46 найменняў кніг атрымала ў падарунак Глушанская сельская бібліятэка

46 найменняў дзіцячай, краязнаўчай і галіновай літаратуры атрымала ў падарунак ад “Выдавецкага дома “ Звязда” Глушанская сельская бібліятэка.

Кнігі ўручылі дырэктар-галоўны рэдактар рэдакцыйна-выдавецкай установы Павел Сухарукаў і намеснік старшыні Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Нацыянальнага сходу Валянціна Ражанец. У размове з прысутнымі пры гэтым прадстаўнікамі раённай і пасялковай улады госці абмеркавалі пытанні не толькі літаратурнай і культурнай тэматыкі, але і адкрыцця ў пасёлку музея беларускага класіка Алеся Адамовіча.

Менавіта ў Глушы прайшло ваеннае дзяцінства пісьменніка, пра якое ён напісаў некалькі амаль аўтабіяграфічных твораў. Тут жа на мясцовых могілках ён і пахаваны. Газета “Звязда” на сённяшні дзень з’яўляецца актыўным інфармацыйным спонсарам у падтрымку стварэння на малой радзіме Алеся Адамовіча музея ў яго гонар. На яе старонках вось ужо другі год рэалізуецца праект “Глуша Адамовіча”.

Нэлі ЗІГУЛЯ