Вы тут

Па выніках выбараў дэпутацкі корпус атрымае новае аблічча


Такое меркаванне выказала старшыня Цэнтральнай камісіі па выбарах і правядзенні рэспубліканскіх рэферэндумаў Лідзія ЯРМОШЫНА пасля пасяджэння Цэнтрвыбаркама.


— Ажыццяўляецца звычайная работа, але я магу сказаць, што, мяркуючы па колькасці запытаў, якія высвятляюць канкрэтныя дэталі выбарчай кампаніі, цікавасць ёсць, — адзначыла Лідзія Ярмошына. — Гэтыя людзі не належаць да фармальнай, наменклатурнай супольнасці. Гэта зусім новыя асобы, прадпрымальнікі, паколькі тое ж пытанне дэкларавання датычыцца іх напрамую. Таму я думаю, што дэпутацкі корпус, калі гэтыя людзі абяруцца, зменіцца.

Пра выступленні на радыё

Кандыдаты ў дэпутаты маюць законнае права на адно бясплатнае выступленне па радыё. Як расказала загадчык аддзела прававой, аналітычнай і метадычнай работы Цэнтральнай выбарчай камісіі Галіна МКРТЫЧАН, такія выступленні будуць доўжыцца не менш за тры хвіліны. На яе думку, гэтага дастаткова, каб расказаць і пра сябе, і пра свае планы.

Сфарміраваны і парадак выступленняў. Кандыдаты ў дэпутаты Мінскага гарсавета выступяць у эфіры «Радыё-Мінск», Мінскага абласнога Савета — у эфіры «Мінскай хвалі».

Заявы кандыдатаў у дэпутаты рай- і гарсаветаў, абласных гарадоў будуць транслявацца на тых радыёпраграмах, заснавальнікамі якіх з'яўляюцца адпаведныя органы ўлады. Калі такіх няма — то ў эфіры абласных тэлерадыёкампаній. Выключэнне — Жодзінскі гарадскі Савет дэпутатаў. Калі няма такіх раённых і гарадскіх праграм, то заявы іх кандыдатаў у дэпутаты прагучаць на «Мінскай хвалі».

Пра дыскусіі ў СМІ

Пры Цэнтральнай выбарчай камісіі створаны «Кансультатыўны савет па разглядзе спрэчак, якія звязаны з выкарыстаннем сродкаў масавай інфармацыі пры правядзенні выбараў у мясцовыя Саветы дэпутатаў 28-га склікання». Упершыню такі орган быў створаны яшчэ ў 2000 годзе, аднак ва ўсе папярэднія кампаніі ён зваўся па-рознаму.

Кіраўніком савета стаў першы намеснік міністра інфармацыі Беларусі Ігар Луцкі, а ў склад увайшлі прадстаўнікі СМІ і спецыялісты ў гэтай галіне. Адзначым, што ўзнагароджанне ўдзельнікам камісіі не прадугледжана — яны працуюць добраахвотна.

Пра зацвярджэнне выбарчага фонду

Было зацверджана палажэнне, якое вызначае парадак фарміравання і расходавання грошай выбарчага фонду кандыдата ў дэпутаты. Крыніцамі фарміравання такога фонду могуць быць уласныя зберажэнні, лімітаваны памер якіх не можа перавышаць 30 базавых велічынь для кандыдата ў дэпутаты абласнога, Мінскага гарадскога Савета дэпутатаў і 10 базавых — для кандыдатаў у дэпутаты раённага, гарадскога, горада-абласнога і раённага падпарадкавання, пасялковага і сельскага Саветаў дэпутатаў. Другая крыніца — добраахвотныя ахвяраванні, памер якіх не можа перавышаць 2 базавыя велічыні ад аднаго грамадзяніна. Трэцяя крыніца — ахвяраванні юрыдычных асоб, якія не могуць быць больш за 5 базавых.

Пра дэкларацыі

Кандыдаты ў дэпутаты на выбарах у мясцовыя Саветы 28-га склікання павінны будуць падаць дэкларацыю аб даходах за 2016 год, а не за 2017-ы. На пасяджэнні адзначалася, што ў камісію часта звяртаюцца з просьбамі растлумачыць правілы дэкларавання даходаў і маёмасці тымі людзьмі, якія вылучаюцца ў дэпутаты.

Прычыны такога рашэння наступныя. Па-першае, вылучэнне кандыдатаў для ўдзелу ў мясцовых выбарах пачалося ў гэтым месяцы і заканчваецца 8 студзеня 2018 года. Па-другое, многія грамадзяне атрымліваюць заработную плату за снежань толькі ў сярэдзіне студзеня, акрамя таго, многія атрымліваюць узнагароджанне за год, якое таксама выплачваецца пасля 1 студзеня. Гэта значыць, што на момант аддачы дэкларацыі кандыдаты могуць не бачыць гэтых сродкаў, а ўжо пры праверцы гэтая розніца будзе бачная.

Прадугледжана, што выбарчыя камісіі будуць адпраўляць запыты ў падатковыя органы, ДАІ, Нацыянальнае кадастравае агенцтва і іншыя структуры. У выпадку парушэння правілаў дэкларацыі можа ўзнікнуць падстава для адмовы ў рэгістрацыі кандыдата.


Арганізаваны першыя пікеты па зборы подпісаў па вылучэнні кандыдатаў у дэпутаты.

Так, актыўна ўключылася ў выбарчую кампанію Рэспубліканскае грамадскае аб'яднанне «Белая Русь», якое яшчэ 10 снежня выставіла першыя пікеты ў Мінску. Актывісты арганізацыі размясцілі спецыяльныя пляцоўкі ў Маскоўскім, Ленінскім, Першамайскім і Фрунзенскім раёнах. Дарэчы, «Белая Русь» не толькі вылучае сваіх прадстаўнікоў у склад выбарчых камісій у якасці назіральнікаў, але і аказвае ўсебаковую падтрымку членам аб'яднання, якія вылучаюцца ў якасці кандыдатаў.

Уладзіслаў ЛУКАШЭВІЧ

lukashevich@zvіazda.by

Фота БЕЛТА

Загаловак у газеце: Кандыдаты ўжо вылучаюцца

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».