Вы тут

Патэнцыял тавараабароту Беларусі з Арменіяй — 150 мільёнаў долараў


Такое меркаванне выказаў Аляксандр Лукашэнка на сустрэчы з Прэзідэнтам Рэспублікі Арменія Арменам Саркісянам.


Кіраўнік беларускай дзяржавы адзначыў, што яму прыемна бачыць Армена Саркісяна ў Беларусі. Ён нагадаў, што на днях адбудуцца мерапрыемствы ў рамках Мюнхенскай канферэнцыі па бяспецы. На думку беларускага лідара, гэта вельмі важнае і сур'ёзнае пытанне, а візіт Прэзідэнта Арменіі і ўдзел у гэтым мерапрыемстве сведчыць аб тым, што Арменію не проста хвалюе гэтая актуальная праблема.

"Нашу пазіцыю ў гэтым плане ведаеце, — падкрэсліў ён. —Нягледзячы на рознага роду развагі ў дэмакратычнай Арменіі, у асобе Беларусі вы заўсёды мелі і будзеце мець добрых і надзейных сяброў. Мы з вамі працуем і ў эканамічнай адзінай прасторы, уваходзім у склад Еўразійскага саюза, мы з вамі працуем у ваенна-палітычным саюзе, АДКБ. Як бы там ні гаварылі б і ні пісалі, мы свята выконваем нашы дамоўленасці і ўсё, што пакладзена ў рамкі гэтых арганізацый".

Што тычыцца асновы двухбаковых узаемаадносін — тавараабароту — Аляксандр Лукашэнка адзначыў, што гэты паказчык расце, быў пераадолены спад, прырост больш за 30 %. Кіраўнік беларускай дзяржавы дадаў, што калі прыняць да ўвагі, што некалькі гадоў таму наогул нічога не было, то гэта вынік. "Але калі казаць пра наш патэнцыял, аб таварах, якія запатрабаваны ў нас, вашы ў нас, то, вядома, гэта не тавараабарот. Мы сёння папросту маглі б мець 150 мільёнаў долараў тавараабароту, і гэта значна падняло б нашы адносіны на больш высокі ўзровень", — заявіў Прэзідэнт.

Ён дадаў, што бакі ведаюць магчымасці адзін аднаго, таму любыя прапановы, якія будуць вылучаны Арменіяй, Беларусь разгледзіць у кароткія тэрміны і прыме адпаведныя рашэнні.

"Ведаю, што вы перажываеце складаныя чарговыя дэмакратычныя перамены, нікуды ад гэтага не падзецца. І, вядома, атрымаць інфармацыю, што завецца, з першых вуснаў ад свайго сябра і калегі — для мяне гэта вельмі важна", — сказаў Аляксандр Лукашэнка.

Акрамя таго, беларускі лідар падзякаваў Армену Саркісяну за падтрымку групы айчынных журналістаў, якія асвятлялі падзеі ў Арменіі. Паводле слоў кіраўніка беларускай дзяржавы, ён асабіста тэлефанаваў Прэзідэнту Арменіі і прасіў, каб іх прынялі для паказу аб'ектыўнай карціны падзей. Армен Саркісян даў інтэрв'ю беларускай прэсе, якое разышлося вельмі шырока.

"Мы зразумелі, што адбываецца ў Арменіі. Гэта вельмі важна для нашага народа. Таму мы ў вашай асобе бачым таго чалавека, які аб'ектыўны, рэальны і гатовы падтрымліваць з Беларуссю адносіны. Мы адкажам узаемнасцю", — запэўніў беларускі лідар.

У адказ Армен Саркісян падзякаваў кіраўніку Беларусі за падтрымку і сяброўства ў драматычныя для Арменіі дні ў красавіку і маі. Ён дадаў, што ніколі не забудзе — як Прэзідэнт і як чалавек — тую ўвагу, якую армянскі лідар атрымаў ад Аляксандра Лукашэнкі. Паводле яго слоў, званкі беларускага лідара былі не проста дыпламатычнымі, гэта былі званкі ад сябра, які хоча ведаць сітуацыю і дапамагчы.

Прэзідэнт Арменіі звярнуў увагу, што прыехаў на Мюнхенскую канферэнцыю па бяспецы, і назваў Беларусь унікальнай і адной з рэдкіх краін, паколькі вобраз нашай дзяржавы — гэта вобраз стабільнасці і прадказальнасці. "У новым свеце, у якім мы жывем, гэтыя якасці рэдка можна ўбачыць", — канстатаваў ён.

На яго думку, за гэта Беларусь высока цэніцца сусветнай грамадскасцю.

У тэму

У 2017 годзе тавараабарот паміж Беларуссю і Арменіяй склаўся ў аб'ёме 42,7 мільёна долараў (132,9 % да ўзроўню 2016 года), экспарт — 34,5 мільёна долараў (156,8 %), імпарт — 8,2 мільёна долараў (80 ,9 %). Сальда станоўчае ў суме 26,3 мільёна долараў.

У студзені-жніўні 2018 года тавараабарот паміж Беларуссю і Арменіяй склаў 31 мільён долараў і ў параўнанні з аналагічным перыядам 2017 года ўзрос на 33,7 %, экспарт — 23,6 мільёна долараў (павялічыўся на 29,2 %), імпарт — 7,4 мільёны долараў (павялічыўся на 50,4 %). Сальда станоўчае ў памеры 16,2 мільёна долараў.

Аснову беларускага экспарту ў студзені—жніўні 2018 года склалі малако і вяршкі згушчаныя, трактары і седлавыя цягачы, ялавічына, сметанковае масла, шыны, папера і кардон, мэбля і яе часткі. З Арменіі імпартаваліся моцныя спіртныя напоі, спецыфічныя тавары, лекавыя сродкі.

Экспарт беларускіх паслуг у 2017 годзе склаў 5,6 мільёна долараў (павялічыўся на 23,2 % да ўзроўню 2016 года). Імпарт паслуг — 1,4 мільёна долараў (вырас у 2,6 разы). Сальда станоўчае ў памеры 4,2 мільёна долараў.

У студзені-ліпені 2018 года аб'ём экспарту паслуг у Арменію склаў 4,1 мільёна долараў (павялічыўся на 56,5 % да ўзроўню студзеня—ліпеня 2017). Імпарт паслуг — 0,9 мільёна долараў (вырас у два разы). Сальда станоўчае ў памеры 3,3 мільёна долараў.

У 2017 годзе ў эканоміку Беларусі прыцягнута інвестыцый з Арменіі на суму 8,1 мільёна долараў (7 мільёнаў долараў за 2016 год), у тым ліку прамых — 8 мільёнаў долараў. У Беларусі дзейнічае 57 прадпрыемстваў з армянскім капіталам, у тым ліку 17 сумесных і 40 замежных арганізацый.

Уладзіслаў ЛУКАШЭВІЧ

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.