Вы тут

Факты пра беларускіх алімпійцаў, якія вы маглі не ведаць


Хто яны? Людзі, якія менш чым праз тыдзень выйдуць на алімпійскі стадыён Пхёнчхана і на працягу 20 дзён будуць прадстаўляць нашу краіну на сусветнай арэне. Сёння мы сабралі шматлікія факты пра нашых спартсменаў, каб вы даведаліся пра беларускіх алімпійцаў крыху больш.


Дар'я Домрачава

• Самая тытулаваная беларуская спартсменка ў гісторыі зімовых Алімпійскіх гульняў, а таксама першая біятланістка ў свеце трохразовая алімпійская чэмпіёнка.

• Нарадзілася ў Мінску ў сям'і архітэктараў. Праз чатыры гады разам з бацькамі пераехала ў Сібір, у горад Нягань, які толькі пачынаў будавацца.

• У дзяцінстве займалася танцамі і баскетболам, а потым разам са старэйшым братам прыйшла ў секцыю лыжных гонак.

• Скончыла гімназію, дзе вучылася ў эканоміка-прававым класе.

• Мае дзве вышэйшыя адукацыі Беларускага дзяржаўнага эканамічнага ўніверсітэта.

• На пачатку кар'еры Домрачава выступала за Расію, але ў 2004 годзе кіраўнік Саюза біятланістаў Расіі Аляксандр Ціханаў абвясціў аб бесперспектыўнасці Дар'і і даручыў адлічыць яе са зборнай.

• Двухразовая чэмпіёнка свету (2012 і 2013), уладальніца Кубка свету ў сезоне 2014/2015, уладальніца 5 малых Хрустальных глобусаў Кубка свету.

• У дзень заваёвы трэцяга залатога медаля на Гульнях-2014 Дар'і было прысвоена званне «Герой Беларусі», яна стала першай у гісторыі краіны жанчынай, якая атрымала найвышэйшую ўзнагароду.

• Улетку 2015 года спартсменка перанесла вострае віруснае захворванне — монануклеёз, пасля чаго працягнула трэніравацца.

• Праз год, летам 2016-га, з сацыяльных сетак стала вядома, што Дар'я выйшла замуж за нарвежскага біятланіста Уле-Эйнара Б'ёрндалена (васьміразовы алімпійскі чэмпіён), невялікае вяселле прайшло ціха на радзіме мужа Домрачавай.

• У кастрычніку 2016 года спартсменка нарадзіла дачку — Ксенію. Характэрна, што для родаў Дар'я не выбрала замежную медыцынскую ўстанову, дачка знакамітых спартсменаў з'явілася на свет у 6-м радзільным доме Мінска.

• Пасля нараджэння дзіцяці Домрачава хутка вярнулася ў вялікі спорт, узяўшы «серабро» на чэмпіянаце свету 2017 года.

• У цяперашнім сезоне тройчы ўздымалася на п'едэстал этапаў Кубка свету — у Хохфільцэне выйграла спрынтарскую гонку, у Антхольцы ўзяла «бронзу» ў пераследзе і «золата» ў мас-старце.

Сяргей Далідовіч

• Рэкардсмен беларускай каманды па ўдзеле ў Алімпійскіх гульнях. Для Далідовіча Гульні ў Пхёнчхане — сёмыя. Больш за яго ў «белых» Алімпіядах удзельнічалі толькі два спартсмены — расійскі саначнік Альберт Дземчанка і легендарны японскі скакун з трампліна Нарыякі Касаі.

• Нарадзіўся ў Оршы.

• У дзяцінстве займаўся футболам, гуляў у адной камандзе з вядомым беларускім футбалістам, а пазней трэнерам Пятром Качурам.

• У шаснаццаць гадоў стаў пераможцам усесаюзных спаборніцтваў, тады Сяргей бег у чужым камбінезоне, чужым абутку і з чужымі палкамі, толькі лыжы былі свае.

• У часы, калі былі фінансавыя складанасці, Сяргей таксаваў: «Браў жонку, каб было спакайней, выязджалі і зараблялі пяць-дзесяць долараў. Гэта вясёлае жыццё, якое ўспамінаю з задавальненнем. Памятаю час, калі мы прыходзілі ў кафэ са сваімі пельменямі. Заказвалі нейкія напоі, давалі пачак пельменяў — і нам іх варылі».

• Далідовіч дэбютаваў на Алімпіядзе ў 1994-м, тады яму быў 21 год.

• Самы дарослы ў цяперашняй алімпійскай камандзе, зараз Далідовічу 44 гады.

• У сакавіку 2001 года атрымаў сваю першую і адзіную перамогу на этапе Кубка свету.

• За сваю кар'еру прымаў удзел у 12 запар чэмпіянатах свету (1995—2017), на якіх выходзіў на старт у 34 дысцыплінах. Найлепшы вынік — 4-е месца ў скіятлоне на 30 км на чэмпіянаце свету 2011 года ў Халменколене.

• У 2017 годзе абвясціў аб тым, што завяршае кар'еру, але крыху пазней вырашыў, што хоча працягнуць выступленне і прыняць удзел у Алімпіядзе-2018. Спартсмен ужо не ўваходзіў у склад нацыянальнай зборнай, таму прыняў рашэнне самастойна рыхтавацца да Гульняў. Для гэтага абвясціў пра збор сродкаў на краўдфандынгавай пляцоўцы «Талака». Сабраў усю неабходную суму і нават крыху больш. Падрабязную смету расходаў спартсмен публікаваў на сваіх старонках у сацсетках.

• Сяргей Далідовіч з'яўляецца бацькам траіх дачок.

Антон Кушнір

• Нарадзіўся ў Чырвонаармейску (Ровенская вобласць, Украіна), з 2002 года жыве і трэніруецца ў Мінску.

• Удзельнік Алімпійскіх гульняў 2006, 2010 і 2014 гадоў. У Ванкуверы Антон быў адным з фаварытаў, у кваліфікацыі лідзіраваў пасля першага скачка, але ў другім адшпілілася лыжа, няўдалае прызямленне і толькі 21-ы вынік.

• На Алімпіядзе ў Сочы ў фінале Антон рызыкнуў і выйграў. Ён выканаў самы складаны скачок — трайное сальта з пяццю піруэтамі, прычым у самай нязручнай варыяцыі: два вінты — вінт — два вінты. «Памятаю, што той дзень быў доўгі, напружаны сам па сабе. Перад трэніроўкай адчуваў мандраж, страх. Але, калі прыехалі на схіл, усё прайшло. Я стараўся не думаць пра лішнія моманты, канцэнтраваўся на рабоце, важных дэталях, і ўсё атрымалася».

• Уладальнік Кубка свету 2009/2010 (выйграў 4 этапы з 6, адзін раз заняў другое месца і адзін раз трэцяе), сярэбраны прызёр агульнага заліку Кубка свету 2007/2008, бронзавы прызёр чэмпіянату свету 2011 года.

• Пасля перамогі на Алімпіядзе стаў тварам гадзіннікавага брэнда «Прамень».

• Перанёс некалькі аперацый да алімпійскай перамогі ў Сочы і яшчэ адну пасля яе.

• У цяперашнім сезоне ўздымаўся на п'едэстал на чатырох з шасці этапах Кубка свету — «золата» ў Маскве, «серабро» ў Лэйк-Плэсідзе і дзве «бронзы»: у кітайскім Сакрэт-Гардэне і амерыканскім Дзір-Вэлі.

• Бацька траіх дзяцей.

Ала Цупер

• Нарадзілася ў горадзе Роўна (Украіна).

• Скончыла Гомельскі дзяржаўны ўніверсітэт па спецыяльнасці «трэнер-выкладчык».

• Пазнаёмілася з будучым мужам у трэнажорнай зале.

• У 33 гады спартсменка нарадзіла першае дзіця і на паўтара года спыніла трэніроўкі, прызнаецца, што ў спорт яе вярнуў муж.

• Вольны час любіць праводзіць на рыбалцы, захапляецца вязаннем.

• Шматразовая пераможца этапаў Кубка свету.

• Удзельніца пяці запар зімовых Алімпіяд (1998, 2002, 2006, 2010, 2014).

• На Гульнях у Сочы, дзе стала алімпійскай чэмпіёнкай, Цупер з цяжкасцю прайшла кваліфікацыю. У трэцім вырашальным фінале ўдала выканала свой скачок бэк-фул-фул-фул, атрымаўшы 98,01 бала. Усе тры канкурэнткі, якія выступалі пасля яе, сарвалі свае скачкі.

• Медаль Цупер стаў першым для Беларусі ў жаночым фрыстайле.

• Пасля Алімпіяды-2014 Цупер адкрыла свой бізнес — краму італьянскай пліткі.

Дар'я ЛАБАЖЭВІЧ

Загаловак у газеце: Імёны, якімі мы ганарымся

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».