧ
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
