Вы тут

Беларусь і Кітай дамовіліся аб устанаўленні бязвізавага рэжыму


Статус назіральніка ў Шанхайскай арганізацыі супрацоўніцтва — гэта магчымасць не толькі заявіць пра сваю пазіцыю ў ёй, але і, скарыстаўшыся нагодай, пабачыцца сам-насам з сябрамі. Так, на палях саміту ШАС адбылася двухбаковая сустрэча Прэзідэнта Беларусі Аляксандра Лукашэнкі са Старшынёй КНР Сі Цзіньпінам. Па яе выніках Беларусь і Кітай дамовіліся аб устанаўленні бязвізавага рэжыму паміж краінамі.


Адпаведнае міжурадавае пагадненне аб узаемным бязвізавым рэжыме для ўладальнікаў звычайных пашпартоў падпісана 10 чэрвеня ў Цындаа. Дакумент заключаны па выніках перагавораў кіраўнікоў краін. Ад беларускага боку подпіс пад пагадненнем паставіў міністр замежных спраў Уладзімір Макей.

Бакі таксама падпісалі дакументы аб развіцці супрацоўніцтва ў іншых сферах. У прыватнасці, заключана міжурадавае пагадненне аб тэхніка-эканамічнай дапамозе, рамачнае пагадненне аб выдзяленні Беларусі льготнага крэдыту для рэалізацыі заключнага этапу арганізацыі высокатэхналагічнай аграпрамысловай вытворчасці поўнага цыкла, мемарандум паміж Міністэрствам эканомікі Беларусі і Дзяржаўным агенцтвам міжнароднага развіцця і супрацоўніцтва Кітая аб супрацоўніцтве па развіцці чалавечага патэнцыялу.

«Нас вельмі радуе, што мы безагаворачна падтрымліваем адзін аднаго ў любой сітуацыі. Ніколі не аглядваемся на рэакцыю і меркаванні іншых, калі размова ідзе аб незалежнасці і суверэнітэце дзяржаў. Упэўнены, што з моцным Кітаем будзе моцнай і Беларусь, якая з'яўляецца вашым верным саюзнікам», — сказаў Аляксандр Лукашэнка падчас сустрэчы.

У сваю чаргу Сі Цзіньпін адзначыў актыўны ўдзел Беларусі ў самітах Шанхайскай арганізацыі супрацоўніцтва. Ён падкрэсліў гатоўнасць Кітая заўсёды быць надзейным сябрам і партнёрам Беларусі. «Мы гатовы спалучыць наша развіццё з развіццём Беларусі», — сказаў Старшыня КНР.

Сі Цзіньпін таксама ўспомніў сваю першую сустрэчу з Аляксандрам Лукашэнкам. «Мы з першага моманту знаёмства, як даўнія сябры. Мы ўвесь час звяраем гадзіннікі па пытаннях развіцця адносін, тэматыцы, якая ўяўляе ўзаемны інтарэс, пастаянна надаём новы імпульс развіццю двухбаковых адносін. Я гатовы і ў далейшым падтрымліваць такія цесныя кантакты», — заявіў лідар Кітая.

Наша пазіцыя ў ШАС

Кіраўнік беларускай дзяржавы выступіў і падчас пасяджэння Савета кіраўнікоў дзяржаў Шанхайскай арганізацыі супрацоўніцтва. Аляксандр Лукашэнка адзначыў, што Беларусь бачыць у ШАС арганізацыю, якая павінна ўнесці свой важкі ўклад у перамогу разважлівасці ў міждзяржаўных адносінах.

«Варожасць і канфрантацыя вядуць да росту напружанасці, узнікае небяспека сур'ёзных канфліктаў з непрадказальнымі вынікамі. У гэтых абставінах Беларусь бачыць у ШАС арганізацыю, якая павінна ўнесці свой важкі ўклад у забеспячэнне шматбаковай бяспекі, абарону міжнародных нормаў і правілаў, перамогу разважлівасці ў міждзяржаўных адносінах», — сказаў Аляксандр Лукашэнка.

Прэзідэнт Беларусі звярнуў увагу, што на фоне новых хваль пратэкцыянізму ў сусветным гандлі, якія прама ці ўскосна закранаюць практычна ўсе дзяржавы, што ўдзельнічаюць у саміце, узнікае прамая пагроза ўцягвання ў гандлёвыя войны. «Таму для ўсіх нас вельмі актуальным з'яўляецца прыняцце сумесных мер, накіраваных на ўмацаванне сусветнай гандлёвай сістэмы шляхам выкарыстання магчымасцяў Шанхайскай арганізацыі супрацоўніцтва ў эканамічнай сферы», — лічыць беларускі лідар.

Кіраўнік дзяржавы таксама прапанаваў стварыць ІТ-экасістэму ШАС. «Прапаную ўсім нам сумесна падумаць над стварэннем агульнай электроннай платформы, скажам, «ІТ-экасістэмы ШАС», якая аб'яднае ў сабе магчымасці электронных СМІ, сацыяльных сетак, электроннага гандлю і шмат іншага», — сказаў кіраўнік беларускай дзяржавы. Паводле яго слоў, гэта дасць магчымасць узмацніць кааперацыю, павысіць канкурэнтаздольнасць нацыянальных эканомік ва ўмовах глабальнага свету. «А таксама дапаможа нам гарантаваць бяспеку нашых краін», — адзначыў Аляксандр Лукашэнка.

Таксама варта задзейнічаць магчымасці Беларусі для ўмацавання харчовай бяспекі краін — удзельніц арганізацыі. «Беларусь — краіна з традыцыйна моцным і эфектыўным аграрным сектарам, высокатэхналагічнымі вытворчасцю і сельскагаспадарчым машынабудаваннем. Прапануем задзейнічаць магчымасці нашай дзяржавы па пастаўках прадукцыі ўсіх гэтых галін для ўмацавання харчовай бяспекі ШАС», — сказаў Аляксандр Лукашэнка.

Ён звярнуў увагу, што пасля ўступлення ў 2017 годзе Індыі і Пакістана ў Шанхайскую арганізацыю супрацоўніцтва яе прастора пашырылася практычна да чвэрці тэрыторыі зямной сушы, на якой пражывае амаль палова насельніцтва свету. У гэтых умовах паўнацэнная забяспечанасць прадуктамі харчавання з'яўляецца найважнейшым фактарам далейшага працвітання ШАС і ўмацавання бяспекі ў гэтым вялікім рэгіёне, падкрэсліў Прэзідэнт Беларусі.

Аляксандр Лукашэнка таксама прапанаваў стварыць спецыялізаваную экспазіцыю «АграШАС» на міжнародным форуме аграрыяў «Белагра», які штогод праходзіць у Мінску. Ён запрасіў паўдзельнічаць у ёй у 2019 годзе ўсіх сяброў і партнёраў па арганізацыі.

***

На палях саміту адбылася сустрэча кіраўніка беларускай дзяржавы з Прэзідэнтам Манголіі Халтмагійнам Батулгам. Падчас яе Аляксандр Лукашэнка заявіў, што Беларусь гатова ствараць у Манголіі высокапрадукцыйныя прадпрыемствы і вытворчасці беларускай тэхнікі. Бакі абмеркавалі магчымае супрацоўніцтва ў стварэнні малочнай вытворчасці, а таксама ў сферы аўтамабільнай і сельскагаспадарчай тэхнікі, сельскагаспадарчай прадукцыі. Аляксандр Лукашэнка запрасіў Халтмагійна Батулгу наведаць Беларусь.

Прэзідэнт Беларусі сустрэўся і з Прэзідэнтам Ірана Хасанам Раўхані, з якім абмеркаваў праблемныя пункты супрацоўніцтва паміж нашымі краінамі.

Паводле БелТА

Фота БЕЛТА

Загаловак у газеце: Новы імпульс развіццю адносін

Выбар рэдакцыі

Палітыка

Лукашэнка: Мы поўныя рашучасці рэалізаваць усе дамоўленасці з Суданам

Лукашэнка: Мы поўныя рашучасці рэалізаваць усе дамоўленасці з Суданам

У Беларусі праходзіць афіцыйны візіт Прэзідэнта Рэспублікі Судан.

Грамадства

Як партызанскі і падпольны друк трапляў да чытачоў

Як партызанскі і падпольны друк трапляў да чытачоў

Неабходна было даць адпор ворагу на ідэалагічнай ніве.

Калейдаскоп

Вясёлыя гісторыі чытачоў

Вясёлыя гісторыі чытачоў

Пра ядомае і вядомае.